Tamazight Tura 8 9 .pdf



Nom original: Tamazight Tura_8-9.pdfAuteur: Perso

Ce document au format PDF 1.6 a été généré par Microsoft® Office Word 2007, et a été envoyé sur fichier-pdf.fr le 01/09/2014 à 15:58, depuis l'adresse IP 41.103.x.x. La présente page de téléchargement du fichier a été vue 5637 fois.
Taille du document: 3.6 Mo (202 pages).
Confidentialité: fichier public

Aperçu du document


TAMAZIƔT TURA

Tasɣunt s Tmaziɣt n Usqamu Unnig n Timmuzɣa

IMḌEBBER N TESƔUNT
Youcef MERAHI
AGRAW N TIRA
Hamid BILEK
Abdenour HADJ-SAID
Said CHEMAKH
Samir ARKAM
Ramdane ABDENBI
URAN DEG WUṬṬUN-AGI :

Abdellah HAMANE, Boudjema AZIRI, Boussad KEBIR,
Igli n Tlelli, Tahar BOUKHENOUFA, Ramdane ABDENBI,
Hamid BILEK, Seddik IAZZOUGUENE, Abdelkader ABDI,
Akli KEBAILI, Koussaila ALIK, Malek HOUD, Nabila SADI,
Sadaq BENDALI, Inelmaden n tmaziɣt (TO), Smail ABDENBI,
Habib-Allah MANSOURI, Oualid SAHLI, Youcef MERAHI,
Mohamed KORCHI, Zira, Ahcene MARICHE, Farida LOUNES.

19, avenue Mustapha El-Ouali
(ex Debussy) Alger
Tél : 021-64-29-10/11 - Fax : 021-63-59-06
B.P. 400, 16070, El Mouradia - Alger

TAGDUDA TAZZAYRIT TAMAGDAYT TAƔERFANT
TASELWIT N TEGDUDA
ASQAMU UNNIG N TIMMUZƔA

TAMAZIƔT

TURA

tamazi$t tura

Tasɣunt s Tmaziɣt n Usqamu Unnig n Timmuzɣa
Tamaziɣt tura Un 8-9 / yebrir-ɣuct 2011

ISSN : 1112-9417
Dépôt légal : 4832-2008

Tamaziɣt, imira, teḥwaǧ kan
ad tt-naru ad tt-nɣer.

AGBUR
TAJMILT

Tafsut Imaziɣen

Abdellah HAMANE

13

Boudjema AZIRI

16

Boussad KEBIR

19

Igli n Tlelli

31

Tahar BOUKHENOUFA

35

Ramdane ABDENBI

42

Hamid BILEK

49

Seddik IAZZOUGUENE

52

Abdelkader ABDI

58

Akli KEBAILI

63

Koussaila ALIK

64

Malek HOUD

66

Tifeṭṭiwejt n 80...

Awal ɣef tefsut n yimaziɣen
Tafsut-nneɣ

Tafsut ass s wa ss

Ussan-nni deg tesdawit

Tamaziɣt ass-a, tajmilt i yimezwura
Tadiwennit tasugnant akked Lmulud At Mɛemmer
Ddqiqa n tsusmi

Suddes tamurt-ik
At yigenni
Iles

TAZRAWT

Aselmed n Tmaziɣt di Tizi Uzzu : anda yewweḍ, ass-a !
Sadaq BENDALI

73

Nabila SADI

89

Tamsalt n tmagit deg wungal yettwarun s teqbaylit

Arranku - 6

TUKKIST

Paulo COELHO - Tasuqelt : Inelmaden n tmaziɣt (TO)

