Teffeɣ Fransa .pdf



Nom original: Teffeɣ Fransa.pdf
Titre: Microsoft Word - Bettahar
Auteur: Abdenour HADJ-SAID

Ce document au format PDF 1.6 a été généré par PScript5.dll Version 5.2.2 / Acrobat Distiller 8.1.0 (Windows), et a été envoyé sur fichier-pdf.fr le 31/08/2014 à 13:58, depuis l'adresse IP 41.103.x.x. La présente page de téléchargement du fichier a été vue 1407 fois.
Taille du document: 4.2 Mo (125 pages).
Confidentialité: fichier public


Aperçu du document


Rabah Bettahar

Teffeɣ Fransa
Ungal

HCA, 2012

I

Deg wussan deg id d-ineqqer yiṭij, yettɣima Meddur s waṭas deg
ubrid yettawin ɣer taddart n wadda. Amur ameqran n yilemẓiyen
ttilin deg unnar tturaren taciret, icawraren d tuqqna tuffra, netta ad
yeẓẓel deg tuga tazegzawt akken kan tebda tmeqqi, akken kan id dtḍall ɣef udem n tmurt.Yesmenyaf amḍiq agi af wiyiḍ netta d
umeddakel-is Muḥ d wid id d-irennun ar ɣur-sen seg yilemẓiyen n
taddart imi iwala iṭij ar ɣur-s, rnu d amḍiq idergen deg ur ggiten ara
wid yettawin ttarran.
Deg umḍiq agi deg tella talwit, yettcali s wallen-is i wakken ad
iwali yal tiɣmi i yelsa wakal. Yettmuqul am win yeffuden. D amḍiq
deg i yercel uraɣ d uzegzaw. Irden akked timẓin bdan meqqin ula d
nitni, tijemmaṛin nsen ulint-d nnig wakal. Kra yellan zdat wallen-is
yettmuqul-it, u yesnezgim fell as.
Seg wass mi yella d aqrur yettri amḍiq agi acku yella yetturar
akked tnuddwin-is deg-s. Ar Meddur amḍiq agi yesmektay-it-id s
waṭas n tɣawsiwin. Yiwet d agama yeǧǧuǧgen deg-s nezzeh, tayeḍ d
ixxamen iqbuṛen id d-yegran d ilmawen. Agama yettɣurru tamuɣli-s
aṭas, yettawi-t ad yinig deg usnezgem. Yettmuqul daɣen ar
yixxamen iqburen yebdan ɣellin cwiṭ cwiṭ, ixxamen irefden aṭas n
yiseggasen. Ticṛafin nsen bdant tteftutusent seg waman n ugeffur.
Yal tagrest ad d-tawi seg-sen amur-is imi d ayen ulac win ar ad dyelhin yid-sen. Yettmuqul-iten amzun yebɣa ad yinig ar tallit deg
llan wid iten izedɣen. Ttbinin-d kra deg-sen ala cwiṭ seg yiɣraben
idd -yegran. Ssagaden i tmuɣli imi gran-d am yir tabarda mi ara
yemmet uɣyul.
Deg yixxamen agi id d-yegran d ilemawen, gan yiẓiwciwen d
yitbiren imedlas nsen. Kra yekka wass iẓiwciwen cennun, itbiren
shurruyen. Meddur ibeqqu ad yeqqim din, yettwali wid yetturaren
taciret deg unnar, u yettaf iman-is deg talwit tameqrant amzun yeldi
tawwurt n wul-is i wakken ad yekcem wayen yessedhan allen-is.

-5-

Tikkwal deg tmuɣli-s a t-id-yemmager wayen yessumaren,
tikkwal d ayen yessnuɣnayen. Ur yezmir ara ad yesserwel allen-is,
yebɣa ad iẓer ayen ur yeẓri ara, yebɣa daɣen ad d-yegru tiɣawsiwin
timaynutin. Yettmuqul mačči i wakken ad yedhu kan, maca i
wakken ad iwali daɣen ayen yeffren deg tɣawsiwin agi akk. Yebɣa
ad yelmed ayen akk yezmer.
Zrin iseggasen ɣef wass mi yeffeɣ ufransis tamurt n Lezzayer,
akken kan zwin yimdanen takka n umgaru, akken kan ssersen
icuḍaḍ nsen ad sgunfun, imir i bdan ttaɣen tanumi d tudert
tamaynut. Deg yimir-agi deg ḍerrunt twuɣa ɣef ur gemnen, deg
yimir-agi iten id-terza tyita seg deffir.
Cerwen tidi, ssazzlen akkin akka ad d-yaweḍ wass-a deg bɣan ad
cbun imdanen, ad nadin ayen tuɣ ssaramen. Aṭas aya ffuden tilelli,
lluẓen tamussni, jjmen tafat i tmuɣli… weṛεad ssersen iman nsen
ad rren taḍat, tewwi-d fell-asen ad kkren imi ass-a yewweḍ-d
wakud ara sen-yefken tagnit ad d-kksen amur nsen ger wiyiḍ, ad
afen amḍiq ger yimdanen i wakken ur ttidiren ara deg tama ḍeffren
kan s wallen.
Bɣan akk ad fken anzi ar tmura nniḍen, bɣan ad ffɣen seg tallast
deg zzren ar tafat anda ara walin ayen yeffren d wayen akk ttnadin
ur t-ufin. Xas ma yella iḍelli nsen d aberkan, assa yuɣal-iten-id cwiṭ
n usirem, amzun lulen-d tikkelt nniḍen ad qazmen tudert nniḍen,
ad qazmen ayen ara d-yettnulfuyen yal ass akka d wakkin.
Imdanen akk xemmlen ɣef yiɣallen nsen. Tlaq tazzla ɣef yal
taɣawsa. Asgunfu werǧin it-ssnen, maca acemma ur d-iban fellasen. Kkaten s wayen yellan deg tzzzmar nsen i wakken ad walin
yiwen wass tafat, i wakken ad issinen amek tga talwit. Bɣan ad
walin tamurt teǧǧuǧǧeg, tamurt anda ad afen akk izerfan nsen,
tamurt ara yecbun tamsunt.
Tudert agi tamaynut, llan wid umi id-teḍsa akken itt-bɣan, llan
wiyiḍ umi d-teḍsa cwiṭ, u llan wid tewwet ɣer yimi. Wid umi dteḍsa akken iwulem d wid yeknan ar yiḍarren n wid nnig-sen, wid
umi d-teḍsa cwiṭ d wid yeknan i wid yeknan, ma d wid yugin aslaf d
uqezzeb, wid yugin ad inin i waydi mass, d wid ay tewwet ɣer yimi.
Ldin allen ttganin melmi ad ɣlin iwaɣezniwen nnig-sen i wakken
asen d-teḍs i nitni, i wakken ad ddmen amur ay asen kksen.

-6-

Axeddam rran as azaglu i wakken ad kerzen yis. Ass mi ara s
teɣli tezmert a t-zellin deg tama amzun ur t-ẓran neɣ amzun werǧin
yexdim. Amesdrar yejgugel deg udrar-is, ulac win ara t-id-yaddren,
ulac win ara t-id-yemmektin. Ula d netta yekkes asɣar-is seg times,
ur yessugum ara kra seg-sen. Yelha-d kan d tilkin-is.
Tin yeḍran deg taddart agi, d amedya n wayen yeḍran deg
tuddar i as d-yezzin, d amedya n wayen yeḍran deg tmurt
Taqbaylit, u d amedya n wayen yḍerrun deg tmurt n Lezzayer s
timmad-is : yiwen ubrid id d-wwin, yiwet tmeṛwazt iten yewwten.
Azaglu n ufransis yebra yasen, yeṭṭef-iten uzaglu nniḍen. Wagi ur as
ufan ara isem. D tilufa id-yeǧǧa ufransis akk d tid id-yennulfan ɣer
ara beggsen s tdukli d uxemmel ɣef yiɣallen.
At taddart yesdukul-iten ugraw. Yal taddart temga isuḍaf i as
iwulmen. Xas d tid yessekres ufransis akked tid n wass-a ara
qazmen, smenyafen ger-asen kan. Yal taddart tferru iɣeblan-is ger
yimezdaɣ-is. Xas ma ad meḍlen wicqa ! D ayen yefses ufransis
iḍelli ara d-megren assa. D acu kan ẓran mačči d tirac i asen dyeǧǧa, ẓran mačči deg yiwen wass ara megren, u ad ssrewten
azeggar ay asen d-yeǧǧa, ẓran mačči deg tuqqna n tiṭ ara alin
asawen iten yeggunin.
Amur ameqran seg yimesdurar am imencaf, xas ini bran asen-d
seg tuqqna, d taẓdemt kan ar zdat ay ssnen. Ulac tamuɣli akka d
wakka, ulac tamuɣli la ɣer uyeffus la ɣer uzelmaḍ. Cban ilfan
iderɣalen, tteddun ur ẓran tasraft deg ara ɣlin neɣ acṛuf ara ten
yeččen.
Yeǧǧa-d ufransis deg sen tamaṛet ur nmessu. Yerẓa ten deg
usensul. Yewwet iten i wakken ur ttekkaren ara. Yewwet iten deg
yixxamen nsen. Amek ara yettu win umi kksen aserhu ɣef tmeṭṭutis, neɣ win umi nɣan yiwen seg twacult-is zdat wallen-is? D ayagi
akk i ittezzin deg iqeṛṛay nsen.
Imesdurar zgan tteddun s tergigit d uxiqi, zgan ttnusen s uɣilif.
Acu kan akken yella wass a t-qazmen s wayen yellan ger yifassen
nsen. A t-qazmen am wid yezrin, a t-qazmen akken tettqazam tixsi
uccen ; ma yella ur tufi ara abrid i trewla, ad tt-terr tmara ad tenges
s unyir-is. Ad tewwet s wayen yellan deg tezmert-is i wakken ad
tesserwel iman-is d warraw-is.

-7-

Ussan ur gdan ara, maca tarewla ulaniɣer. Terra ten tmara ad
gen asurrif ar zdat, mulac ad d-afen iman nsen ar deffir, akud
yzerri. Ayen ttegen yal ass mačči d afran, d tamara kan iten
yettawin. Terra tmara ad qazmen ass amaynut akken yebɣu yili;
ama yezmumeg s yiṭij, ama yekres anyir s usigna d wagu, ama
yemmuger-iten-id s wurɣu neɣ yergel asen abrid s iceqqfan n ugris.
Tigellelt tettbini af wudem n yal yiwen. Ur zmiren ara ad fernen.
Ugur ma ur t-rẓan ara a ten yesderri, a ten yefk i ucṛuf. Akken yella
deg yinzi : “akken yella wass, a t-yeks umeksa.” Tudert nsen tuɣal d
tamara, win yettren wayeḍ af waddad-is a t-yaf deg yir tagnit i yella.
Ulac amdan irekden ala ma yettmeslay kan s yiles.
Deg yiwet tegnit kra din yetti, deg yiwet tegnit yal yiwen
yettnadi ayen yelhan i yiman-is kan. Yir tagnit iten yesduklen tezri.
Ass-a ulac acengu ɣef ara dduklen. D nitni ay d icenga n yiman
nsen. Amdan deg ugama-s itettu, yettarra icenga d atmaten-is,
atmaten-is n yir tagnit ijellu-ten neɣ yettweddif iten akken kan ad
tefrari fell-as. Yettak-iten ar wanda ur isell ara yis-sen.
Yir amdan mi ara izelli atmaten-is, ur yessiḍen ara akken ilaq. Ar
ɣur-s, lhan kan mi ara tili tegnit teẓmek i wakken a t-id-kksen seg
tesraft neɣ seg yimi n tlafsa. Akka ay d yir amdan ; anda telɣuɣi i
yiman-is kan, anda teqqur yessawal i yimeddukal d watmaten. Win
inudan ɣef wayeḍ a t-yaf ceɣben-t yiɣebelan-is : yal yiwen yettani
tilkin-is d aya.
Ass-a imi acengu yeffeɣ, ulac d wanwa ara naɣen, ilaq ad dsnulfun acengu neɣ ad d-slalen ayen deg ar ad d-lhin. Ayen akk
yellan yeffer deg wulawen nsen, ass-a a t-id-ssuffuɣen xas mačči d
imir-is. Yal wa d acu id-yesnulfuy ɣef wayeḍ, yal wa acu yesremtuy
ddaw tecḍaḍt n ubeṛnus-is, yal wa anda it-tessaweḍ tmussni-s. Ala
win ur nufa gma-s a t-yegzer xerṣum s yiles : “wagi d amǧahed,
winna d agumi, wihin yekki deg taluft ihin…”
Seg wakken teftes tifrat n uɣbel deg ttidiren, ttarran urrif ɣef
wiyiḍ : “uccen qqsen-t warẓaẓen, yerra urrif ɣef yibẓiẓen.” Deg tigi
ttemttalasen akk yimezdaɣ n taddart. Ur ksanen ara ; yeǧǧa-d deg
sen ufransis tiyita ur nettejji. Yeẓẓeg tamurt am tfunast, yeffeɣ
yeǧǧa-d wid ara yeẓẓgen deffir-s. Yeffeɣ yeǧǧa-d aɣref ur yefri ara
ma ad yuɣal am netta neɣ ad yuɣal ar yiẓuran-is.

-8-

Meddur akk d Muḥ qqimen deg yiwen umḍiq, maca yal yiwen
aniɣer yunag, ladɣa Meddur iɣab s tidet. Yal tikkelt deg ara t-imuqel
Muḥ i wakken ad yemmeslay yid-s a t-yaf ulac-it din. Meddur,
udem-is d aras, tafekka-s am uɣanim acu kan mi ara yetteddu neɣ
mi ara yeqqim werǧin ikennu. Azaw-is d wallen-is d iberkanen.
Muḥ yemgared ɣef umeddakel-is Meddur : d aqerḍal azaw-is d
akessas, d awezlan, maca yedwes aṭas. Aglim-is d aras ula d netta.
- A meddur ! Aniɣer tunageḍ akka ? I yas yenna Muḥ s teḍsa.
- Ula d kečči mačči d agi i telliḍ. Tebɣiḍ kan ad teḍseḍ fell-i.
- Ad nekker ad neddu abrid abrid, syen mi ara d-nuɣal ad nali ar
uxxam.
- Azekka ma yella ulac axeddim deg uxxam ad ddmeɣ abeckiḍ-iw
ad rreɣ ar tiẓgi ma tebɣiḍ ad tedduḍ yid-i.
- Azekka ur cukteɣ ara, ẓriɣ xas ulac axeddim ad d-yennulfu.
- Acu txeddmeḍ deg uxxam ?
- Ssaliɣ agerbi s usɣar, tura a t-nselleɣ s wakal. D nekk-i ay
yxellḍen tixmiṛt.
- Agerbi nni ẓriɣ-t. Nekki ɣilleɣ d ayen tekfiḍ-t.
- Aql-i yal ass rmumḍeɣ seg tixmiṛt.
- Tessneḍ ihi ad tselɣeḍ s tixmiṛt ?
- Ur ssineɣ ara, d yemma iyi d-yemlan cwiṭ. D tikkelt tamezwarut
ara ssaliɣ agerbi deg tudert-iw.
- Dɣa tebɣam ad terrem akk axxam nken d igerbiyen?
- S wagi sin, yiwen nettarra deg-s aɣyul akk d tejlibt, wagi i
wakken ad tessewwa deg-s aɣrum yemma.
- D ayagi ay bɣiɣ ad d-inniɣ ; iḍelli tessulim agerbi i tejlibt, ass-a
ternam wayeḍ i usewwi n uɣrum, azekka ad d-nnulfun wiyiḍ i
wayen nniḍen ! I yas yenna Meddur s teḍsa n uqejjem.
- Akken tebɣiḍ sserwet. Nekki uḍneɣ, kečči sew isufar i wakken
ad jjiɣ.
- Imi d kečči ay d amuḍin, u tukiḍ s waṭṭan-ik, ssew isufar imanik, nekki ulac acu ara yi-d-yawin ar tfekka-k, i yas yerra Meddur
yekkat-it ar tayet.
- Tɣilleḍ am wakken nezmer ad nessali ayen yugaren aya nugi.
- Bɣiɣ kan ad qeṣṣreɣ, wanag ẓriɣ acu ay aɣ yettarran ad neg akk
annect-a.
-9-

- Ihi imi teẓriḍ akk ayagi, ulac acu ara k d-rnuɣ, i yas yerra Muḥ
yeskuṭṭuf-it seg umeẓẓuɣ s teḍsa.
- Ih, d tidett ar ɣur neɣ nzeddeɣ ixxamen akken ur ten nekfa ara s
uxeddim, syen ayen nessaweḍ ad t-nernu, mulac aql-aɣ nezdeɣ.
- Ulac adrim, iferrawen s wayes ttafgen yimdanen. Akal n udrar
agi nneɣ xas ini d aẓru, ur d-yettak ara aɣrum.
- Amer id d-yettak aɣrum tili imawlan nneɣ ur ttinigen ara ar
wanda ad ttwaregmen, ad stehzayen fell-asen amzun d aklan
nsen, i yas yerra Muḥ s uskuccet.
- Seg zik nni ttinigen yimdanen. Sya seg taddart tuɣ ttinigen ar
Lezzayer ɣef uḍar, llan wid yettɣaman aseggas i wakken ad duɣalen.
- Win ara k yinnin akka tura ad inigeɣ ar Lezzayer ad teḍseḍ fellas, i yas yenna Muḥ yettgergir s teḍsa.
- Tura tella tumnayt mačči am yimir nni, ttmaḍalen imi abrid d
aɣzefan ɣef uḍar. Tura tuqqna n tiṭ aqli-k deg Lezzayer.
- Ahat ayen din fell-asen mi ara yilin deg ubrid. Azɣal, ageffur...
- Deg wayagi nif-iten s waṭas.
- Ula d nitni yella wacu deg ay aɣ ifen!
- Iban kan, ayen yellan imir nni mačči d ayen n yir kan, yella ula d
ayen yelhan.
Wwin abrid ttmeslayen am wakken nnumen. Ddaw ubrid
ttwalin aṭas medden deg tmizar nsen. Kra ksan, kra neqqcen.
Kkan-d akk abrid alami ledcen, zzin-d ar uxxam.

- 10 -

II

Meddur yeẓẓel ar yidis n Muḥ deg umḍiq anda nnumen
ttɣaman, yeẓẓa tamuɣli-s deg yixxamen iqburen iten-id-iwalan. Yugi
ad yekkes maḍi allen-is seg-sen. Yettawi tamuɣli-s seg umḍiq ar
wayeḍ.
- A Muḥ, wali kan ar tzeqqa inna amek tuɣal, i yas yenna
Meddur yettwehhi s uḍad-is ar yiwet tzeqqa trab akk, temɣi-d tuga
ɣef iɣraben-is, ugar n uzgen n uqermud-is yeɣli.
- Anta tazeqqa a Meddur? Ur ẓriɣ ara aniɣer tettwehhiḍ.
- Tagi zdat neɣ, ha-tt temɣi-d fell as tuga.
- Walaɣ-tt. Ayɣer acu yellan deg-s?
- Amer ak yinni yiwen a Muḥ, tazeqqa agi tuɣ zedɣen deg-s
medden, acu ara s tinniḍ?
- Nekki ẓriɣ d akken tuɣ zedɣen deg-s, ma d win ur neẓra ara
ad yini d tikerkas. Asmi itt-zedɣen mačči akka ay tella. Aṭas id-cfan
yixxamen agi, amer ttmeslayen ad d-innin kra.
- Nekki ttwaliɣ mačči ala ixxamen agi. Ula d tizemrin cfant-d
amer ttmeslayent ad d-inint kra ula d nitenti imi ttidirent aṭas, i
as yenna Meddur ikemmez aqeṛṛuy-is.
- D tidett aṭas aya nitenti ger usemmiḍ d uzɣal, ger tyitwin n
yimextafen d tqubac.
- Ula d ixxamen ttiwsiren am yimdanen. Mi ara ssalin axxam ad
d-ibin ibedd am umdan ameẓyan, syen mi kkan fell-as yiseggasen a
t-rrẓen, ad yebdu ikennu. Ladɣa ma ffɣen seg-s yimawlan, ulac win
ad d-yelhin deg-s, ad yuɣal d annar win yesran taɣawsa a tt-yeddem.
- Deg tudert kra din ɣur-s tazwara, ɣur-s taggara. Akka ay tga.
Ulac afran, ama nebɣa ama nugi.
- D tidett, akka id-nufa ad neḍfer kan ad nessusem. Llant
tɣawsiwin deg tudert netteg-itent, werǧin netter yiwen neɣ
xerṣum iman nneɣ ayɣer.

- 11 -

Imeslayen n Muḥ zgan-d deg umḍiq nsen. Akken ay tuɣ yesnezgim
Meddur ɣef tɣawsiwin n tudert. Meddur yettɣima d yiman-is ugar n
wayen yettɣima d yimeddukal-is. Tafekka d ugraw, allaɣ yunag anda
nniḍen : yettmuqul, u yesnezgim amek tbeddel tudert deg taddart-is
(ma yella dɣa d tidett tbeddel), amek tuɣ ssaramen d wanda id-ufan
iman nsen. Xas ma yella zik nni ur yella ara imi weṛεad ilul, maca
ayen akk i as d-ttalsen ɣef yiḍelli d wayen ddren ddaw tecḍaḍt n
ufransis, yessebruruz-it, yeserwas-it ar wayen yellan ass-a.
Yal tikkelt deg ara yesnezgem ɣef wayen i as d-nnan yettaf-d
deg waṭas n tegnatin, ula yiwen seg taddart-is wala seg twacult-is,
yules-d tidyanin akken llant. Kra n win i as d-yulsen kra n tedyant
yezrin alama yessuff-itt, ileqqem-as kra n wayen yebɣa ad yili. Ad
tili tedyant tban tefra, win ara tt-yalsen i wayeḍ, ad yeg kra yellan
deg tezmert-is i wakken ad as yernu cwiṭ n usuffu sɣur-s i wakken
ad tehwu i win ara s yeslen. Llan kra rennun ticrurin, llan wid ittyettarran d tadyant nniḍen maḍi.
Deg waya agi Meddur ur ireffu, ur yekkat deg win ara s d-yalsen
kra, maca tuɣ yettmerray ad yegzu acu iten yerran ad shuskin izri
nsen, acu iten yessawaḍen ad rnun sɣur-sen ? Tura ar ɣur-s deg
wayagi tefra : shuskayen tidyanin nni yezrin i wakken asent rnun
deg wazal. Win ara sent yeslen ad yessugun kan, ur iẓer ara ayen
yellan.
Tikkwal amdan mi ara isell i kra n tedyant, deg usugen-is ad yaf
amzun mačči d tidyanin yeḍran d tidet. Deg usugen as d-binent
amzun d timucuha. Win isellen ad iɣurr iman-is neɣ ad yefren tidet
yeḍran seg wayen yerna win i as d-yettalsen. Tuget xas ma ẓran d
akken yella wayen yernan, ttsusumen, ttkellixen i yiman nsen am
wakken ikellex i yiman-is win i asen d-yettalsen uqbel a sen ikellex i
nitni isellen. Daymi imɣaren ttzuxxun s yizri nsen.
Asmi yella d aqrur yessaweḍ ad yefles d akken imdanen n zik
nni ugaren wid n tura deg wayen yellan. At zik nni yessugun-iten-d,
maca werǧin iten iwala. Yesla kan s wayen id-ğğan d wayen gan deg
tudert nsen. Seg wakken ur yeẓri ara s wallen-is, yuɣal iferren ayen
yefkan anzi ar tidet seg wayen yernan neɣ ayen yeshuski win i as
yettalsen. Ayɣer ad yerreẓ aqerruy-is?

- 12 -

Seg wakken iṭij yerẓa-ten, Meddur ifay, u yemmaẓẓed alami
yeṭṭerḍeq usensul-is akk d yiɣsan n tfekka-s. Yeslef i uqerruy-is s
ufus-is ayeffus, afus azelmaḍ yerra-t deg yiciwi-s.
- Bdiɣ ttnuddumeɣ seg uzɣal agi. Tuga agi amzun d usu xas ad
neṭṭes dag-i, Ay as yenna Meddur i Muḥ mi d-yesɣim iman-is
yetteffer allen-is ɣef yiṭij.
- Dɣa ali ar uxxam ad teṭṭseḍ neɣ ṭṭes dag-i. Iṭij n wass-a yelha
d ayen kan. Amenyaf ad teṭṭseḍ dag-i wala deg uxxam.
- D tidett. Ur tettwaliḍ ara akkin ffɣen-d akk medden ar beṛṛa.
Wa yefser iceṭṭiḍen, wa yefser iman-is ad ifaṛes kan, wa...
- Ula d nekkni am nitni, aql-aɣ nefser iman nneɣ deg tuga.
Ters-d cwiṭ n tsusmi, ibedd Meddur, yemmaẓẓed tikkelt nniḍen,
yesfeḍ allen-is, yettmuqul ar wasif ; ger wallen-is aceṛcuṛ n waman
tteddun s urkad. Hwan as waman i tmuɣli, yedha ar ɣursen.
- Ad adreɣ ar wasif ad ssirdeɣ udem-iw amer ad d-dduqseɣ
cwiṭ. Yessemlellay yiṭij agi ! Ahat ula d kečči am nekki, neɣ ala ?
Muḥ ur as d-yerri ara awal, yessenquqel kan aqerruy-is. Yuder
deg tkessert am win yetteddun yeṭṭes. Ur d-yuki ara alami yewweḍ
ar wasif. Yeẓẓel ifassen-is, yugem-d uraw n waman, yessared udemis. Aman d izedganen am temrayt, ttceṛcuṛen akken s tullza.
Ayen akk yella yesnezgim, qal yeffeɣ seg uqerruy-is, maca mi
yekfa tarda, yeqqim ɣef uẓru ar yiri n wasif, bdant ttuɣalent-d
tugniwin nni ; zerrint-d zdat wallen-is amzun d asaru. Tidyanin
yeḍran deg yizri, ma yella amdan ur tent yeddir ara deg yimir nni,
ad d-yezg yeftes aṭas i wakken a tent id-yessugen akken llant neɣ
xerṣum ttakent anzi ar wakken llant deg tidet nsent.
Mačči d tikkelt ay teḍra akka d Meddur. Ttillin wussan deg
yettɣima akk d yimeddukal-is, ur d-yeqqar ula d awal. Deg tidett
mačči ala yid-s ay tḍerru akka, ula d imeddukal-is, ttinigen am
netta deg usnezgem akked tirga timeslab. Ttwalin tudert tnesser ger
yifassen nsen am waman n udfel, ur zmiren ara ad sbedden akud
neɣ ad beddlen abrid.
Cwiṭ kan ata yewweḍ-d Muḥ. Ula d netta yerra ar wasif ad
yessired. Yeẓra tili-s Meddur mi d-yerfed aqerruy-is. Seg wakken ur
t-yefṛiz ara seg yiṭij it-id-yewwten ar wallen alami yerra afus-is ɣef
twenza-s.

- 13 -

- Ad nali ar uxxam a Muḥ, neɣ ahat yehwa yak ass-a ad
teqqimeḍ dag-i?
- Ad ssirdeɣ kan ad nali. Am nekki am kečči, ula d nekki yerẓa
iyi iɣesan yiṭij agi. Assagi ur iyi d-gan ara axeddim deg uxxam daymi
d-udreɣ.
- Ula d nekki akken, wala ur ttilliɣ ara dag-i yid-k. Yemma
melmi tga akka ayi d-tesnulfu axeddim. Tikkwal ma yella ulac
tettnadi amer ad taf kra. A tt-nawi akka deg uxeddim agi ur
nessuffuɣ ara alama newser, ad d-naf iman nneɣ d ayen ur yelli
wacu nezmer a t-neg.
- Kečči ur ẓriɣ ara ma d aqeṣṣer neɣ d tidett akka ay tettwaliḍ
tiɣawsiwin?
- Amek ttwaliɣ tiɣawsiwin?
- Tezgiḍ tettwaliḍ tent seg yir tama, tama yelhan tsefḍeḍ-tt seg
uqerruy-ik neɣ ar ɣur-k ulac-itt.
- Tama yelhan ẓriɣ-tt tella, ur ttmeslayeɣ ara kan fell-as, ttnadiɣ
amek ara kkseɣ tama nni ur nelhi ara i wakken anda ddiɣ ad ttafeɣ
tid yelhan.
- Ay agi id-teqqareḍ d awezɣi. Amek ara tekkseḍ akka ayen ur
nelhi ara. Ayen yelhan s timmad-is deg-s ayen n yir.
- Ay agi ẓriɣ-t, llant aṭas n tɣawsiwin ay netett, ayen id-yegran
deg sen nettak-it i tejlibt, amer it-nettzelli kifkif ?
- Am wakken ay netteg i tzemmurt ; azemmur-is a t-neẓẓem,
ad d-nekkes seg-s ahatim, iɣwawen akk d yisɣaren a ten nesserɣ,
afriwen-is a ten-ččen wakraren.
S umeslay kecmen anda nniḍen, sskeflen-d tid n zik nni, rnan-d
tid ttidiren ass-a, syen ssusmen. Tasusmi nsen d ameslay deg
wulawen nsen, ad uɣalen ad snezgimen ttettren iman nsen.
Bdan ssiriden udemawen nsen s udhu, uɣalen ttemṛuccun s
waman alami ttceṛcuṛen. Tturaren, ttaḍsan. Mi kfan tarda deg
wasif, ṭṭfen abrid ar yixxamen nsen, ma d ilemẓiyen yetturaren,
ǧǧan ten deg unnar ad rnun ahat alama d tameddit neɣ alama yeɣlid yiḍ maḍi.
Xas ulamma tteddun ar uxxam, ttmuqulen seg ubrid ar unnar
seg id-tettbini-d takka yettalin ar yigenni, ma d nitni tteddun deg
ubrid ttqeṣṣiren. Tikkwal ttzellin tamuɣli ar deffir i wakken ad
walin wid id-ǧǧan neɣ win ad d-yetteddun. Tteddun snezgimen
- 14 -

anda ara ssezrin ayen id-yeqqimen seg wass-a alama yeɣli-d yiḍ i
wakken ad dergen deg yixxamen nsen am nitni am medden.
Mi ara d-yeɣli yiḍ ɣef taddart deg tegrest amzun ulac win ittyzedɣen. Tallast mi ara d d-tesberber, tettarra akk medden d
iderɣalen. Tetteqqen allen i yimdanen s ucwaw-is aberkan. Tardast
ur yettwali yiwen wayeḍ. Ula d itran akk d tziri ad ffren. Ayagi akk
yettarra-ten ad ssrewlen iman nsen zik skud yella yiṭij deg usirem
ad afen cwiṭ n talwit deg yixxamen nsen. Ad ssiɣen tafeyyact, ad dzzin akk i ukanun ad ẓẓiẓnen.
Tagrest tessagad d ayen kan. Ttergigin seg usemmiḍ, seg tirmag
d waḍu. Tessagad ula s tallast-is. Akanun yezga deg-s uqejmur. I
wakken ad tender times ugar smirin as abaliɣ. Am wakken nnumen
daɣen ttalsen timucuha i asen d-ulsen yimezwura, ad alsen ula d
timucuha deg ttidiren. Tikkelt ad umaren, tikkelt ad nnuɣnin.
Xas ad illin akk deg yiwet n taddart, acu kan yal yiwen amek ara
yessezri iḍ ; ad illin wid ara yensen s wul d afessas imi ẓran azekka
nni aniɣer ad rren , u rekden imi tawuri nsen telha, ad illin wid ara
yensen s wul d aẓayan, ttganin melmi ad yali wass i wakken ad
uɣalen ar tferkiwin nsen i asen yettaken aɣrum, ad nsen ttargun
talwit, melmi id d-ukin ad d-afen tudert nsen acemma ur ibeddel
deg-s.