109

Georges ORWELL - Tasuqelt : Habib-Allah MANSOURI

117

Leɛzib n yiɣersiwen - 6

Ddayxa - 2

TULLIST

Malek HOUD

127

Smail ABDENBI

138

Oualid SAHLI

142

Abrid n talwit

D acu i teswa ddunit

Abrid n ubrid-iw
Tilelli

TAMEDYAZT

Youcef MERAHI - Tasuqelt : Abdenour ABDESSELAM

149

Mohamed KORCHI

153

TADIWENNIT

Ali Amran, Ccna n teqbaylit, mazal lxir ɣer zdat - 2
Zira

161

TIGEMMI

Leǧruḥ qqazen ḥellun, yir lehdur qqazen rennun
Ahcene MARICHE

171

Farida LOUNES

173

Inzan s tedyanin

TAẒURI

Urigami, taẓuri n uḍeffes n lkaɣeḍ
Smail ABDENBI

181

TIGEJDIT
Azul ay imeddukal n tesɣunt Tamaziɣt-Tura
I tikkelt nniḍen akken i wen-nṛeggem, atan
nessaweḍ i wakken ad d-nheggi tasɣunt Tamaziɣt Tura
yellan gar yifassen-nwen. Nessaram ad tili di lebɣinwen.
Nessemlal di tesɣunt n tikkelt-a sin wuṭṭunen :
uṭṭun wis ṭam akked wis ṭza.
Wis ṭam ilaqen ad d-yeffeɣ di yebrir yezrin imi ayen
yettwarun deg-s d tajmilt i tefsut n 80 akked
yimeɣnasen n tmaziɣt.
Ur aɣ-tettunefk ara tegnit i wakken ad t-idnessufeɣ di lawan. Ayen i ɣ-yeǧǧan ad t-nesdukel
akked wuṭṭun wis ṭam. Nessaram ad tfehmem taswiɛt.
Akken yebɣu yili lḥal, d tilin akked tudert n Tamaziɣt
Tura i d iswi-nneɣ amezwaru : d tasɣunt i la yettnernin
seg uṭṭun ɣar wayeḍ.
Aḥric amezwaru di tesɣunt-a d tajmilt i
yimeɣnasen n tefsut n yimaziɣen, i tgejda n tutlayt
akked yidles amaziɣ, i wid inuḍḥen, i wid
yettwaḥebsen, i wid yemmuten i wakken ad d-naweḍ
ɣer tizi n wass-a.

Tajmilt i nezmer ad asen-tt-nerr d leqdic i tmaziɣt s
tmaziɣt, d akemmel deg ubrid i d-neǧren, d asiweḍ n
yizen-nsen i tsuta i d-yemmalen.
Aḥric wis sin, am wakken tuɣem tannumi, d
abumexluḍ deg wayen yerzan tiwsatin yemxallafen n
tsekla tamaziɣt neɣ tagraɣlant maca tettwaru s tmaziɣt.
Nessaram ad tafem deg-s lfayda ɣas ulamma azuḥ neɣ
cwiṭ.
Akken nennum, yal tikkelt ad d-nger tiɣri i
widen yesɛan kra n yiwellihen, i widen yebɣan ad dsneqden, i widen yesɛan tikta ad aɣ-ten-id-ssiwḍen s
wallal n Intenet.
Tiɣri nniḍen i widen yettarun, nessaram, ma
ufan lebɣi-nsen di tesɣunt-a, ad aɣ-d-ɛiwnen s tiransen, s tezrawin akked yiḍrisen-nsen i wakken ad
nesseddu tasɣunt-agi afus deg ufus, yal uṭṭun ara dyernun ad yif win iɛeddan.
Akka kan i nezmer ad nerr tajmilt i yimezwura.
Tannemirt

TAJMILT

Awal i yimeɣriyen

Nessemlal di tesɣunt n tikkelt-a sin wuṭṭunen :
uṭṭun wis ṭam akked wis ṭza.
Wis ṭam ilaqen ad d-yeffeɣ di yebrir yezrin imi ayen
yettwarun deg-s d tajmilt i
tefsut n 80 akked yimeɣnasen n tmaziɣt.

Tafsut Imaziɣen
Abdellah HAMANE

Ay atma, ay yessetma fell-awen azul i d-yeffɣen seg wul yeḥma.

W

agi d asmekti n 20 yebrir n tefsut Imaziɣen, d ass
ideg d-iban wudem n uɣref deg usuter n tutlaytines, d ass n tzemra n Yillu (laylatu lqedr ). D ass
ideg tezlez Tefriqt Ugafa, ideg rmamzen yiẓekwan n yigeldan
Imaziɣen, widak yeṭṭsen taguni icuban lmut acḥal n leqrun akked
yiseggasen. Amezruy-a, mačči armi d 20 yebrir i d-iban, maca, yella
di tekta n yiɣelnaẓriyen deg useggas 1939, maca, yeqqim d abaḍni,
ur as-gin ara azemz ideg ara t-id-sbanen. Armi d 1980, deg wass
icuban ass-a i yebded uɣref s umata, imezwura d inelmaden, d
isdawiyen, d asirem n tsutwin i la d-yemmalen, d lebɣi n uɣref, d
tudert i tmurt n Lezzayer akked Tmazɣa tameqqrant.
Deg wass-a, yemmameḍ wul n uɣref i d-yezgan di tlemmast
n Tefriqt Ugafa (Lezzayer). Tamurt n Leqbayel, d nettat i d yelli-s
tamenzut n Tmaziɣt, d irgazen n tlemmast i as-igan ilugan n
tjerrumt, taseftit, d nutni i d imnuda i as-igan tira akked waṭas n
yimawalen.
20 yebrir ɣur Tiddukla n lumma, deg wutla, deg yidles, deg
yiles. Isnarafen iḥekmen imiren, fehmen-t meqlubi, yerna d nutni i
yeṭṭfen iɣmisen, rradyu akked tilivizyu, la d-qqaren fell-aneɣ
Tamaziɣt tura – Un 8-9 – H.C.A / yebrir-ɣuct 2011

- 13 -

Tasɣunt s Tmaziɣt n Usqamu Unnig n Timmuzɣa

« Ɛunṣuriya, ɛirqiya, ǧihawiya, tteqsim cceɛb », lḥekkam-agi nekren
lumma-nsen, yessaweḍ-iten usnaref armi nekren iman-nsen acku
ggumman ad fehmen lebɣi n lumma s ubrid n lḥeqq, acku nnumen
ssexdamen iɣil. Deg wass icuban ass-a yekker uɣref di yal tama
yettwakkes umundel i lumma, ssawḍen tabrat n tidet i uɣref,
huccen-t, sduqqsen-t, ssakin-t, ssawḍen awal-nsen i yimaziɣen, di
Merruk, Tunes, Libya, mgal tinawt n leḥkem « Ccexṣiya lɛarabiya el
islamiya », di tazwara Lislam d asɣan, yesdukel aṭas n yiɣerfan ur
yelli d tanekkit, ma d « lɛarabiya » imawlan-is banen, beɛden fellaneɣ 6000 n kilumitr.
20 yebrir d aṛeggem, d zzux, d asemɣer umezruy-nneɣ,
tutlayin tizyiwin n Tmaziɣt ɣas ttwaɣrant, ttwarunt mmutent,
ttwattunt, Tamaziɣt tezga tedder, imir-a i terfed ixef-is deg ubrid n
tudert, simmal d anerni ur tettuɣal ɣer deffir, tikta n usudder
tekcem deg wallaɣ n uɣref, ulaḥedd di ddunit win izemren ad
yekkes tasertit usenfel akked yizerfan n uɣref amaziɣ, yules-d talalit
di 20 yebrir « Tafsut Imaziɣen ».
Ayen yessefken ad t-issinen yimaziɣen s umata
Ay aɣref Amaziɣ, ma yella tebɣiḍ tanekkit-inek ad tedder
yessefk tadukli-nwen ad tettwaṭṭef ɣer yiwet tutlayt tamesdukelt,
tamezdit s umata, tantaliwin n Tmazɣa alamma d asmi ara kecment
deg yiwen umawal amesdukel, imiren ulaḥedd Aqbayli, niɣ Acelḥi,
niɣ Acawi, niɣ wiyaḍ… yal agdud ad yaf iman-is di Tmaziɣt
tamesdukelt, tayiwent.
Di lawan n Masnsen akked Yugurten tella yiwet Tmaziɣt
yesduklen aɣref si Libya alamma d Cengiṭ, widak i d-yuran fellaneɣ, Ruma akked Biẓenṭa nnan-d : Di Tnemda (Numidya) akked
Muriṭanya yiwet tutlayt swayes ttemsefhamen.
A tawaɣit n uɣref yebḍan d igduden, yal agdud seg-s iɣil iman-is d
netta i d aɣref weḥd-s.

- 14 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

Tudert i 20 yebrir, d ass n tudert i Lezzayer akked Tmazɣa
tameqqrant. Ay aɣref Amaziɣ, ma triḍ tudert i yiman-ik suddes
igduden-ik, smimeḍ tarwa-k ɣer useɣri n tutlayt-nsen, d nettat i d
tilelli, d tudert n tidet akked tnekkit, ssefhem ayetma-k imseɛraben,
eg-asen leḥmala n tnekkit-nsen akked umezruy deg wul, d aya i d
tiddukla n Tmazɣa tameqqrant, s yisem n 20 yebrir…
« Tafsut Imaziɣen ».