- 15 -

III

Tuget n imesdurar, ɣillen imi yeffeɣ ufransis tilufa nsen d ayen
frant. Wwten deg yenyiren nsen asmi d-ukin ufan-d d aḍu kan. Ziɣ
mačči akken itt-bɣan itt-ufan ; targit nni tamcumt yuɣal as uqelmun
ar iḍarren, yuɣal as wudem n ufella ar wadda. Llan wid yessaramen
ad d-tuɣal Fransa wala imeẓgellifen agi igellden tura.
Ass mi llan ttazzalen s isenǧaqen ttsuɣun deg iberdan, ass nni ay
tuɣ wiyiḍ ẓeddmen ɣef wayen id-ǧǧan ifransisen, ass nni ay gellden
wid ur nerfid ara abeckiḍ, ass mi tefra id-kecmen ar tmurt.
Kecmen-d i wakken ad gellden, kecmen-d i wakken ad rren
tikmamin i wid yeddmen abeckiḍ ssuffɣen afransis akk d warraw n
wid yeɣlin deg tiẓgi, ǧǧan-d tidgalin d yigujilen.
Iɣebnan n tmurt rnan tawaɣit i taddart. Deg yiwet taddart teḍra
yid-sen am iɣerdayen deg umerdax, kkaten s kra yellan deg
tzemmar nsen i wakken ad d-ffɣen, ad d-slellin iman nsen seg-s.
Yal wa yettmerray ad yeffeɣ d amezwaru ɣef wiyiḍ, wid ara d-yegrin
ad wwten deg twenza nsen. Cuban ar yisufa ; smendeg ad rɣen, ma
tebda ten tirɣi alama uɣalen d iɣiɣden. Akka ay d taddart, akka ay d
arraw-is!
Amesdrar amzun d akured, yettagi ad yeqqim anda ara yezɣel,
ileɣɣu ar wanda ara t-rebẓen : d nitni ay inudan tilelli, u d nitni ittyugin imi d-ufan iman nsen deg tama d inebgawen n tmara, d nitni
itt-yugin imi yebra yasen waruz yeṭṭef-iten wayeḍ. Wid yeffɣen ar
tiẓgi ttetten deg yiḍudan nsen mi ara ttwalin akka.
Ass-a, ar kra tefra, ar wiyiḍ tura ay tebda, tifrat ur iban melmi.
Deffir n uzarug tlul-d taluft d tameqrant, d nettat akk id-yekkan
nnig tiyiḍ. Amek ara ttin idis imi afransis yeffeɣ ? Amek ara dssekkren tasuta n deffir afransis ? Ayen id-yeǧǧa ufransis mačči d
ayla nsen. Ayen yellan d ayla nsen ttun-t seg wakken lhin-d s
umennuɣ. Ayen nniḍen unfen as deg tama, ur t-rzan, ur ten-idyerza.
- 16 -

Tasuta n uzarug tuget d ilemẓiyen : “ur d-ǧǧan yimezwura ayen
ara d-afen ineggura”. Tura d amennuɣ akk d tudert, afransis nni
yettwattu, xas ma yessegra-d aṭṭan ur nettejji. Ayen din d iqudaren,
tidgalin d yigujilen. Llan wid yessesleb alami ur ẓran anda tteddun.
Wid id-yecfan ar ass-a ttmeslayen.
Ibedd Meddur ar yiri n ubrid, yettmuqul akkin ar tiẓgi.
Imesbriden zerrin s tazzla amzun d kra iten iḍffren. Tikli nsen s
uɣṣab, yal yiwen aniɣer yeṭṭef abrid-is. Wa yettali, wa yettader.
Ttbinin-d seg ubrid am tiliwin mi ara zerrin. Sya ar da Meddur
yettzelli tamuɣli ar deffir, yettmuqul yemma-s it-id-iḍefren.
Tignewt terwi akk. Amzun tekfa tudert, kfan yemdanen. Abrid
yessusem, ulac ula d igḍaḍ deg igenni. Yal amdan yeɣṣeb ad
yessedreg aqerruy-is. Ula d wid nni tuɣ yettwali akkin ar ubrid n
tiẓgi dergen, ur d-banen ara maḍi.
D tameddit n wass n tegrest ; iṭij am win ikukran ad d-iḍill,
tafat-is yessderɣel-itt wagu alami yiwen ur yezmir ad iwali wayeḍ.
Meddur yetteddu zdat yemma-s s tqabact deg ufus-is, tamuɣli sya
ar da ar deffir. Nettat tegzzem abrid, teɣṣeb ad taweḍ ar uxxam.
Meddur yezzuɣur iman-is am win yewwin kra ɣef tuyat-is.
Aḍu yettsuḍu-d d asemmaḍ, isellef ɣef wudem-is yettawi azawis deg ubrid-is. Mi t-yeqqes usemmiḍ deg yiwen ufus a t-yeg deg
yiciwi-s, ad yerr taqabact ar ufus nniḍen. Yetteddu am win
ydehhun ar wayen yẓerr deg ubrid-is, xas akken axeddim n wass-a
yesseldec-it. Afrasen deg yigenni ttafgen amzun d urar ar ɣur-sen,
igenni yettbini-d d aberkan. Ur d-yuki ara alami id-yemlal Muḥ
ysenned ar teslent ar yiri n ubrid, yeknuneḍ deg ubeṛnus. Muḥ
yeffeɣ-d ar ubrid i wakken ad yesduqqes ameddakel-is.
- D kečči i isennden akka da ! Ayɣer qeddmen-k-id seg uxxam?
Am win ayi d-yinnin ad k-in-afeɣ dag-i deg ubrid. Ssneɣ-k mačči d
win ara yeqqimen deg uxxam, kra yekka wass kečči ad tilliḍ d azɣad
am umceddal deg unebdu. Seg wass mi ik-ssneɣ am umeẓgellif...
Muḥ yessuffeɣ-d afus-is ddaw tecḍaḍt n ubeṛnus-is, yeẓẓel-it
izul Meddur, yesseḍfer agergir n teḍsa.
- D ayen tura tekfiḍ aqejjem ?
- D ayen kfiɣ ma tebɣiḍ ad tebduḍ kečči.

- 17 -

- Tedduqseḍ ah ! Wissen anwa ay tɣilleḍ ? Gguniɣ-k dag-i seg
llina. Mi ẓriɣ akka yuli-d wagu nniɣ as amcum nni ad d-yuɣal zik
seg ufras n uzemmur.
- Yettbini kan ad d-uɣaleɣ seg ufras tura. Medden akk wwin
abrid ar yixxamen nsen. Tura att-a tallast terna-d, tɣilleḍ ad ferseɣ s
useferfed. Yiwet tzemmurt id-yegran, irab-d fell-as wakal dɣa
ggulleɣ alama rniɣ-tt akken ad d-kecmeɣ ar uxxam.
- Ad d-tuɣaleḍ seg uxxam tura neɣ ad teqqimeḍ cwiṭ ?
- Ad d-uɣaleɣ ma ulac acu yellan daɣen. Zgiɣ ssugumeɣ acu ar
ad d-yennulfun.
- Ulac, tura d tameddit.
- Wissen ? Nekki ur ẓriɣ ara. Ahat tura ad d-snulfun axeddim
n yiḍ.
- Seg zik nni llan wid ixeddmen deg yiḍ.
- Ẓriɣ llan, nekki ak d-ttmeslayeɣ af yimawlan nneɣ, ahat a tid-snulfun.
- Imawlan ma terra tmara, xas bges. Ur tezmireḍ ara ad
terreḍ iman-ik deg tama.
- Ur rriɣ, ur ttarraɣ iman-iw deg tama, seg zik am tejlibt
inehher umeksa, aniɣer i as-yehwa ad terr.
Meddur yegza acu yebɣa Muḥ s tmuɣli-s. Yeẓra d akken
yettṛaǧğu-t i wakken ad calin cwiṭ deg ubrid, ad meslayen ɣef yal
taluft id-yusan deg yiqerray nsen neɣ ad awḍen ar tɣellust n taddart
ad ssezrin tameddit nsen din am tmeddiyin yezrin. Seg wakken
yeqqes-it usemmiḍ s tidet, yettsuḍu ifassen-is i wakken ad yeẓɣel.
Muḥ yessugum acu ara s d-yernu.
Ihi ass-a teṛwiḍ tazzla deg yiɣil akk d uzemmur. Netta
yettazzal kečči deffir-s. Akka id-nufa, s imal nettazzal deffir kra s
imal ireggel. Seg wakken ireggel dɣa ula d azal-is irennu. Am win
yettazzalen deg waḍu.
- Amek ihi !? Yak d ayen ur nugar ara umi ttaken imdanen
azal, wanag ayen yugaren ɣf ufus nsen akk i yella, melmi tnudan a t-afen. Ma yella d tazzla mačči dɣa ɣef ulac maḍi !
Amer ɣef ulac ay nettazzal tili ad neqqim kan. Nettazzal ɣef
uzemmur imi ur nebɣi ara ad nečč tiremt tamerragt,
nettqeddir isɣaren i wakken ur nettnus ara i usemmiḍ,...
- 18 -

Ayɣer akka dɣa tudert agi, mi ara tili tɣawsa deg ufus n
umdan ur as yettak ara azal, melmi itt-yejla neɣ tettwakkesas dɣa ad yettru fell-as?
- Yettɣilli d taɣwasa yellan ar wiyiḍ i yemgan azal ugar n tin
yellan ar ɣur-s. Tessmektaḍ iyi-d s tedyant n yiwen umɣar ;
tuɣ ɣur-s tameṭṭut d tufrint ger tilawin, yesseɣli-d fell-as
igenni, yezga d amennuɣ, d tyitiwin, tirgam...
- Anwa-t wagi?
- Ur ẓriɣ ara anwa-t, win iyi d-yulsen tadyant agi ur iyi dyenni ara anwa-t.
- Ulac aɣilif, awi-d kan tadyant agi telha.
- Ihi, amɣar agi yettgalla ma tezzi deg uxxam-is imi ur yessin
ara amek ara yaf tilawin nniḍen. Dɣa akken ay teḍra twaɣitis.
- Amek i as teḍra?
- Yewwet taqabact deg uqerruy-is ! Tennebra tmezwarut,
yewwi tis snat i as yerran aqerruy ar deffir. Yedder alami
yettaɣ tiyitwin seg ufus-is.
- D tilufa yesseḍsayen tigi.
- Ulac ayen yesseḍsayen annect n tlufa.
- Tessneḍ akk annect agi teqqimeḍ dag-i !? Tettazzaleḍ deg
yicerfan n taddart.
- Ihi xas mmel iyi aniɣer iyi wulem ad inigeɣ?
Meddur yeḍsa kan. Yebɣa ad yaweḍ ar uxxam i wakken ad dyuɣal. Xas ma hwan as yimeslayen n Muḥ, maca seg wakken yebɣa
ad yader ar uxxam, ysellef kan i yifassen-is seg usemmiḍ akk d cwiṭ
n uxiqi.
- Ihi ad awḍeɣ ar uxxam ad ssirdeɣ, ad kkseɣ akal agi idyneṭḍen deg yifassen-iw, ad d-sburreɣ kra n uceṭṭiḍ ad d-uɣaleɣ.
Assa kkrent tcibaḍ deg yifassen-iw.
- Amer d ifassen ixeddmen tili ur ttekkrent ara tcibaḍ deg-sen.
Tekkreḍ-d s wudi d tamment... d afeccac ɣef yiman-ik.
- Xas kkreɣ-d s wudi d tamment mačči am kečči, deg tigi
tugareḍ iyi.
Din din yezzi. Yuder ar uxxam, yetteddu yettaṭṭaf deg yigigen
id-ifergen axxam. Yeldi tawwurt yekcem. Yeqqim deg ufrag, yekkes
-

- 19 -

arkasen-is, yugem-d azal n waman is ara yessired. Yesla kan i
usremtu n wetma-s Feṛṛuǧğa akk d yemma-s wala atmaten-is
Meqran akk d Meẓyan ulac-iten deg uxxam, ttasen-d kan deg
wussan n usgunfu seg Lezzayer anida xeddmen. Ula d nitni seg
wass mi xeddmen ufan iman nsen ugar.
Meqran d yiwen ilemẓi, aṭas i yettɣillin d ameqran ugar n
wakken yella, imi yettmeslay akk d yimeqranen ugar n tnuddwin-is.
Udem-is d ahrawan, d amellal cwiṭ, azaw-is d aberkan, d aɣezfan
ɣef watmaten-is. Yettaǧǧa tamart-is azal n wayyur i wakken a ttyseṭṭel. Meẓyan udem-is d aɣezfan, d aras, azaw-is d aberkan,
yettaǧǧa-t ad yennerni s waṭas alami ur d-ttbinin ara imeẓẓuɣen-is.
Teffeɣ-d Feṛṛuǧğa seg tenwalt, terra teddem kra n ijeqdar idteğğa deg ufrag, tezzi-d ar Meddur.
- Ad teččeḍ kra n yiwzan, neɣ tettheyyiḍ iman-ik ad teffɣeḍ ?
Akka tura ay lhan, ma yella semmḍen d ayen.
- Ad d-uɣaleɣ ad ččeɣ, xas d isemmaḍen ulac aɣilif. Ur lluẓeɣ
ara tura.
Yekfa kan tarda s uɣṣab, ibedd zdat tewwurt n tenwalt. Yemmas tessefqad akk acu d-theyya Feṛṛuğǧa deg yimir deg teffeɣ nettat.
Meddur izelli kan tamuɣli, yekcem ar texxamt-is. Yesfeḍ udem-is.
Mi iṣeggem akk iman-is imuqel akk taxxamt-is ma yella kra ur nelli
ara deg umḍiq-is, yeffeɣ s ubeṛnus-is, Yetteddu yetteknunuḍ deg-s.
Ayen iga akk tuɣ yennum-it alami yezmer a t-yeg war asnezgem.
Akka ay beddunt temliliyin n ilemẓiyen n taddart; yiwen ad d-yemlil
wayeḍ, syen ad d-ḍefren wid ara mlilen deg ubrid nsen alama yuɣal
d agraw. Awal nsen yettezzi ɣef wayen akk iten iceɣben d wayen i
asen yerran azaɣar d asawen. Akken alama yeɣli-d yiḍ neɣ yella
usemmiḍ aṭas. Ttɣiman deg iberdan n taddart i wakken ad ssezrin
akud.
Seg wakken ẓran tuget n yimɣaren ur gezzun ara ayen ttnadin d
wayen ssaramen, smenyafen ad ṭṭfen tama nsen, meqqar ger-asen
tefra imi d ilemẓiyen akk ay llan, u ẓran d akken ma tezri temẓi ur
d-yeqqim ara wayen itt-yifen deg tudert. Ẓran d akken deg temẓi ay
tella tezmert, ẓran d akken ilaq asen ad heyyin seg tura i wass mi
ara uɣalen d imɣaren, ma ulac, ulac win ar asen igen azal, ulac win a
ten iqaddṛen, ur ttillin ara d amedya deg wayen yelhan. Ttagaden

- 20 -

akk medden ad d-grin deg yir awal. Win yebɣan ad yergem wayeḍ
as yinni : “ad k-yeǧğ Rebbi deg yir awal !”
Ayen iḍerrun d yilemẓiyen mačči d ayen ara iqidd wawal i
wallus. Kkan ger tawwent d yifḍisen : Ibabaten ur ten gezzun ara
maḍi, tamurt ur ufan ara deg-s amur, dɣa nitni ttarran kan ar
wulawen nsen, ur zmiren ara ad d-refden allen nsen. Tilemẓiyin d
taluft maḍi. Nitenti, llant twaculin ur tent ttaǧǧant ara ula ad zellint
tamuɣli ar beṛṛa xerṣum ad walint tafat. Zgant kan d amennuɣ akk
d ijeqdar deg uxxam. Mi brant i uqerdac, a ten-id-yemmager uẓeṭṭa,
akken kan ara ifak uẓeṭṭa, ad d-yernu deffir-s umsal n ijeqdar n
talaxt wanag aɣerbal yal ass ger yifassen nsent.
Seg wakken ur ttafent ara iman nsent maḍi deg tɣimit deg
uxxam, yal tagnit ar asent id-yeɣlin i tuffɣa, ur tt-zegglent ara ;
tikkwal tteffɣent akked tyemmatin nsent ar tmizar ttfarasent cwiṭ n
tudert, tikkwal tteddunt ma yella ad rezfent ar yiwen seg wid i asen
yettillin. Mi ara illint d tiqrar anda bɣunt illint ur d-cligen ara deg
sent, melmi mdent dɣa a tent rren ger uqus iɣraben, win muqlent
seg-sen d agugam, ur d-yettarra ara awal i wakken a tent iwanes neɣ
a sent yessifses taẓẓayt ɣef wul.
Deg taddart, mačči d irgazen i yekksen izerfan i tmeṭṭut ugar n
wakken iten tekkes tmeṭṭut ɣef yelli-s neɣ tamɣart ɣef teslit-is.
Tuget n yirgazen zgan ḍeffren ayen ara d-innint tilawin nsen s
teflest d tuqqna n wallen, ladɣa mi ara ilin deg beṛṛa ur ẓran ara acu
iḍerrun deg uxxam. Yal mi ara d-kecmen ar uxxam ayen yeḍran akk
deg wass, a ten-id-yaweḍ taneqqiḍt s tneqqiḍt.
Irgazen igellilen, xas ur ẓran acemma ad kkren ad qazmen tilufa
i asen ẓḍant tilawin nsen : ama d amennuɣ n yiqṛaṛ neɣ d amennuɣ
akked temɣart neɣ akked tnuḍt. Ad yebdu uɣben d awzi, ad yuɣal
annect n tizi ! Seg wakken drus n medden i yettnadin ad frun, llan
wid irennun abaliɣ i ferru alama ulac win izemren ad yessens times
war ma yerɣa.