Tamaziɣt tura – Un 8-9 – H.C.A / yebrir-ɣuct 2011

- 15 -

Tifeṭṭiwejt n 80…
Boudjema AZIRI

A

kken kan tgerrez tefsut… isekla ǧǧuǧgen, tiɣezza
zgezwent, azwu yebbuḥra, semmeḍ cwiṭ. Tamurt
terked : ixeddamen deg yimukan-nsen, win izehhun
izehhu, win yetthembiren yetthembir… win yeqqaren yeqqar…
Lmulud At Mɛemmer yettecrurud-d ɣer Tizi-Uzzu, inelmaden
ttraǧun-t deg tesdawit i wakken ad asen-d-yawi asarag ɣef udlis-is
aneggaru Isefra iqburen n teqbaylit i wumi isemma s trumit

Poèmes kabyles anciens.

Iɛeṭṭel wissen acuɣer… Uysen-t yinelmaden, ladɣa mi ẓran
ayen yellan deg udlis-nni iɣef yebɣa ad asen-d-yemmeslay... adlis
yeččuren d isefra yefkan iẓuran deg wakud akked yidles aḥeqqani.
Awal lqayen n umedyaz yeffalen i yal talast, d netta kan i izemren
ad d-yessaki iḥulfan n tlelli deg wallaɣen yessbek yiḍes akked tugdi.
Tugniwin n tmedyazt yettseḥḥiren ulawen ssakayent-d tabɣest
yezzren deg yider n wid zzuznen s tkerkas akked tutlayt n usɣar.
Tamedyazt taqburt d llsas yersen ɣef ṣṣeḥ. D llsas n yidles n
tmaziɣt, d asaki n tissas n yimaziɣen. Ihubb-d waḍu, yekkes-as
aɣebbar; yeḥmel-d wasif yezzuzef fell-as aɣudar yembabben d
leqrun aya...
D idles akked tissas, tussna akked tmusni i d ilugan n
tmetti, ayen nniḍen akk d akellex.
Gar yimedyazen iqburen i d-yesseklef Lmulud At Mɛemmer, ad dnebder Muḥ At Lmesɛud, Lɛerbi At Bejɛud, Sidi Qala i d-yeǧǧan
- 16 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

lemtul… melba ma nettu amezwaru-nsen : Yusef U Qasi yesduklen
tamusni akked ccbaḥa n umeslay iss iferru timsal iweɛṣen ; yedder
deg « udrar n lɛezz ». D netta i s-yennan :

Cubaɣ win ur nekkat uzzal
Yecmet wagus-is
Am win isennden s uffal
D win i d lettkal-is
Neɣ afṣiḥ deg lmital
Ur nessefruy seg yixf-is
Si Muḥend yekkes-as lweḥc… yetwennes, ziɣ mačči weḥd-s
kan i yekcem ddunit n tmedyazt…
Adlis « Isefra iqburen n teqbaylit », amur ameqqran deg-s yettwaru
s teqbaylit, tella tsuqelt n yisefra ɣer tefransist. Lmulud At
Mɛemmer yefka-d tamawt imi tamuɣli tettemxallaf gar tenfalit
taqbaylit akked tin n tefransist, acku asefru iseɛɛu aṭas n yinumak
akked ccbaḥa ur tezmir ara tsuqelt ad ten-id-tessenfali.
Ad naf deg udlis-agi kra n tektiwin akked lewqat ɣef
umezruy n tsekla taqbaylit :
- Di tazwara uqbel lqern wiss 16, d tallit n tillas ur nessin ara
imedyazen n lweqt-agi.
- Tallit talemmast, gar lqern wis 17 akked wis 18 ideg yedder Yusef
U Qasi.
- Tallit i d-iqerben, tbeddu di tlemmast n lqern wis 19 : imedyazen
yeddren deg-s ttwassnen. Ad naf di tallit-agi taneggarut kra n
yizemzen icudden ɣer yineḍruyen i d-yeǧǧan ccwami di tmetti :
1857 mi d-kecmen yirumiyen ɣer tmurt n leqbayel alamma d
tagrawla n 1871; rwin ilugan n tudert, imdanen ur ẓrin d acu ara
xedmen zdat ufransis bu lemdafeɛ ur nettuneɣlab, ula d ṣṣellaḥ ur
ḥudden ara ɣef tmurt. D acu akka yeḍran ? Aseggas n 1871,
« waḥed usebɛin d leflas » akken i s-yenna umedyaz Smaɛil Azikiw,
win yemmuten yemmut, win igguǧan igguǧa, win nfan yirumiyen

Tamaziɣt tura – Un 8-9 – H.C.A / yebrir-ɣuct 2011

- 17 -

Tasɣunt s Tmaziɣt n Usqamu Unnig n Timmuzɣa

nfan-t… tamurt tessewḥac ! D tallit-agi i d-yefkan Si Muḥend U
Mḥend iḥeḍren i lmut n baba-s… nɣan-t yirumiyen zdat-s.
Di tmedyazt taqburt, ad nemlil iman-nneɣ d lemri n tudert-nneɣ
ideg d-nettban d iɛeryanen, akken i ɣ-d-turew yemma-tneɣ… Nelha
neɣ diri-aɣ, akken yebɣu yili lḥal, tugna n ṣṣeḥ tif tin n lekdeb i
nḍellu i tfekka-nneɣ… teɣma fell-aɣ, d akustim i ɣ-d-feṣṣlen
yijenṭaḍen ; i nxaḍ s yifassen-nneɣ, nelha neɣ diri-aɣ.
Nruḥ nehmel ur nemyeɛqal gar-aneɣ… nedda d tifawtin n yimannneɣ ideg wwtent tɣersiwin.
Tamedyazt taqburt d iɣrisen ara yessemlilen tifawtin, ara
iɣummen tiɣersiwin. Neqqers ! Acḥal d leqrun aya…
Tamedyazt taqburt d llsas n tsekla-nneɣ, deg-s yiwet n tmuɣli
yessebruruzen tilufa, deg tterbga, deg yiḥulfan n ddin n tidet akked
nniyya yeṣfan deg tfelsafit n tudert akked yilugan n uselḥu n tmetti,
deg tayri, deg tebɣest… deg wayen akk yesbeddayen agdud akked
tayemmat, i yenɣan ababat.
Adlis-agi n Lmulud At Mɛemmer d agerruj i dyettwaḥewsen i tatut akked tillas i d-izewwiren i lmut. D tacaɛlalut
n tafat yeskanayen abrid i widen yeffuden tilelli ; ur tessaggad tidet
qerriḥen…
Acku d tifeṭṭiwejt yeskarayen ajajiḥ deg taffa n lekdubat yeqquren.
D tiqit n nnda i d-yessakayen tudert leqqaqen iteddun ɣer yimal.

- 18 -

Tamaziɣt tura – Un 8-9 – H.C.A / yebrir-ɣuct 2011

Awal ɣef tefsut n yimaziɣen
Boussad KEBIR

T

afsut n Yimaziɣen n useggas n 80, d yiwen usebter
ilan azal meqqer deg umezruy n tmurt-nneɣ. Ma
ntekkes-as aɣebbar xerṣum tikkelt deg useggas, i
wakken kan ad t-id-nessiweḍ i tsutwin n wass-a akked tid n uzekka.
« Wid ur nceffu ɣef umezruy-nsen, yesḍuli fell-asen ad t-idiren
tikkelt nniḍen » (Ceux qui ne se souviennent pas de l’histoire, sont
condamnés à le revivre ), i yeqqar umazray George Santayana.
Ayen iɣer yessaweḍ uzbu amaziɣ ass-a, d agemmuḍ n waṭas n
yiseggasen n umennuɣ ; amennuɣ i seddant waṭas n tsutwin i
yesdukel yiswi ɣas ulamma mguggint deg wakud : tanaṣlit. Tajmilt i
kra n win akked tin i d-yernan asɣar i target-agi n tnaṣlit i wakken
ur tettnus. Ad tt-id-nebdu kan seg yimeɣnasen n Lezzayer tazzayrit
deg ukabar n « Yitri n Tefriqt Ugafa » (E.N.A) deg useggas 1926,
ɣer wid n tezɣent n 1949, ɣer wid n ugraw n Ṣumam deg useggas n
1956, ɣer wid i wumi semman « Les poseurs de bombes » deg
useggas n 1975, ɣer wid n tefsut n Yimaziɣen n useggas 1980, ɣer
wid n uɣunzu n tɣuri deg useggas n 1994, ɣer wid n tefsut
taberkant deg useggas n 2001 d wid akk yekkaten ass-a ɣef tnaṣlit,
akken yebɣu yili wallal i ssemrasen.
Seg leqrun n uzermezruy, tamurt n Leqbayel, d asgen n wid
ur nkennu. Iḍelli, d imezdaɣ-is i iqublen amnekcam bu lemḥayen ;
ass-a, d nutni i yugin kennu zdat n udabu amesbaṭli. Tisutwin-agi
akk, seknent-d i yimnekcamen iḍelli neɣ i udabu amesbaṭli ass-a,
Tamaziɣt tura – Un 8-9 – H.C.A / yebrir-ɣuct 2011