- 21 -

IV

Taddart am teɣrast n tzizwa, ur tettafeḍ, ur tettemliliḍ win
yesgunfan. Yal yiwen yerza tawuri-s, at taddart yeṭṭef-iten unezgum
d ameqran. Zik zik ay ttekkren, zeggiren iṭij ar unqar. Ad yili igenni
yeččur d itran mi ara yeffeɣ umur ameqran seg taddart. Akken kan
ara yali wass ad tuɣal taddart xas ini d tilemt. Tigdi, lxiq d targigit i
asen d-yeǧǧa ufransis werǧin i ten-ffɣen. Zedɣen-ten akkas.
Imesdurar zgan wwin yid-sen tazdemt n iɣebnan, llan deg-sen
anda bɣun ddun. Yal taɣawsa ara walin ad rgigin imi ttagaden ad
yeḍru kra. Yettwachem umdan seg tid yekkan fell-as. Wwḍen alami
melmi teḍra kra n tedyant d tameẓyant ad bdun asuɣu, s yirgazen s
tilawin, wwḍen alami ula d tili tessergigi-ten, alami yal mi ara dyinni yiwen awal a t-id-yeḍfer uskuccet imi yugad amer d yir isali.
Am wakken yella deg yinzi : “win yeqqes uzrem, yettagad
aseɣwen.”
Iheṭṭalen am tuddar nniḍen ; ixxamen-is akk deg icerfan,
msenneden am yiẓra n yiwen uɣrab. Abrid ar ɣur-s d win id-yeǧǧa
ufransis, acemma ur ibeddel ara. Ageffur yeɣza tiregwa deg
tlemmast-is, tizemrin zgant-d ɣef yiri n ubrid, mi ara d-yeɣli yiḍ deg
tegrest amdan ur ifeṛṛez ara. Nitni uɣen tanumi. Tteddun deg
icerfan-is, ur ttegririben ara imi din id-kkren. Ssnen iberdan, ssnen
icerfan, ssnen tiferkiwin nsen. Ayen yellan deg taddart mačči d
abeṛṛani fell-asen.
Taddart seg wakken d tameqrant tebḍa ɣef sin; taddart n ufella
deg i yezdeɣ Akli, baba-s n Meddur, taddart n wadda deg i yezdeɣ
Weɛli, ameddakel n baba-s. Sin n yirgazen agi ssnen-ten akk
medden s wayen nnuɣen mgal afṛansis : Akli yeɣli d ameɣras deg
unnar n userhu, Weɛli yessegri yas-d umennuɣ yir aṭṭan alami s
tmara kan ay yettenwiwil. Yuɣ aṭas n tiyitwin, iqerḍasen cergen-t
ayen din. Yeṭṭef deg tudert s tmara.
Tawacult n Weɛli akked twacult n Akli, tezdi tegmat ger-asent
mačči d kra. Amzun d arraw n yiwet n twacult. Tamawt agi rran-tt
- 22 -

akk imezdaɣ n taddart ; sin n yergazen agi myerfaden deg yir tagnit,
fkan tudrin nsen ɣef tmurt. Yiwen yemmut wayeḍ d amuḍin
amezgi. Tiyita yerzan Weɛli d ass mi nɣan ameddakel-is d wass mi
d-nudan fell-as ad t-nɣen. Imi ur teṭṭifen ara, Qasi Waεmer d
Usalem rran urrif ɣef arraw-is nɣan-ten wa ɣef yidis n wa. Yal
tikkelt deg ara d-yettmekti, imeṭṭawen ttceṛcuṛen ɣef tamart-is.
Tameṭṭut-is Lğǧuheṛ mačči d ayen ara d-yini yiles.
Weɛli d awfayan u d awezlan, tamart-is tjerreḍ s wanẓaden
imellalen ger yiberkanen. Udem-is d amellal, azaw-is d aberkan deg
id-ttbinin anẓaden imellalen. Allen-is d tiberkanin, mi ara yerfu
ssaggadent. Tameṭṭut-is Lǧuheṛ amzun d talafsa itt-isummen,
terhem maḍi, udem-is d aras, amzur-is d aberkan, allen-is d
tiberkanin, ttbinint-d amzun nsant. D tawezlant ula d nettat.
Usalem yemmut akken kan yefra umgaru. Ass mi yefra umgaru,
kkren yimǧuhad gerrwen akk igumiyen ar yiwen umḍiq merten ten
kra n wussan, bran asen. Usalem akken kan i as bran yeḍfer-it
yiwen seg taddart-is yenɣa-t. Yemmut yir tamettant. Zrin fell-as
aṭas wussan akken it-ufan d amurḍus deg tiẓgi. Ar ass-a ur ẓran
anwa it-yenɣan.
Xas ma yemmut yeǧǧa-d sin n yilfan am netta. Arraw-is, Ɛli
akked Muḥuc, ffɣen akk i ubrid n taddart. Zgan d tikkerḍiwin
akked tid ixuṣṣen. Deg taddart akk ttwalin-ten s yir tamuɣli. D Qasi
Waεmer i asen yemmalen yir iberdan. Yezga yettdemmir-iten ar
zdat ma d netta itteffer iman-is. Tura at taddart yerzan ten Qasi
Waεmer, yuɣal-d yezdeɣ deg taddart nsen ; yezdeɣ deg yiɣil n ufella
deg ubrid n tiẓgi id-yettbinin akken iwulem seg taddart. Tawaɣit
tameqrant nniḍen, d akken yezga yeddukul akk d warraw n
Usalem, u yettcali am netta am imezdaɣ nniḍen neɣ yettarra iman-is
yugar-iten.
Ass mi yefra umgaru yerwel ar Lezzayer, syen yekka acu yekka
din, yuɣal-d ar taddart. Assa yercel akk d Tasaεdit, taḍeggalt n
Remḍan Ayamun. Seg yimir nni yezdeɣ din ar ɣur-s. Tasaεdit d
atmaten-is itt-iqeddmen seg uxxam n baba-s. Seg wakken axxam n
urgaz-is amezwaru yugig ɣef taddart, ur tezmir ara tmeṭṭut ad tidir i
yiman-is din tama n tiẓgi, tuɣal ar uxxam n baba-s akk d yelli-s
Sekkura. Seg wakken tezga d amennuɣ akked tilawin n watmatenis. Ufan-d abrid ad tercel, wanag nettat tugi ad tercel akk d ugumi.
- 23 -

Atmaten-is ur d-cligen ara deg-s d wanwa ara tercel, awi-d kan ad
teffeɣ seg uxxam anda ttidiren.
Xas akken s tmara ay tercel akked Qasi, deg wussan imezwura
temmerray akken ad twali d argaz-is, maca ayagi ar ɣur-s d awezɣi.
Tugna n Remḍan, argaz-is amezwaru, tugi ad tettwasfeḍ ger
wallen-is, tugi ad tanef zdat-s. Yal mi ara temmeslay akk d yelli-s
Sekkura tsekken as-d d akken teṭṭef deg urgaz-is amezwaru,
tneddeṛ-itt i wakken ur tettettu ara baba-s. Temla yas d akken ulac
argaz izemren ad yeṭṭef amḍiq n baba-s. Xas akken acemma ur as tid-yeǧǧa urgaz-is Remḍan, maca tufa-t d argaz n tidet. Ayen yellan
deg ufus-is werǧin it-yeffer neɣ yekkes-as-t.
Tamara tettarra amdan ad yeg ayen ur yebɣi ara, tettarra-t ad yeg
ayen werǧin yegmen. Tassaεdit ass mi tella akked Remḍan terfed
aqeṛṛuy-is ar yigenni, xas ma d imeɣban am wat taddart akk, maca
ur tetteffer ara udem-is ɣef medden am tura. Qasi yerra-tt deg tama
am wakken it-rran wat taddart. Ayen itt-idemmren ad tercel d
tamara akk d uɣrum. Tameṭṭut taqbaylit ur tezmir ara ad teffeɣ am
urgaz. Ur tezmir ara ad d-tessas aɣrum. Akka ay teḍra d Tasaεdit
alami itt-ssenzen watmaten-is am tixsi.
Zrin fell-asen kra n yiseggasen, yiwen ur yezmir ad imuqel
wayeḍ, Tasaεdit nni yellan d tasusamt, ur tezmir ara i tlufa n Qasi d
warraw n Usalem id-yettawi ar uxxam, tuɣal tbeddel tikli, tessuffeɣd tuccar-is ula d nettat i wakken ad tqazem awaɣzen i as d-wwin
watmaten-is ar uxxam n urgaz-is amezwaru. Deg taddart akk
regmen ten ɣef wayagi. Tameɣra n urcal nsen amzun d tamḍelt. At
taddart ɣunzan ten, qqimen kan i yiman nsen alami d ass deg ffɣen
seg taddart. Seg wass nni ur nudan ɣef wetma-t-sen. Ǧǧan-tt akked
Qasi ur d-cligen ara deg-s maḍi.
Weɛli yettwali ayagi iḍerru zdat wallen-is, ur yezmir ara a t-idyali wawal. Ur yezmir ara imi d tazmert i as tt-yekksen wanag ur tyettaǧǧa ad yennunnet ass wala d iḍ. Werǧin yettu tamettant n
umeddakel-is d warraw-is netta. Xas akken tazmert ulac yezzuɣur
iman-is s tmara yettḍilli arraw n umeddakel-is Akli. Yuɣi-tt kan deg
wul-is yessusem.
Tikkwal yetteffeɣ ar ubrid yettmuqul kan ma yella win id dyeffɣen seg uxxam n Akli neɣ ad yazen kra n umsebrid ar yiwen seg
sen. Ur yerkid ara wul-is fell-asen, yeẓra ass mi yemmut
- 24 -

umeddakel-is Akli, taẓẓayt ad d-teqqim akk fell-as. Ur yezmir ara a
ten yeǧǧ tteccfen deg tlufa iman nsen, ilaq ad ibedd ar yidis nsen.
Ma yella ixaq fell-asen yettgani-ten deg ubrid. Yessugum melmi ad
d-yeffeɣ yiwen seg uxxam. Axxam n Akli yezga-d deg tlemmast n
taddart n ufella. Ttbinint-d seg ubrid snat n texxamin, tazeqqa akk
d tenwalt. D axxam umi d-zzint kra n tzemrin i yettarran tili deg
unebdu.
Faḍma, tameṭṭut n Akli, tessekker-d arraw-is deg tilqi
tameqrant. Yettbini-d wudem-is yekmec seg tmara, amzur-is d
amellal akk, tezga teddal-it s thendit. D taččarant, u d tawezlant,
udem-is d aras, allen-is d tiberkanin. Tezga d agrireb ɣef warraw-is
nettat d temɣart-is. Ur teflis ara yiwen wass a ten twali d irgazen.
Ulac taluft ur temmuger ara. Win id-yekkren deg tilqi am ta d
awezɣi a tt-yettu xas ma tessegra-yas-d talwit, ur tettekkes ara seg
wul-is wala seg wallaɣ-is. Am wakken yella deg yinzi ɣef win
yelluẓen : “win tewwet tlaẓit ar uqeṛṛuy, xas yeṛwa ad as yecfu”.
Akka ay teḍra akk d Faḍma ; tilqi tewwet-itt ar uqeṛṛuy daymi tugi
ad tettu. Mačči kan tugi ad tettu, maca tesselmad i warraw-is i
wakken ad issinen ayen yeḍran yid-s wala akk d urgaz-is neɣ d
temɣart-is.
Axxam n Akli yeqqim d annar n tlufa akk d tnuɣnit imi fell-s i
isenned akk. Tamettant-is tessegra-d i twacult aṭṭan amqennin.
Tettkuru deg wulawen nsen am takurt. Win yemmuqlen wayeḍ ad
yegzu acu t-yessaḍnen. Alami zrin iseggasen akken id-uɣalen ar
tudert am nitni am yimdanen. Deg taddart ulac win iten idyettmuqulen anagar Weɛli. Am wakken ddren i yiman nsen.
Quzmen yir tudert s tebɣest. Arraw-is akken d iqṛaṛ i bdan tilqi.
Ẓẓidren i wayen akk i asen d-tniwel tudert. Xas ma uɣen abrid d
asawen werǧin run neɣ bedden i yiwen ɣer tewwurt ad ssutren
tallalt. Xas d imeẓyanen, zgan d ukyisen. Ayagi d ayen akk id dlemden ar yemmat-sen wanag baba-t-sen ur tessinen ara akken ilaq.
Yal tameddit mi ara tekfu Faḍma aqdac deg uxxam akk d unqac
deg tmizar, tgerrew-d arraw-is ar ukanun tettales timucuha-s, yir
tidyanin itt-ileqfen, yir tudert itt-yerẓan d imeṭṭawen n tmara. Tecfa
ass mi nɣan iserdasen n Fransa argaz-is deg tiẓgi s ufus n Qasi
Waεmer yellan d agumi ger wid yesseṛwan tamara i wat taddart,
tecfa ass mi tt-wwten ifṛansisen alami d-terra akni i wakken a sen
- 25 -

tini anda yella urgaz-is. Mačči d yiwen wass ay teẓẓel deg tesga seg
tiyitwin. Tecfa ass mi d-tegr d taǧǧalt akken d tameẓyant, deg
urebbi-s Meqran, Meẓyan d Feṛṛuǧğa, ma d Meddur yeǧǧa-t-id
baba-s deg tadist-is, yemmut ur t-yessin ara. Ulac win ara
yessismḍen ul yezzan, yeqqedṛuṛfen. Ala tamɣart-is ay tettaf ar
yidis-is, ula d nettat ur terni ara aṭas, temmut.
Deg uxxam ass mi llan d iqṛaṛ, yal yiwen seg yimeqranen
yetturar akk d yiwen seg yimeẓyanen : Meqran akk d Meddur,
Meẓyan akk d Feṛṛuǧğa. Daɣ nitni zgan akken xas deg yiwen ufrag
ay tturaren. Ass mi ara tader Faḍma ar tmazirt yellan ddaw uxxam,
ttafen iman nsen akken ilaq, akken bɣan. Meqran ireffed Meddur
ger yifassen-is, yettazzal yis-s deg ufrag, yesskukuḍ-it alama ɣlin
asen-d imeṭṭawen seg teḍsa. Ma d tamɣart n jidda-t-sen, ur
tettsusum ara mi ara tettwali akken, yal tikkelt ad tinni : “ ssers
gma-k ay izirdi !” neɣ “ ad d-kkreɣ ar ɣur-k a Meqra…”. Tikkwal d
tidet, ad d-tekker ar ɣur-s s tmeṛwazt-is, as t-tekkes ger yifassen.
Dɣa mi tt-yeẓra tuɣal ad teqqim, ad yuɣal daɣen ar ɣur-s.
Seg wakken ur tezmir ara ad d-tekker yal tikkelt, as tini: “ tura
ad d-taweḍ yemma-k ay uccen !” imir nni Meqran a t-yessers, ad
qqimen ar yidis-is, nettat ad terked, ad taf talwit. A ten tmuqel
yiwen yiwen ma din ay llan, a sen tini : “ akka ay ttiɣmin wukyisen.”
Din din ad tettu akk acu yeḍran wala tagallit-is. Mi d-tuɣal yemmat-sen amzun kra ur yelli. Ma yella tetter-itt ma nnuɣen as tini s
uzmumeg : “ ur ssinen ara warrac agi amek ttnaɣen, d ayen mi ara
sellen kan ar medden.” Dɣa ula d Faḍma ad tegzu ayen yellan.
Weɛli akk d Meddur qqimen deg tmazirt, Weɛli yal tikkelt d acu
ara yeg, yuɣal yeqqim seg wakken yeldec seg tuzzya.
- Teẓriḍ a Meddur a mmi, amdan akken yebɣu yili, d amɣar neɣ
d ilemẓi, ur yezmir ara ad yerked wul-is ad yeqqim kan. Nekki mi
ara ẓreɣ akka tiɣawsiwin mačči deg umḍiq nsent ay llant, ilaq a tent
rreɣ ar wanda llant. Ittett iyi wul-iw d ayen kan.
- Yelha win ixeddmen, maca am kečči tura ur tezmireḍ ara.
- Nniɣ ak a mmi d ul ! Ur iyi yettaǧǧa ara wul-iw ad qqimeɣ,
ttxiqiɣ mi ara qqimeɣ kan am ucmux deg yiwen umḍiq. Win ara
yeqqimen seg mi ar ad d-yenqer yiṭij alama yeɣli ur ireffed ur
yesrus, dɣa yedder wagi, nekki a t-rnuɣ ar wid yemmuten.
- Seg zik nni akka ay telliḍ neɣ tura kan ?
- 26 -