- 19 -

Tasɣunt s Tmaziɣt n Usqamu Unnig n Timmuzɣa

belli aqbayli aḥrur mačči d ayen akken i wumi semman
yimusnawen n tmetti « l’homo-économicus » : amdan war amezruy,
war idles, war iles… Am wakken yella kan akken ad yexdem, ad
yečč, ad yesɛu dderya, ad yernu xemsa ɣef yimi. Lemmer mačči d
wigi akk, idles-nneɣ, tameslayt-nneɣ, laṣel-nneɣ…, ad ruḥen kan
akka am tadla-nni yečča yilef.
Ass-a, ur yezmir yiwen ad d-yemmeslay ɣef tefsut n
Yimaziɣen war ma yuɣal aṭas ɣer deffir deg umezruy n tmurt-nneɣ.
Seg teglest, iɣerfan imaziɣen ttnaɣen mgal imnekcamen i d-yeffalen
ɣef tmurt n Tmazɣa. Ihi, d azbu amaziɣ i yellan deg yal tallit i dyennulfan ass n 20 di yebrir 1980 s wudem nniḍen. Tafsut n
Yimaziɣen ihi, d yiwen uḥric n uzbu amaziɣ i d-yuɣen aẓar seg
leqrun yezrin ; mačči d ayen i d-yesnulfa urumi neɣ d tamsalt n
beṭṭu n warraw n tmurt am wakken i ɣ-d-qqaren wid yettɣummun
iṭij s uɣerbal.
Agdud amaziɣ, seg yemma-s n ddunit netta d azbu mgal
tamḥeqqranit. « Asmi d-luleɣ d aqbayli, isem-iw imenɣi », i yeqqar
Lwennas ad fell-as yeɛfu yerḥem. Tamḥeqqranit i d-yellan ɣef
tmaziɣt, mačči armi d iḍelli kan i tebda imi d ayen i d-yellen fell-as
d leqrun ayagi. Ula deg tallit tazermezruyt igelliden n Tmazɣa ur dltin ara d tutlayt-nsen. Sseqdacen deg yal aḥric n tmetti, tafniqt n
Yifniqen neɣ talatinit n Rruman. Tamaziɣt, teqqim kan d tameslayt
n uɣref, imi Imaziɣen urǧin sbedden awanak yesseqdacen tamaziɣt
d tameslayt n udabu. Yuba wis sin, Appullee, Saint Augustin,
Fruntu, Tertulien, Terence…, d imusnawen imaziɣen, d nutni i
yesseftin tasekla talatinit di tallit anida imawlan-is bdan ttaǧǧan-tt.
Ɣef wakken i d-qqaren, Appullee, d netta i yuran ungal amezwaru
deg umezruy n talsa. Isemma-as : « La Métamorphose ou l’âne
d’or ». Ungal-agi, yura-t Appullee s tlatinit. Lemmer i t-yuri s
tmaziɣt, yili ass-a ad yeched fell-aɣ umezruy, yerna ad aɣ-yili ass-a d
asalel i usdukel n tutlayt-nneɣ.
Asmi d-wwḍen waɛraben di lqern wis 7, lulent-d tgeldiwin
timaziɣin tinselmin. Ass-a ma tella tallit iɣef ur d-nettmeslay ara
aṭas, ladɣa deg yihalen n uselmed n umezruy deg yiɣerbazen-nneɣ,