- Ass mi lliɣ d ameẓyan alama ibedd-d baba ar uqeṛṛuy-iw, nekki
zgiɣ d tarewla. Imir nni ur ssineɣ ara, tuɣ yettbini iyi-d amzun i
baba umi xeddmeɣ, tura imi ulac tazmert.ukiɣ-d d akken ulac baba,
ulac yemma, ilaq ad xemmleɣ ɣef yiɣallen-iw.
- Tura kečči iwulem ad txedmeḍ kan tiɣawsiwin tifessassin.
Ayen yellan fell-ak txedmeḍ-t ass mi telliḍ d ilemẓi.
- Tikkwal ur gganeɣ ara seg waṭṭan, kra din yettcerrig deg-i.
Mačči d iḍelli ara d-yuɣalen a mmi.
- Ayagi iban am yiṭij a dda Weɛli, nekki akka tura mi ara d-kkreɣ
tanezzayt mačči am wass mi lliɣ d aqrur id-ttekkreɣ. Zik nni
ttekkreɣ-d am yilef, tura xas d ilemẓi mačči am wass mi lliɣ d aqrur.
- Ass mi lliɣ d ilemẓi a mmi ur ẓriɣ ara anda ara ɣliɣ wala anda
ara mmteɣ, ssekcameɣ iman-iw ala anda ur iwulem ara. Tikkwal mi
ara d-ttmektiɣ ttergigiɣ, yettbini-iyi-d amzun d wayeḍ mačči d
nekki.
- Deg Fransa neɣ d agi ?
- Ih a mmi ! Ferneɣ tamurt anda...ama dag-i ama akkin, rnu
mačči ala nekki, zemreɣ ak iniɣ tuget seg ilemẓiyen akka.
- Ula d tura llan am kunwi.
- Ẓriɣ llan am nekkni, u llan ugar. Bɣiɣ a k inniɣ d akken ilemẓi
d ameslub, d ungif.d win yetteddun am uderɣal.
Lǧuheṛ tettmuqul-iten-d seg tewwurt n uxxam. Seg wakken
theyya imekli, tessugem iten ur d-usan ara.
- Iyam tura ad teččem imekli neɣ tettum-t ?
- Tura ad d-nas, ur ireggel ara imekli-agi.
- Ẓriɣ dag-i kan ara yeqqim, ugadeɣ ad yismiḍ.
Bedden tteddun ar uxxam, wwḍen qqimen ad ččen, ma d
Lǧuheṛ tessers alemsir deg texxamt, teqqim tettqeṛdic taduḍt. Syen
tezzi ar Meddur am tin yebɣan ad terẓ tasusmi id-yersen deg
uxxam.
- A Meddur, ass agi terwiḍ aqeṣṣer akk d dadda-k.
- Am iniɣ kan tidet a nanna, ameslay akk d dda Weɛli werǧin itṛwiɣ, mačči d yiwet tɣawsa neɣ d snat id-lemdeɣ ar ɣur-s. Mačči d
ayen ara ččeɣ ar wadis i wakken ad yeččar.
- Acu ay ak yesselmed akka dadda-k?
- Ayen iyi yesselmed tzemreḍ a t-teẓreḍ deg tikli-w, deg
yimeslayen-iw...
- 27 -

- D tidett a mmi, nekki kkreɣ-d dag-i kan deg udrar, acemma ur
t-ẓriɣ ara, amer mačči d netta tili ad qqimeɣ kan am uɣersiw, ur
ẓerreɣ ara acu yellan deg tudert.
Dda Weɛli isell kan, dɣa din yegzem as awal :
- Eǧǧ tura argaz ad yečč, melmi yekfa ssefruri ɣef yiman-im,
faṛes-it skud dag-i i yella, i as yenna Weɛli s teḍsa.
- At a-n itett mačči d imeslayen agi ara t-yerren ur itett ara, i as
terra s uzmumeg.
- Anef as a dda Weɛli ad tqeṣṣer, ad tekkes ɣef wul-is.
- Aha a mmi ini-d acu tgemneḍ ad d-tiniḍ.
- Bɣiɣ am iniɣ d akken ula d kemmi tlemdeḍ ar ɣur-s.
- Ass mi nɣan arraw nneɣ wid ur nettagad ara Rebbi, imir nni
tuɣ d abrid ad aɣeɣ tiẓgi, ad selbeɣ a mmi ! Amer mačči d dadda-k
iyi yettekksen ɣef wul-iw tili mačči akka ar ayi twaliḍ ass-a.
- U tura mi ara d-tettmektiḍ amek tḍerru yid-m?
- Tura mačči am zik nni, imir nni lliɣ d tilemẓit, ur ssineɣ ara
amek ara dduɣ.
- Ihi tura tettuḍ.
- Werǧin ad ttuɣ a mmi. Akka alamma medlen iyi allen. Tɣilleḍ
eg kan akka ad tettuḍ !? Ẓriɣ, bɣiɣ ad d-inniɣ ur tettezzuḍ ara akken
am zik nni.
- Xas ur ttezzuɣ ara am zik nni, mi ara d-mmektiɣ ad nemmet
ur d-neǧǧi ara deffir neɣ, ur ttafeɣ ara maḍi iman-iw.
- Ihi ma d annect agi i tugadeḍ, xas yella win id-yeǧǧan, annect
bɣun idiren ad rnun akk ar ɣur-sen. Akka i d tudert. Ala Rebbi ara
d-yeqqimen, i as yenna Weɛli s usenquqel n uqeṛṛuy.
- Ayen id-tenniḍ a dda Weɛli d tidet, acu kan win yeddren
tignatin am tigi ur zmireɣ ara as iniɣ akka neɣ akken nniḍen. Ala
netta itent yuɣen, ihi ala netta i yeẓran ayen yettḥulfu.
- Teẓriḍ a Meddur; ala win yewwtan akk d win yettewwten i
yeẓran !
- Nniɣ ak akka a dda Weɛli imi selleɣ i kra qqaren amer d nekki
tili ad geɣ akka, ad rnuɣ akka... melmi iten id-tewweḍ tedwelt nsen
ur ttegen acemma, ahat d winna deg kkaten iten yifen.
- Ur ttmeslay ara ɣef tɣawsa ma yella ur as tezmireḍ ara, ini kan
ayen yellan deg tezmert-ik. Ur ssnuz ara awtul deg tiẓgi ! Melmi itid-teṭṭfeḍ syen ẓer amek ara s tgeḍ.
- 28 -

- Imdanen tura mačči ala ayagi ay zemren, i as tenna Lǧuheṛ ger
teḍsa d unezgum.
- Aql-i d ameẓyan a nanna, ẓriɣ ayen ur iqebbel wallaɣ. At a
iḍerru d agi kan zdat neɣ, ulayɣer ad nmuqel anda nniḍen, i as
yenna Meddur.
- Llan kra n yimdanen deg tudert agi am tsellufin ɣef uydi, ur dttwakkasen ara alama mmuten. Zgan ttidiren deg uɣurru akk d
tkerkas.
Qeṣṣren akken iwulem, ḍummen-d akk afrasen ɣef wulawen
nsen. Meddur usan am wigi werǧin a ten yettu, yettri aṭas ad
yessezri akud deg umeslay yesselmaden iberdan n tudert.

- 29 -

V

Deg uxxam yeẓẓel Meddur deg wussu am akken yennum yetteg
yal ass, ladɣa ma ur yufi ara aniɣer ad yerr neɣ ulac axeddim. Deg
wussu, yettmuqul tacṛaft n uxxam akked ubeckid i yugel ar uɣrab.
Af yidis n ubeckid yugel tawlaft n baba-s akked sin n imeddukal-is,
ur ten yessin ara. Yuɣal ar wayen akk yezrin a t-id-yessekfel.
Yemmekta-d yiwen wass ass mi yella d aqrur, iteddu deg ubrid
yetturar, yezri-d ar yidis-is yiwen umɣar.
- A mmi aniɣer tettedduḍ akka ?
- Ad d-awiɣ aɣrum…
Ur t-yeǧǧğğa ara ad d-yernu awal, yezzuɣer-it seg tfettust,
yessekcem-it ar yiwet n texxamt werǧin yessen deg tudert-is.
Teṭṭef-it tigdi akked tergigit, amɣar nni imuqel-it ar wallen.
Yessener-d yiwet n tewlaft d tameqrant seg uqrab-is.
- Ur ttaggad a mmi. Twalaḍ tawlaft agi. Wag-i d baba-k, wagi d
nekki, wagi d ameddakel nneɣ. Ass mi yemmut itt-id-ddmeɣ seg
yiciwi-s. Baba-k a mmi d argaz ! Walaɣ-k-id ẓriɣ d mmi-s n Akli. D
udem n Akli ur teǧǧiḍ tiqqit seg-s. Ihi tura awi-tt melmi t-tejjmem
muqlem-tt, ma d nekk-i ad uɣaleɣ ar wansi id-kkiɣ. Cbu baba-k
tudert d talafsa ! Yemmeɣ ar yiciwi-s yefka yas idrimen.
- Awi-ten ar uxxam a mmi, efk-iten i yemma-k.
Yeffeɣ-d seg texxamt nni ur yefṛiz abrid. Yettu aɣrum nni ara dyawi. Qqimen akken wawalen n umɣar nni remgen deg
yimeẓẓuɣen-is. Seg wass nni ar ass-a ur yeẓri anwa-t. Yetter Weɛli,
yetter yemma-s, ulac win i as d-yerran. Tikwal yeqqar i yiman-is
amer seg yigenni id-yeɣli neɣ… Allen-is deg tewlaft nni, yugel-itt
deg uɣrab zdat-s.
Imir kan yesla i usiwel it-id-yessdduqsen:
- A Feṛṛuǧa !
Yeldi asfaylu, yeẓra Ǧeǧǧiga tbedd zdat txeṛcett n tmazirt.
Tetteqqen amendil-is tettezmumug.

- 30 -

- Acu a Ǧeǧǧiga? i as yenna Meddur iseffeḍ allen-is am win idyekkren seg yiḍes.
- Feṛṛuǧğa deg uxxam ay tella neɣ aniɣer teffeɣ ?
- Deg uxxam i tella. Ma tebɣid ad d-tkecmeḍ ar ɣur-s, neɣ as
iniɣ ad d-teffeɣ ?
Ǧeǧǧiga tettbini-d tumarit ɣef wudem-is, ad yili d kra n yisali
yessumaren id-tewwi. Tbedd ur iban ad teg asurif ad tekcem ar
uxxam, ur iban ad teqqim ad d-teffeɣ Ferruǧa ar ɣur-s. Imir kan
tesla-d Ferruǧa. Ulayɣer as yini Meddur. Teffeɣ-d ar ɣur-s.
- Acu akka a Ǧeǧǧiga? Ayɣer tugiḍ ad d-tkecmeḍ ar uxxam?
Am wakken ur aɣ tessineḍ ara.
- Ad uɣaleɣ ar uxxam ur ttmaḍaleɣ ara yid-m. Rriɣ imensi ad
yeww daymi ɣeṣbeɣ.
- Ihi acu tebɣiḍ ?
- Bɣiɣ kan am in-sekneɣ kra n tɣawsiwin a tent teẓreḍ.
- Acu tent tɣawsiwin agi iyi d-tsekneḍ ? Aha kan ihi. Aql-ikem a
wetma tettfeǧǧiǧed ayen din. Wissen acu kem yessumaren annect
agi ?
Tumarit n Ǧeǧǧiga tegzem as awal. Tban ɣef wudem-is imi deg
wussan agi tessugum ad d-yas baba-s seg Fṛansa i wakken ad yemlil
akked baba-s n yilemẓi d wanwa ara tercel. Am wakken yella deg
wansayen ; ilaq ad meslayen akk ɣef wayen iwulmen. Tameɣra tban
deg unebdu. Imir nni id-ttasen iminigen.
Teddem-ed Ǧeǧǧiga seg yiciwi-s kra yizurar, tilɣatin d kra n
tisaq. Yal mi ara d-teddem taɣawsa ad tezmumeg.
- Tusa-d yiwet n temɣart tessnuz aẓref, bɣiɣ ayi d-tiniḍ anti
tizebgatin iyi wulmen. Ma tebɣiḍ ad tedduḍ yid-i att a kan zdat
tewwurt n uxxam nneɣ. Ma yella ur tettedduḍ ara ad teẓreḍ kan tigi
id-wwiɣ yid-i. Acek-itent, seg At Yanni itent id-tettawi.
- D tidet acek-itent! Ahat ad teččareḍ taxxamt-im d tizebgatin.
Ayɣer id-tusiḍ ar ɣur-i, yemma-m ur tessin ara acu iwulmen ?
- Ala, tid iyi d-tefren yemma ur iyi hwant ara, kemmi meqqar d
tanudda-w, ayen i aɣ iwulmen d nekkenti it-yessnen ugar n
temɣarin.
- Ih. D tidet. Ahat tefren am d tid n temɣarin, i as tenna s teḍsa.
- Ur iyi hwant ara d aya, ur ẓriɣ ma n temɣarin neɣ tlemẓiyin.
- Akken ttwaliɣ lhant akk. Ulac tin zemreɣ ad rreɣ deg tama.
- 31 -

- Tura a tent nẓer yiwet yiwet, syen ini iyi-d anti i yelhan.
Qqummcent ttmuqulent tizebgatin id d-tewwi Ǧeǧǧiga,
ttmuqulent, ttnalent tent s ifassen nsent alami id-ufant kra iwulmen
i tlemẓit, terra-tent deg tama. Tuɣal Ǧeǧǧiga ar uxxam nsen,
tetteddu tettezmumug.
- Akken kan id-tuɣal Feṛṛuǧa ar uxxam, temmuger yemma-s deg
ubrid-is.
- Acu tebɣa Ǧeǧǧiga ?
- Tewwi-d kra n tzebgatin n uẓref i wakken as d-ferneɣ tid i as
iwulmen.
- Ansi itent id-tewwi ?
- D yiwet temɣart itent id-yewwin.
- Anda tella temɣart agi ?
- Deg uxxam nsen.
- Ad awḍeɣ ad ẓreɣ amer ad afeɣ taɣawsa am tt-id-awiɣ i kemmi,
ɣur-i daɣen yiwen uzrar yerreẓ bɣiɣ as t-awiɣ ayi t-id-tṣeggem. Aṭas
aya ssugumeɣ-tt ad d-tas.
- Ǧeǧǧiga tumar mačči d kra, mi ara tawḍeḍ a tt-teẓreḍ.
- Ma yella yeldi yas Rebbi tiwwura, ad d-yas baba-s ad tercel, ad
teg axxam am nettat am medden.
- Dɣa d annect-agi i nebɣa akk, tigellilt tettɣiḍi iyi mi ara tttwaliɣ akka tettargu, ur beqquɣ ara as inniɣ tidet, ttagadeɣ a ttsnuɣniɣ.
- Ala a yelli, anef as ad targu ɣef yiman-is, meqqar ad tessirem.
D yir-it win igezzmen asirem. Yiwen ur yeẓri acu ara d-yetteddun,
ahat d tidett ad d-yuɣal baba-s, ad tettu akk ansi id-tekka.
- Ayagi d Rebbi kan it-yeẓran a yemma. Nekkni neččur kan d
awal, wanag kra din yefra. Ulac ayen yellan deg tudert yecbek
yeqqim akken ur yefri ara.
- Iferru a yelli. Xas s yir tifrat ad yefru.
- D tidet a yemma. Ɣṣeb ihi ahat a tt-tafeḍ.
Tekcem Faḍma ar texxamt-is, teddem-d azrar-is yerrẓen, terra-t
deg umendil, teffeɣ. Tetteddu tesremtuy ɣef urcal n Ǧeǧǧiga. Ur
tebɣi ara a tt-twali deg yir tagnit, tessaram s kra yellan deg wul-is ad
d-yuɣal baba-s.
Arcal ar teqcicin d tarewla seg uɣben, d asirem ameqran. Maca
tikkwal mačči akken ara tebɣuḍ ara tafeḍ. Taluft, tanuɣnit d arraw n
- 32 -

uɣben, aneggaru agi d anarag n umdan. D amwanes amezgi am
yitbir anda yebɣu yufeg, ad d-yuɣal ar tecṛaft nni taqburt, ar
umedlus-is ger yiẓeḍwan n tisist akk d tiqqit. Ur yettanef ara uɣben,
yennum amdan, amdan yugi-t. Yezga d amennuɣ yid-s. Amer yufa
umdan yal mi ara yebdu uɣben ad yefru s tin yelhan, yal mi ara
yebdu waṭṭan ad yejji umuḍin. Tudert temga asaḍuf nniḍen.
Tiqcicin timesdurar lemdent kan tilqi akked tazzla ur nessuffuɣ.
Tebra-yasent tudert am uẓru seg ucṛuf, ur ẓrant anda ara d-zgent.
Taqcict tezga d taẓẓayant ɣef twacult, werǧin yettnadi ula yiwen acu
tt-yuɣen neɣ acu tessaram.Tezga tettaker tamuɣli ar yiwen seg
yilemẓiyen i as yeččuren allen. Tezga tettgani amesbrid agi ur tessin
ara mi ara t-id-temlil deg ubrid n tala. Ad tebru i wallen-is zdat-s,
ad tuɣal d tazeggaɣt mi ara t-tzul. Tessaram d netta ara yuɣalen ahat
d argaz-is umi ara tefk tayri, aqadeṛ d waṭas n tarwa.
Zik nni win yemgan aṭas n warrac, d netta ara irefden aqeṛṛuy-is
ugar n medden akk. Mi ara yili yezmer ad ibedd fell-asen asen
yemmal acu ara xedmen, melmi yewser d nitni ara t-irefden. As
fken afus deg wayen akk yellan : ad kerzen tiferkiwin, ad cerwen
azemmur, ad kksen tajlibt,... Taneggarut maḍi ad mmagren acengu
imi zik nni mi ara yennaɣ yiwen seg twacult ad tennaɣ akk twacult
yid-s. Win yemgan aṭas n warrac ur yettagad ara. Llan wid ara
iẓedmen. Ma d win yemgan aṭas n teqcicin, yiwen ur t-yettmuqul
akken iwulem. Ula d netta yetteddu aqeṛṛuy-is ger iḍarren-is.
Seg zik nni akka. Tiqcicin ala i uqdac deg uxxam, anqac n
tmizar d ulqaḍ n uzemmur umi tent ttaken. Akka i d tudert n
tmeṭṭut tamesdrart, rran-tt ddaw uḍar alami ur tezmir ad terfed
timmi-s ger medden neɣ a tt-id-yali wawal. Mi ara tili d tanburt
tban deg uxxam n yimawlan-is i tella, ddaw tecḍaḍt n baba-s akked
yemma-s, tilufa n yimir nni tetteqqen allen-is fell asent xas ma yella
d tiẓẓayanin alami sseknayent tuyat. Tessaram ass mi ara tercel ahat
ad taf asgunfu d talwit. Skud d tanburt i tella d ayen bɣan imawlan
ara yilin, d win bɣan imawlan ara yilin d argaz-is. Ur tessin ara ad
tagi ayen umi ur tezmir ara. Tessen ad tqader, tessen ad tessusem,
tessen ad tinni “ih”.
Akken d tameẓyant ara tebdu treffed taẓẓayin umi ur tezmir ara.
Mi ara timɣur, ad taweḍ tizi n urcal, akken ara imɣurent tlufa-s ugar
; as rren azaglu nniḍen yugar amezwaru s waṭas. Ulac taluft ara tt- 33 -

izeglen. Tarrawt mi yebda yiwen yetteddu ɣef tqejjirin, ata-n gma-s
deg tattalt, yetteṭṭeḍ. Ad tili weṛεad tekkes tuṭṭḍa i umezwaru, mi
ara d-ilal wayeḍ i wakken ad yennaɣ yid-s. Anwa ara yeṭṭḍen d
amezwaru ? Anwa ara yeqqimen deg iciwi n yemma-s ? Din ar ad
d-lalent tismin ger-asen, u wissen ma tent ttun ass mi ara imɣuren
neɣ ad uɣalen d icenga.
Azagur yezga yebbub, yezga s tkumma, aqeṛṛuy daɣen. Melmi
tersa tezdemt n yisɣaren, ad yuɣal ucmux neɣ d ayen nniḍen. Ula d
nitni ad nnaɣen amur nsen ! Tameṭṭut, xas ma ttafen-tt deg tizi n
tmara, deg yir tagnit, azal-is yezga yeɣli. Kra din yegdel fell-as, ur as
fkan ara azal-is d amdan, rran-tt deg tama am taklit n tmacahut :
telha kan i yir ussan d tilqi!
Ǧeǧǧiga tettgani kan melmi ad d-yaweḍ wass nni deg ara d-yas
baba-s; ad twali imi aṭas ayagi ur d-yusi ara, u ad iheyyi i tmeɣra n
urcal-is. Akka deg tmurt ulac win ara yilin nnig wayen ilaqen.
Iminigen mi ara ffɣen ar tmurt nniḍen, ad ilin akken bɣan, mi ara
d-kecmen ar taddart ad uɣalen akken llan zik nsen. Ur zmiren ara
ad rewlen ɣef wayen iten yeggunin. Win ara irewlen neɣ ad
yemgared fella-sen a t-yeḍfer uḍad am uccen neɣ ad yuɣal d awal ar
medden, u ad yeffeɣ seg ugraw n taddart. Xas ma yella bdan
ttbeddilen, maca cwiṭ cwiṭ kan. Ur ilaq ara ad alin ar tqacuct s
uɣṣab, ma ulac ad d-afen iman nsen anda ur ilaq ara.
Deg taddart, wid yeṭṭfen deg wansayen n yimezwura, alama
yessiweḍ mmi-t-sen i urcal, as nadin taqcict xas ur tt-yessin ara
maḍi. D ibabaten i terza taluft. Ma seg wass mi ugten iminigen, ur
qqimen ara am zik nni; llan wid yebɣan ad beddlen abrid imi abrid
id-uɣen ur yeffiɣ ara fella-sen, llan wid terra tmara ad beddlen
akken yid sen : tewweḍ-d tmacint, win ur neddi ara ad yeggani
tayeḍ. D annect agi akk i yessaḍnen imdanen n taddart. Win igan
kra, ilaq ad yeggani awal n medden : ma beddlen ad tbeddleḍ yidsen, ma qqimen aql-ik am nitni.

- 34 -

VI

Ixxamen wa nnig wa : taddart ar ass-a deg-s tizeɣwin tiqburin
akked kra n itemma deg ttarran agicur, asaɣur akk d walim i izgaren
d wakraren. Llant kra n tzeɣwin ur tent zdiɣen ara, grint-d d
tilmawin neɣ ttarran deg sent iɣersiwen nsen. Iberdan akk yeddemiten usyax. Xas ulamma isaffen yellan zehhren deg tegrest, tura xas
ini uɣalen d iberdan ula d nitni. Ala iẓra nsen id-yegran. Tizemrin
sdergent akk abrid, mi ara d-yeɣli yiḍ iɣelli-d s tidet. Deg tiẓgi n
taddart aṭas n tzemmrin i sserɣen ifṛansisen. Llant tid gezmen maḍi
xelfent ma d tid yerɣan gran-d iselwan fell-asent am tɣumi
taberkant. Niqal tuɣal tiẓgi d iɣiɣden.
Ass mi yella ufransis, ttawin at taddart ar tiẓgi i wakken ad
gezmen isekla. Kra yekka wass nitni gezzmen, la učči, la tissit.
Tikkwal iten ttawin daɣen yimǧuhad deg yiḍ i wakken ad ɣzen
abrid, syen melmi tefrara ad d-asen yiserdasen n Fransa a ten awin i
wakken a t-reglen. Xellṣen ayen ur ččan ara. Uɣalen am tciret, win
id-yusan ad yurar yis-sen. Akked yimǧuhad tteddun s tumarit imi
iswi nsen yiwen, u d atmaten nsen, ma yella d ifransisen s tmara
akk tigdi.
Zik nni, at taddart drus win yettasen ar tiẓgi. Ttɣiman kan deg
taddart ger yixxamen neɣ deg tmizar nsen. Ttganin mi ara d-yenqer
yiṭij ad d-ffɣen am ibeṛṛiqen ad ssumren. Tiẓgi zik nni ala win
yellan d abɣas ara tt-ikecmen. Ulac urar deg-s. Win ar a ṭṭfen
wuccanen din a t-gezren. Ass mi llan deg-s iɣersiwen, inegmaren s
tergigit itt-keččmen. Ma d tura bdan keffun wussan-is, tebda
tneccew cwiṭ cwiṭ. Yiwen wass ad tuɣal d ulac maḍi neɣ d agni kan
ur nemga anamek. Afṛansis yessenger akk iɣersiwen yettidiren degs. Yegzem, yesserɣ...
Tura aṭas n imezdaɣ i yeffɣen seg taddart. Ayen id-ttakent
tmizar nsen mačči d ayen ara ten yessidren daymi kkren ad nadin
aɣrum anda nniḍen. Wid id-yeǧǧan akal d uzemmur nsen i wid ad
d-yelhin deg-s, ttḍillin-d sya ar da i wakken ad awin amur nsen, ma
- 35 -

d wiyiḍ unfen as kan akka ; akal yegri-d isukan, azemmur ma ur
telqiḍen ara yiqṛaṛ ad yeqqim alama yečča-t uzeṛzuṛ. Tikkwal
ttawḍen-d seg tuddar nniḍen gellun ula s uzemmur n imezdaɣ n
taddart.
Tuget seg wid yeqqimen deg taddart, d wid ur nufi ara abrid i
trewla. Wid yufan abrid akk rewlen. Wa yuder ar uzaɣar, wa yerra
ar Lezzayer, wa yessali axxam ɣef ubrid. Irgazen amur ameqran
unagen ar Fransa. Wid id-yeqqimen d wid yufan axeddim neɣ wid
yugin ad inigen ; ttaggaden uzzu n yinig, smenyafen ad ilin deg
taddart ger warraw nsen.
Win isennden deg yiḍ i wakken ad yeṭṭes, yella wayen it-iceɣben,
yella wayen yessaram i uzekka nni. Iḍ nni ur t-id-yettas ara yiḍes.
Ad yeẓẓel deg usu, kra ara yekk yiḍ ad yili yettetter iman-is. Ad
yessezri iḍ akk d tuttya. Aɣilif nni n uzal akk a t-id-yawi d inebgi ar
wusu-s, ad yesnezgim amek ara iqazem ass amaynut, amek ara t-idyaf wass nni.
Yal amdan yettmagar s wayen i as tefka tmussni-s akk d wallalen
yellan ger yifassen-is. Deg uzal ad yili yelhi deg twuri, melmi idyeɣli yiḍ, ad yekcem ar wusu, din ad yettnaɣ d yiman-is alama
yewwi-t yiḍes s tmara. Dɣa din ad yerzu ar umaḍal nniḍen. Amaḍal
n tirga ; ayen yellan deg tidet a t-yettu, ad yaf ala yir tirga d uhawec.
Ad yekcem tamurt ad yeffeɣ tayeḍ. D iḍ nni deg iɣill ad yesgunfu,
dɣa din ara yaf ayen ur yebɣi ara, din ara yaf ayen ɣef ireggel mi ara
yili yuki.
S umatu akk medden yella wayen iten iceɣben. Amdan ad
yettwali d akken ayen yesnezgim yezmer ad d-yaf yis-s tifrat i
uɣben-is. Ar ɣur-s ulac win izemren ad d-yaf tifrat nnig-s. Deg
tuget tḍerru akken nniḍen : tissirt teẓẓad, awren ulac ! Ad yaf imanis yettruẓ aqeṛṛuy-is s usnezgem, ma d tifrat neɣ abeddel ulac.
Imesdurar, ayen iten iceɣben aṭas d aɣrum ; tura medden akk
ufan-t, xas s tmara it-id-ssassayen. Win ur nečči ara seg ulameɣ
xerṣum yečča tiremt tazedgant. Tura medden akk ččan amerɣan,
ttnadin ayen nniḍen. Tallit nni deg llan ttetten abquq, agersal akked
yimɣan nniḍen tura tezri. Wid id-yekkren tura bɣan ayen yugaren
aya. Llan wid yettmuqulen ar yimal, ad sellken iqeṛṛay nsen, ad
rnun wid n warraw nsen d warraw n warraw nsen. Mačči am wat
zik nni, arraw nsen am mi ara ẓẓun aseklu, ilaq ad ččen seg-s, ilaq
- 36 -

ad ɣellten. Wigi n tura ala ; win id-ilulen as gen tifertin ad yafeg,
win id-lulen ad d-yaf ɣef wacu ara isenned.
Imɣaren d temɣarin acemma ur t-gzan deg wayen yesshewwlen
ilemẓiyen d wayen akk ssaramen. Imɣaren ttɣiman kan ɣef udur n
teqhwat n taddart s ibernyas nsen imellalen akk d iqeṛṛay nsen
icibanen i ttɣummun s tcucay. Gran-d deg tama i yiman nsen, deg
tjeɣlalt nsen deg ttwalin akk tiɣawsiwin akken bɣan, u ssefruyentent akken bɣan. Deg tama kan ttmuqulen am wakken ayen iḍerrun
ur asen yehwi ara. Tuget deg-sen d imuḍan. Llan wid yeṭṭfen
aṭṭanen seg wayen akk uzzlen ass mi llan d ilemẓiyen, seg wakken
ulac isufar zik nni, u llan wid id-yewwin aṭṭanen seg Fṛansa.
Xas akud yezri, maca nitni qqimen snezgimen am zik nsen, ayen
ara d-yettnulfuyen d nitni i d icenga-s imezwura. Snezgimen kan
zdat sen, tamuɣli nsen ger yiḍarren nsen. Ttwalin azekka nni kan
acu ara d-awin i twaculin nsen am yigḍaḍ deg umedlus, ldin
iqumam ssugumen. Timɣarin llant tid iḍefren kan ayen ara d-inin
yimɣaren, ayen ara bɣun kan ara yilin, nitenti ssnen-t kan ad ḍefrent
d aya, llant tiyiḍ ala, imɣaren nni ttaɣen kan awal nsent, ladɣa deg
wayen yerzan axxam imi d tiɣawsiswin ur ssinen ara akken iwulem.
Aṭas n wid yettazzalen iḍ d wass, aṭas n wid yettheyyin i uzekka.
Wigi ttessun uqbel ad naddmen ; xeddmen seg temẓi i tewser,
ttruẓen iqeṛṛay nsen nezzeh. Aṭṭan d uɣilif ur llan ara deg kra n
yimdanen kan neɣ deg kra n taddart kan ; kra din yettbini ɣef
wudemawen ama n yimeẓyanen ama n yimeqranen, ama n taddart
agi neɣ n taddart nniḍen.
Faḍma akk Meddur tteẓẓun aẓalim deg tferka nsen seg tama,
Dehbuca akked yelli-s Ǧeǧǧiga seg tama nniḍen. Yella ger-asen
wasif deg id-mɣint tselnin akked tulmutin.
- A Faḍma!
- Acu a Dehbuca ?
- Att-a tignewt tbeddel ma yella yeṭṭef-aɣ ugeffur dag-i ad
naweḍ ar uxxam am yicicwen.
- Wwteɣ aqeṛṛuy-iw zdat i, ur as rriɣ ara tamawt.
- Ur ilaq ara ad nmaḍel, rnu att-a ad d-tettbini ad d-teglu s
yiceṛcuṛen.
- Asigna ad d-yettali seg wat Xelfun, yettbini ad d-yeglu s kra.
Akken qqaren wat zik nni : “ma yekka-d usigna seg At Xelfun, xas
- 37 -

err asɣar ar ukanun, ma yekka-d seg Delles, xas bru i tejlibt ad
teks”.

- D tidett a wetma. Akka i qqaren, ur d-nnan ara alami ẓran
ayen yellan.
- Ur ttmeslayen ara kan akka deg waḍu, ma yella wacu nessen
ass-a d nitni i aɣ t-yesslemden. Mačči am wid n wass-a, ayen idyusan deg yiqeṛṛay a t-id-innin...
Dɣa imir nni kan terfed Faḍma aqeṛṛuy-is, teẓra Σemṛan akk d
tmeṭṭut-is tteddun-d ad uɣalen ar uxxam.
- At a maḍi dda Ɛemṛan itteddu-d akk d Ḥlima ad rren ar
uxxam. Ugaden a ten yeṭṭef ugeffur.
Yewweḍ-d Σemṛan akk d tmeṭṭut-is Ḥlima ar ɣur-sen, mi t-teẓra
Faḍma tessers tameqqunt n uẓalim, teffeɣ-d ar ubrid n uḍar.
Tessuden iqeṛṛay nsen. Syen yuli-d Meddur, cwiṭ kan terna-d
Dehbuca akked Ǧeǧǧiga.
- Amek tettillim a dda Σemṛan ? i as tenna Faḍma.
- Aql aɣ am nekkni am medden, i kunwi ?
- Am nekkni am kunwi. Ayen yellan ad d-yettbini ɣef udmawen
nneɣ.
- Ur tugadem ara ageffur.
- Dɣa ɣef annect agi i nella nettmeslay nekki akked Dehbuca.
- Ilaq ad trewlem, ma ulac terwi.
Σemṛan ur imuḍel ara yid-sen, yewwi abrid-is. Nitni rnan kan
cwiṭ, yebda-d ugeffur ad d-yesmiqqi, dɣa rewlen-d akk. Ayen idyegran n uẓalim ad d-uɣalen a t-ẓẓun ass nniḍen.

- 38 -

VII

Deg wussan agi n tegrest, zik id-iɣelli yiḍ. Itri amezwaru aṭas
aya seg mi id-yeflali deg yigenni. Ayyur yebra-d i tziri-s. Uḍan am
wagi drus-iten deg tegrest. Ttillin wuḍan d iberkanen alami ula d
acemma ur d-yettbini ara. Ulac win ur yeṭṭif ara xerṣum yiwen yiḍ
aberkan deg ubrid ; iḍ deg kersen waman deg umdun, akni deg
tfekka. Uḍan n tegrest ssagaden, tallaẓit-is d taneqqayt, ur as
zmirent ara tmucuha ar ukanun, ur tt-trennu tiremt tasemmaḍt.
Taɣellust n taddart teẓɣel d ayen kan. Σemṛan, bab n tɣellust,
u d ixef n ugraw n taddart, yeqqim kan imi medden wid yellan deg
tɣellust-is nessren yiwen yiwen. Σemṛan d yiwen yettrin ameslay,
yal taɣawsa yessekcam iman-is deg-s. D asdad am usɣar, udem-is d
aras, allen-is d tiberkanin, azaw-is d aberkan, icab cwiṭ deg uqeṛṛuy
akk d tamart.
Yeqqim-d Meqran d sin yimeddukal-is, Ferhat akk d Sliman.
Sin agi d imeddukal-is seg wass mi llan d iqṛaṛ. D arrac n taddart-is,
u yemyezga-d yid sen akken iwulem.
- A dda Σemṛan!
- Acu a Meqran?
- Iyya-d ad teqqimeḍ cwiṭ yid neɣ, yal mi ara d-nas nettaf-ikid tesfedwiceḍ.
- Aql i-n tura ad n-aseɣ.
Yewweḍ Σemṛan, imekken-as Meqran akersi i wakken ad yesgunfu.
Yeqqim udem ar wudem akk d Meqran.
- Acu tebɣiḍ a Meqran?
- Ur bɣiɣ ara kra n tɣawsa, bɣiɣ kan ad ẓreɣ amek tettiliḍ d
wamek tteddunt tɣawsiwin-ik.
- Acu n tɣawsiwin?
- Tudert-ik...
- Tudert-iw tessneḍ-tt, acu ara k-inniɣ fell-as? Ahat yella
wacu tessneḍ ɣef tudert-iw, nekki ur t-ssineɣ ara!
- 39 -

Yella wayagi ; yiwen yessen tiɣawsiwin ɣef tudert n wayeḍ,
winna s timmad-is ur tent yessin ara?
- Yella wayagi!
- Amek akka, dɣa seg wul-ik ad d-teqqareḍ ay agi?!
- Seg wul-iw, ih!
- Dɣa ini-yi-d amek akka?
- Ameslub yeẓra d akken yesleb?
- Tuget n imeslab ur ẓrin ara.
- Nekkni mi ara ten nẓer nettfiqi-asen d akken selben.
- Kečči ur teslibeḍ ara, ihi teẓriḍ acu yellan deg tudert-ik.
- Nniɣ ak ur ẓriɣ ara! Ahat am umslub ttɣilliɣ ur slibeɣ ara,
ma d nekki... ay as yenna Σemṛan yettwehhi ar uqeṛṛuy-is
am wakken yeffeɣ seg-s kra.
- Nniɣ ak-d amek tettiliḍ, tewwiḍ iyi-d akk annect agi n
umeslay. Ur ak zmireɣ ara
dda Σemṛan!
- Ayaagi i ak d-nniɣ a mmi ɣur-k ad tɣilleḍ d tuffẓa n wawal!
- D acu-t akk wayagi?
- Zik nni yella yiwen urgaz ulac ɣur-s tarwa (ur as d-yefki ara
Rebbi), ihi seg wakken yugad ad yemmet ur d-yeǧǧi ara
deffir-s, yeffeɣ seg taddart-is akk tmeṭṭut-is i wakken ad
yezdeɣ anda ur t-ssinen ara. Yewwi-d yiwen uqṛuṛ d agujil
yerra-t d mmi-s, yettidir yid-s. Alami iteddu uqṛuṛ nni
yuɣal-d akk d twacult-is ar taddart-is, yenna i wat taddart-is
d akken yefka iyi-d Rebbi aqrur, u yeẓẓemlal ad yeg
tameɣra. Deg taddart ulac win umi yenna tidet anagar
yiwen d ameddakel-is imi yugad ad mmeslayen fell-as yir
awal. Ihi iga tameɣra, tumar akk taddart... Ass mi yeɣli d
amɣar, aqrur nni yewweḍ d argaz, ulac win i as yennan tidet
ɣef imawlan-is. Yiwen wass yeɣli d amuḍin, ameddakel-is
yugad ad yemmet ur as yenni ara tidet i urgaz nni yerra d
mmi-s, yekker yenna yas netta. Argaz nni yugi ad yekcem
way agi deg uqeṛṛuy-is, yekker yetter yemma-s, dɣa tenna
yas-d tidet s tigdi akk d tmara imi tugad ad yerfu fell-asen.
Seg wass nni i yeẓra d akken wid nni mačči d imawlan-is n
tidet.
-

- 40 -

Ay agi d-tenniḍ yezmer ad yeḍru d yimdanen akk. Ihi nekki
ur ẓriɣ ara kra ɣef tudert-ik i wakken ak-t-id-iniɣ, ini iyi-d
kan tura amek tettilliḍ.
- Amek ttiliɣ? Ma d ay agi kan, ak iniɣ ma ur ṭṭreḍqent ara,
aql i gerrzeɣ ma yella ṭṭṭreḍqent ulac tifrat.
- Ansi ay ak d-kkiɣ d asawen.
- Tagi d tadyant teḍra zik nni a mmi.
- Aha kan ihi ales iyi-tt-id imi nestufa.
- Yella yiwen yerzef ar iḍulan-is, yewweḍ yeqqim ar yiri n
ukanun deg ugerbi akk d uḍeggal-is, yeẓra timellalin deg
tqecwalt yeqlules, dɣa yeffeɣ uḍeggal-is ad d-yawi aman seg
tzeqqa i wakken ad qqimen ad qeṣṣren, yeddem snat yerratent deg ukanun, timellalin bdant ttewwant aḍeggal yuɣal-d,
yenna yas: “ amek tettilliḍ a mmi?” winna yenna yas: “ma
ur ṭṭreḍqent ara!”.
- Ihi ssarameɣ ur ṭṭerḍiqent ara a dda Σemṛan.
- A tarwa tura yeɣli-d yiḍ, nekki ttagadeɣ amer kra iyi dyetteffɣen deg ubrid. I asen yenna Σemṛan s uzmumeg.
Ilemẓiyen yellan yid-s ɣlin ɣef teḍsa imi ẓran d aqeṣṣer kan.
- Kečči ẓriɣ acu umi tzemreḍ. Tzemreḍ ad tekkseḍ aqeṛṛuy i
umdan, u as t-terreḍ, I as yenna Meqran.
- Zemreɣ i wannect-a? Ahat d kečči i as izemren, i as yerra s
teḍsa.
- Af wakken ik-ssneɣ tzemreḍ i wayen yugaren aya, i as
yenna Sliman.
- Ttagadeɣ a tarwa. Nekki am wakken i as yenna yiwen : “xas
-

iɣallen annect n tgejda, acu ara d-gen ma telɣuɣi tasa!”

-

Ini akka i wid ur k-nessin ara a dda Σemṛan, i as yenna
Ferhat.
Ihi imi d-newwi awal ɣef tigdi, a ken alseɣ yiwet n tedyant,
acu kan ur aken d-qqareɣ ara isem n win umi teḍra.
Aha kan ulac aɣilif, Ay as yenna Meqran.
Tella yiwet n tmeṭṭut tercel akk d yiwen d amaggad, yiwen
wass deg yiḍ tesla i waydi nsen yesseglaf, tekker teǧuǧǧ-it,
tenna yas: “kker ay argaz, ahat usan-d imakaren.” Argaz

- 41 -

amcum teṭṭef-it tawla, yenna yas : “kker kemm-i, ahat d
timakarin.”
Akken llan din ɣlin d taḍsa alami ulac win ara d-yeṭṭfen wayeḍ.
- A dda Σemṛan ttxil-k rnu yaɣ-d yiwet n temseḍsayt, i as
yenna Ferhat.
- Tagi id-ulseɣ teḍra s tidet! A ken d-rnuɣ yiwet, acu kan d
taneggrut. Tura ad tekkrem...
- Ad nekker, ur ttagad ara a dda Σemṛan, Ay as yenna
Sliman.
- Yella yiwen zik nni, yufa-d deg taddart ssuffɣen-d tabaqit n
seksu, syen yenna yasen: “ǧǧem iyi a tt-ččeɣ ma yella ur ttkfiɣ ara a ken d-awiɣ snat.” Wid yellan din qeblen, yečča-tt
akk. Syen yewwi abrid ar uxxam. Yiwen umɣar ger asen
yugad amer ad yaḍen, yenna yasen: “iyam ad naweḍ ar ɣurs, ugadeɣ amer s tmara kan itt-yekfa. Iḍ agi ahat ad
yemmet.”
Kkren wwḍen ar ɣur-s, wwten deg tewwurt, teffeɣ-d
tmeṭṭut-is, nnan a s: “amek yella urgaz-im?” Tenna yasen:
“ur tufiḍ acu yellan at a yettett imensi.” Uɣalen reẓmen akk
imawen nsen.
Ilemẓiyen yellan yid-s alami ttegririben seg teḍsa. Kkren-d ad ffɣen
ula d nitni imi walan d akken Σemṛan d nitni ay yessugum. Ferhat
yesseɣli akersi mi d-yekker seg teḍsa.
-

Aql aɣ ad neffeɣ a dda Σemṛan, ahat ad yilli tɣeṣbeḍ? Amer
ad neqqim yid-k aɣ tenɣeḍ s teḍsa, i as yenna Meqran.
D tidett a tarwa, tura d iḍ...iḍ agi n tguni! Ad naweḍ ar
uxxam ad nečččč imensi, ad nessers iɣesan nneɣ.

Meqran iteddu akk d yimeddukal-is, yettmuqul ar igenni ;
itran ttfeǧǧiǧen ayen din. Seg wakken Ferhat akk d Sliman
xeddmen deg uneẓruf, d tignatin kan deg it-ttemlilin dɣa ass-a kra
yekka wass nitni akkenni imi myejjmen, yella wacu ara myinnin.
Aṭas i kkaten i wakken ad yeddu yid-sen Meqran, maca yettagi imi
yugad ɣef twacult-is. Ass-a kra yekka wass nitni d ameslay ɣef way
- 42 -

agi. Yuɣal ar taggara yeqbel ad yeddu yid-sen imi d aɣrum i as dyessawlen, u yeẓra d akken deg unẓul ad yaf iman-is ugar. Ṭṭfen
abrid ar yexxamen nsen. Deg ubrid axeclaw yettwafraz seg tziri.
Zdat sen iteddu Ɛli Usalem, yettmuqul-d ar deffir Meqran d
yimeddukal-is s yir tamuɣli am tnumi. Seg zik arraw n Usalem
ɣunzan ten wat taddart, seg zik ur ttmeslayen ara yid-sen. Meqran
yerra yas tamawt imi mačči d tikkelt tamezwarut ara t-id-imuqel
akka.
-Wissen acu yettnadi akka uydi agi?! As iyi-d a taluft neɣ a
kem-in-aseɣ!
-Anef as a Meqran! Aydi yeǧǧa-d aydi. Amer as tt-ternuḍ i
wagi... i as yerra Sliman, yettsuḍu ifassen-is seg usemmiḍ.
-Wagi a k-iniɣ kan tidet, yurew-itt-id! Ayen akk iga, anda
yecceḍ ad ixelleṣ! Am bururu! i as yerna Ferḥat yessezleg
icenfiren-is.
-Ma yella wacu yettnadi ; ad ggalleɣ, ad ifeẓ iles-is : yezga
yettmuqul iyi-d s yir tamuɣli am netta am umeddakel nsen
Qasi Waεmer. I asen yenna Meqran s wurrif d uqṛac n
tuɣmest.
Meqran d yimeddukal-is ssusmen, Ɛli Usalem yenser am wuccen
deg tallast. Mi wwḍen ar ubrid anda ara myebḍun, bedden, yezzi
Ferḥat ar Meqran:
-Ihi am akken i ak nniɣ, nekki azekka ad uɣaleɣ, ass mi ara dzziɣ ad tedduḍ. Sya ar ass nni ad iliɣ heyyaɣ-ak-d anda ara
tettnusuḍ...
-Ad ssugmeɣ ar ass nni, xas ma yella ad tm ḍleḍ ulac aɣilif.
-Ur nettmaḍal ara, akken kan ad naweḍ, ad nefru aɣben agi d
amezwaru. Ma yella ilaq ad d-yas yiwen seg neɣ i wakken ad
d-tedduḍ yid-s, ad d-yas! I as yenna Sliman s uzmumeg.
-Ihi a ken iniɣ ar timlilit. Ur ttruẓem ara iqeṛṛay nken aṭas fell
i, ma yella wayen umi tzemrem, ma ulac... nnig tezmert d...
-Ihi akka a Meqran. Ay agi ur t-id-nenna ara alami nezmer!
Msudanen, myebḍan s teḍsa d uzmumeg. Meqran
yessermimez-it usemmiḍ akken ilaq. Iteddu, yettsuḍu ifassen-is.
Yuder deg ubrid ar uxxam s uɣṣab, yewweḍ zdat tewwurt
yesqerbeb, ibedd yessugum melmi as tt-id-ldin. Yesla i tikli n
- 43 -

yiqebqaben dɣa din ifaq d akken d Feṛṛuǧa id-iteddun. Seg wakken
yella usemmiḍ yuyes melmi ad yekcem, yettsuḍu ifassen-is amzun
yebɣa ad yengez. Akken kan id-tewweḍ Feṛṛuǧa ar tewwurt, tbedd
cwiṭ.
-Anwa?
-D Meqran. Aha ɣṣeb ldi tawwurt!
Teldi yas tawwurt yekcem amzun d taẓdemt ay yeẓdem. Yekcem ar
tzeqqa. Ala yemma-s i yeẓra teqqim ar ukanun. deg wakken
tafeyyact nni ssiɣen deg tzeqqa ur tga ara tafat nezzeh, ilaq alama
yeqqim cwiṭ akken ad iẓer anwi i yellan din. Ar ugadir qqimen
Meẓyan, Meddur akked umeddakel-is Muḥ. Mi tetten imensi isell
kan i tɣenǧawin yeččenčunen.
-Azul!
-Qqim a mmi ak-id-tawi Feṛṛuǧğa imensi.
Akken kan yeqqim, yezzi aqeṛṛuy-is ar wanda qqimen Meẓyan,
Meddur d Muḥ.
-Ziɣ d agi ay telliḍ a Muḥ!
-Ddiɣ-d akk d Meddur. Nella neqqim deg tala dɣa yeqqes aɣd kan usemmiḍ nuli-d.
-Mi d-kecmeɣ akka, tɣilleḍ yella wacu feṛzeɣ! Hummeɣ-d
kan. Deg beṛṛa tella tafat ugar n da.
Faḍma tezmumeg mi tesla i Meqran.
-A mmi am nekki nnumeɣ akka, seg mi ara yali wass nekki d
asfedwec dag-i. Zemreɣ ad d-ddmeɣ tiɣawsiwin xas s tuqqna
n wallen. Xas akka tura wesreɣ, tigi zemreɣ asent.
Meddur ula d netta yezzi-d ar yemma-s, yettri aṭas as isel mi ara
tettmeslay. Tettawi-d akk ayen tecfa. Ladɣa nettat tedwes tmektit-is
d ayen kan.
-Tella yiwet temɣart deg Imkeyyeren, tettgalla, akka tura
tsenni tissegnit s tafat am tagi n tfeyyact!
- 44 -

-Tesmektiḍ iyi-d a mmi s yiwet tedyant teḍra zik nni : tella
yiwet temɣart tettidir ala nettat d umɣar-is, seg wakken
wesren xuṣṣen iẓri, ihi yiwen wass tameddit maḍi, yekcem
yiwen ilemẓi ar uxxam nsen. Ilemẓi agi yenɣa-t laẓ akk d
usemmiḍ. Akken yewweḍ, yeknuneḍ deg ubeṛnus-is i
wakken ur t-id-tẓer ara temɣart anwa-t. Tessers as-d imensi
tɣill d amɣar-is...
Meqran ur yeṭṭif ara deg yiman-is, yebda idess, ḍefren-t-id akk wid
yellan yid-s. Tekcem-d Feṛṛuǧa tewwi-d imensi i Meqran tdess ula
d nettat alami qal tesseɣli aḍebsi id-tewwi deg ufus-is. Faḍma
tessugem alami kfan taḍsa.
-Ihi a tarwa, yečča alami yeṛwa, yesseɣfel tamɣart nni yenser.
Terna kan cwiṭ yewweḍ-d umɣar-is. Yeqqim ar yiri n ukanun
ad yeẓẓiẓen, dɣa yessuter as ad d-tawi imensi. Tamɣart
tamcumt ur tufi anda ara terr aqeṛṛuy-is. Teɣli fell-as : nettat
teqqar as teččiḍ, netta yeqqar as ala. Terwi ger-asen.
-Syen akkin a yemma amek tefra? I as yenna Meẓyan, yessaẓ
akersi-s cwiṭ i wakken ad isell ugar.
-Ur tefri ara a mmi. Amɣar yeṭṭef deg awal-is, tamɣart teṭṭef
deg awal-is. D tagi i d taggara.
Muḥ yemmekta-d d akken ilaq ad yader ar uxxam.
Yemmekta-d axiqi n tilawin mi ara yili ur d-kecmen ara warraw
nsent. Yal ass mi ara yeffeɣ tameddit alama tendeṛ-it ɣef yir
iberdan. Yekker, yemmaẓẓed alami ṭṭreḍqen akk yiɣesan-is.
-Ihi, nekki ad adreɣ a Meddur. Azekka ad nemlil daɣen am
tnumi. Yemma ur teẓr- ara d akken d agi i lliɣ.
-Bɣiɣ ak iniɣ rnu cwiṭ, ugadeɣ ahat a k-tettṛagu yemma-k.
Tessneḍ a mmi amek gant tilawin, i as tenna Faḍma mi dtekker seg umḍiq-is.
Yeddukel-d yid-s Meddur alami d tawwurt, yeldi-tt, yewwtat-id usemmiḍ ar wudem am ujenwi. Yergigi, yeɣṣeb ad yuɣal ar
uxxam.
-Ihi ar azekka a Muḥ.

- 45 -

Yemdel Meddur tawwurt, yuɣal ar uxxam. Akken yessers
aḍar amezwaru deg tzeqqa, yeẓra akk tawacult tekker. Yeddem
tafeyyact yersen ɣef ugadir, yeḍfer atmaten-is ar texxamt nsen i
wakken ad ṭṭsen. Faḍma akk d Feṛṛuǧa rzant ula d nitenti taxxamt
nsent.

- 46 -

VIII

Faḍma seg zik-is d aɣben. Mačči d tikkelt neɣ d snat i tuɣ
tiyita. Ula akken tecfa ɣef ayen akk yekkan fell as. Amzun tukel
taqabact. Imeṭṭi, asuɣu, aqedruref... ulac taluft itt-yzeglen. Ass mi
tella d taqrurt ur tedhi ara am nettat am tnuddwin-is, akken d
taleqqaqt i teggujel. Baba-s yemmut deg Tɣerdayt, deg unẓul n
Lezzayer. Ur t-tessin ara maḍi.
Tekker-d akken ulac baba-s. Alami temda cwiṭ tetteddu
akked yemma-s ar uẓekka-s. Tamḍelt-is tezga-d ɣef yiri n ubrid deg
tqeṛṛabt n taddart. Kra n yimesbriden ur ttqadaṛen ara ula d wid
yemmuten, win id-yezrin ad yakel fell-as. Tiblaḍin n yiẓekkwan
uɣalent i yiɣimi. Faḍma mi ara tezri zdat sen tettanez tettṣeggimitent. Tikkwal, tetteffer imeṭṭawen-is mi ara tẓer ay agi iḍerru zdat
wallen-is. Ur tezmir ara ad teẓẓider.
Deg uxxam n urgaz-is Akli, tufa cwiṭ iman-is. Ilewsan ur llin
ara, snat tlewsatin ay ɣur-s, tufa-tent reclent. Tufa kan tamɣart-is
dɣa gant tayuga : akken i ttqazament yir ussan, akken i ttegriribent
anda ddant. Timizar nsent ulac tin yeqqimen d asuki, tizemmrin
nsent ur tent ttaǧǧant ara i uzeṛzuṛ. Tazmert nsent akk ttakent-tt
deg wayla nsent. Akka ula d ass mi llan zedɣen deg uzaɣar. Deg
useggas deg tlul Feṛṛuǧa id-ulin ar udrar.
Tamɣart-is telha d ayen kan. Tettwali-tt am yemma-s. Akken
i qqedrurfent asmi yemmut Akli. Ladɣa tamɣart-is, ala netta i ɣur-s
d aqcic, yeǧǧa-tt-id deg tallast taberkant deg ur tettwali awzi, deg ur
teẓri anda t-tteddu. Deg useggas nni deg yemmut, tettaweḍ ar
tqeṛṛabt tettɣama ɣef yidis n uẓekka-s, tettmeslay, tettru. Ass mi ilul
Meddur, teslilew ugar n wass mi lulen yimezwura. Xas zrin
iseggasen ur tessaweḍ ara ad tettu akken iwulem.
Akken Meddur d taqeṭṭiḍt, a t-tettel a t-tezzuzun. Seg
wakken yettak anzi ar baba-s ugar n watmaten-is, tettaṭṭaf-it ger
ifassen-is tettezzi ar Faḍma, am teqṛuṛt i tettumar, teqqar as : “
muqel a Faḍma ma mačči d Akli s timmad-is!?” Amzun targit nni
- 47 -

tettargu, asirem nni yellan d awezɣi ad d-yeḍru, ar ɣur-s yeḍra. Ass
mi d-yemda cwiṭ anda tekka a t-tawi yid-s. Ar ɣur-s yugar ayen
yellan deg tudert. Ur teksan ara. Deg ubrid mi ara d-temlil
amesbrid, yetter-itt-id ma d mmi-s n Akli, ur tettkukru ara as terr:
“wagi d Akli s timmad-is!” kra n wayen ara s yessuter as t-id-tawi.
Xas ma qqaren arraw n umdan am iḍudan n ufus, nettat tessifrer
Meddur nnig watmaten-is.
Yekcem Meddur ar tmazirt, idemmer taxercett s uḍar-is.
Ass-a zik id-yuɣal seg ugmar. Aydi-s amellal, iḍfer-it seg deffir,
isellef-as, yessergigi tazerguḍt-is.
Aydi n twacult n Akli, d aydi n ugmar. Yettawi-t Meddur yids yal mi ara yeffeɣ ar tiẓgi. D amellal, d aččaran, yezga yesbedd
timeẓẓuɣin-is. yettaf-it ladɣa deg wussan n udfel mi ara iḍeffer
igerẓaẓ deg tekessert.
Meddur, yettwali aydi nsen am umdan. Ar ɣur-s d yiwen seg
twacult. Ulac ass deg ur t-yessefqad ara amek yella. Tuɣal-as d
tanumi ; yal mi ara yeffeɣ seg uxxam neɣ ad yekcem ar uxxam, ad
imuqel ar txibuqt-is, as yeslef ɣef tqeṛṛuyt-is syen akkin a t-yeǧǧ ad
yeṭṭes.
Ass-a yegla-d yid-s s ugerẓiẓ d amuddur akk d kra n imerga
id d-yeṭṭef deg tcerktin. Iḍall ar tmazirt amer ad yaf yemma-s acku
yal tikkelt deg ur tettaf ara acu ara teqdec deg uxxam ad tader ar
tmazirt ad tessmenṭec. Yekka-tt-id akk s tmuɣli, ulac. Din din
yuɣal. Yekcem ar uxxam iḍall daɣen ar tzeqqa, yessers ayen idyewwi yid-s ɣef ugadir, agerẓiẓ yurez-it, yessekcem-it deg tehrirt,
ma d yemma-s akk d wetma-s Feṛṛuğǧa, ulac-itent.
Seg wass mi yella d aqrur, Meddur yettri agmar am tudert-is.
Yella yesselmad-as gma-s Meqran akked Meẓyan syen akkin ula d
netta yesselmed i yimeddukal-is. Ma yella ulac acu id-yegran a tyexdem deg tmizar neɣ deg uxxam, ad yeddem abeckiḍ, ad yeṭṭef
abrid ar tiẓgi. Tikkwal tteddun aṭas n warrac n taddart yid-s, tikkwal
yetteffeɣ i yiman-is. Ladɣa yetteddu s waṭas akked umeddakel-is
Muḥ.
Yeṛǧa cwiṭ, ulac tin id-iḍallen, la yemma-s la wetmas.Yeddem-d kra n imerga seg ugadir, yebda yessencaw-iten. Mi
yekfa asencew, yerra ar texxamt-is, yerra abeckiḍ ar umḍiq-is.
Yeqqim cwiṭ am win ixaqen seg tsusmi id-yersan deg uxxam.
- 48 -

Yeẓẓel ɣef yiri n wussu-s. Ussu n Meqran akked win n Meẓyan d
ilmawen. Imir nni kan yesla i tikli n yemma-s akked Feṛṛuǧa.
Faḍma tezwar, Feṛṛuǧa teḍfer-itt. Kkant seg ubrid yellan ddaw
uxxam. Ad yili seg yiwen uxxam n taddart id-kkant.
Faḍma tbedd zdat txeṛcett n tmazirt, tettmuqul, syen teldi-tt,
tekcem. Tmuqel akkin d wakka, ar tama n ufella d tama n wadda,
tessers ifassen-is ɣef iceṭṭiḍen tefser deg uckab: “weṛεad kkawen!”
Teffeɣ seg tmazirt temdel taxeṛcett deffir-s. Tzelli tamuɣli mi
d-terfed aqeṛṛuy-is, twala Dehbuca akked yessi-s Zahya d Ğeǧǧiga ;
ssant ilemsar, qqiment i yiṭij zdat tewwurt n uxxam.
-A Dehbu! I as tessawel Faḍma.
Dehbuca tebda tettnadi s tmuɣli ansi d-yekka usiwel. Mlalent
wallen-is d wallen n Faḍma.
-Ziɣ d Faḍma! Ttmuquleɣ ansi id-tessawaleḍ. Amek tellam
akken a wetma?
-Amek tellam kunwi!? Nekkni aql-aɣ akken yebɣa Rebbi.
Ulac acu ibeddlen fell-aɣ.
-Tardast i yellan ger-aɣ, ulac win yeẓẓlen aḍar ad yerzu ar
wayeḍ. Yal yiwen deg neɣ yelha d wayen it-iceɣben.
-A Faḍma, a wetma ur tteffreɣ ara fell-am ; yiwet s yiwet d
aqeddic agi n uxxam, tayeḍ s tayeḍ d win n tmizar, ayen idyernan ɣef waya ur gerrzeɣ ara. Argaz-iw yezga ger wallen-iw.
D ayen teẓriḍ!
-Ay agi d ayen ibanen. Argaz-im d iminig, tessugumeḍ kan
melmi ad d-yewwet deg tewwurt.
-Anwa id-yennan ad d-yewwet deg tewwurt yiwen wass!?
-Ala a Dehbuca! Ayen id-tenniḍ akk qebleɣ-t, ma d awal agi
ala. Werǧin ad qebleɣ anect agi. Ayɣer a wetma tesfilliteḍ ay
agi. Tebɣiḍ ad tuɣaleḍ d amcic yesfilliten ad ddreɣlen
imawlan?
-Amer ad teẓreḍ a wetma acu yettekken fell i; tikkwal ur
tteqqneɣ ara wallen-iw deg yiḍ alama lqiɣ. Mi d-yusa yiḍes,
ala yir tirga. Nekki ala netta i ssarameɣ ad d-yuɣal. Ma d
Rebbi yeẓra.
-Am wass-a ad tefrarari fell-am, ad tefrari akk ɣef medden. D
aya agi akk i aɣ yerẓan d timeẓyanin, nuɣal d timɣarin ur
nessaweḍ. Tura kemmi ldi ifassen-im ar igenni, yella Rebbi,
- 49 -




Télécharger le fichier (PDF)

Teffeɣ Fransa.pdf (PDF, 4.2 Mo)

Télécharger
Formats alternatifs: ZIP







Documents similaires


teffe fransa
agellid akked yineffuten yelhan
agu
079 rosa chelli
mqidec
12 pdfsam journ al scolrevue effervescence version 2

Sur le même sujet..