- 20 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

neɣ ma yella-d cwiṭ, ad t-naf yettwasexdem akken nniḍen, d tallit n
tgeldiwin n Tmazɣa di tallit tineslemt ; tin i wumi isemma Mahfoud
Keddache « tallit n wureɣ ». Di tallit-nni, Tamazɣa tessuli
tiɣermiwin timeqqranin, treṣṣa deg unegmu adamsan, adelsan
akked userti izegren akin i tlisa n yilel agrakal. Tigeldiwin-agi, am
tmeqqranin deg-sent am les Almoravides, les Almohades, neɣ
timeẓyanin am les Hafsides, les Abdelwadides akked les Merinides,
uklalent ad d-nsukk fell-asent tamuɣli lqayen i wakken ad dnessekfel ayen icudden ɣer tallit yellan d tamerkantit s tedyanin
yekkan deg usileɣ n tugna akked tmagit-nneɣ imi i asent-id-llan di
lmendad yirgazen imeqqranen n tsertit akked yiserdasen, wwin akin
i tlisa n Tmazɣa ddin n Lislam, gar-asen Tariq Ibn Zeyyad, Ibn
Tumert, Ɛebdelmumen, Yusef Ben Tacfin…1
Ula di tallit-agi, aṭas n yimusnawen imaziɣen i d-yufraren di
yal aḥric n tussna : Ibn Tumert, Ibn Xeldun, el Wertilani… Maca
ass-a, kra n wayen uran, yuɣal d ayla n wiyaḍ imi ur t-urin ara s
tmaziɣt. Di tallit-agi daɣen, ufraren-d kra n yimusnawen imaziɣen,
zgan-d d tisulal i tutlayt n taɛrabt : Amezwaru d Muḥemmed
Aǧerrum i yuran « El Aǧerrumeyya » n taɛrabt. Wis sin, d Ibn
Xeldun i d-yeslalen tussna n tmetti. Rnu ɣer-sen Ibn Tumert i dyessuɣlen di lawan-nni Leqran s tmaziɣt. Lemmer i mazal Leqranagi ass-a, am wa, am win yexdem Ṣaliḥ Uṭerrif n lɛerc n
Yiberɣwaten di tmurt n Lmerruk, ad ilin d inagan, yerna ad aɣ-ilin
d tisulal i usdukel n tutlayt-nneɣ.
« Amezwaru i d-ibedren Imaziɣen deg umezruy, d amazray
agrigi Irudut di lqern 5 uqbel Ɛisa. Seg wass-nni armi d lweqt deg
yura Ibn Xeldun, ɛeddan ɛecrin leqrun ; di ɛecrin leqrun-agi, acḥal i
iɛeddan n yirgazen xedmen, nnan, snulfan, wwin-d ayen d-wwin,
maca ur d-yeqqim seg-s wacemma, acku ur t-yuri ḥedd… Seg
wass-nni ar ass-a, ur tbeddel ara liḥala ɣef tmaziɣt. Deg tmura akk

1

Timlilit tagraɣlant i d-ihegga Usqamu Unnig n Timmuzɣa (HCA) ɣef :

Tigeldiwin timaziɣin di tallit tineslemt, Biskra, ussan 01-02 duǧember 2010.
Tamaziɣt tura – Un 8-9 – H.C.A / yebrir-ɣuct 2011

- 21 -

Tasɣunt s Tmaziɣt n Usqamu Unnig n Timmuzɣa

ideg ttmeslayen tamaziɣt,… ttemseḍfaren yimnekcamen, wa irennu
taluft-is i tin i d-yeǧǧa win i t-yezwaren…»1.
« Mebla ma yeḥseb bnadem leqrun n uzermezruy, amezruynneɣ yebda 3000 n yiseggasen aya. Di 3000 n yiseggasen-agi, uran
medden s tefniqt, s tlatinit, s taɛrabt, s tefransist, meɛna yiwen ur
yuri s tmaziɣt, armi tḍaɛ tmeslayt-nneɣ »2.
Di taggara n lqern wis 19, bdan Yimaziɣen ttakin-d ɣer tira
n tutlayt-nsen. Maca uqbel ayagi, d iberraniyen i ineǧren abrid.
Amezwaru i yerran lwelha-s ɣer tutlayt n tmaziɣt, d amrabeḍ n
Yirumiyen Venture de Paradis i d-igan amawal n tmaziɣt di lqern
wis 18, yessuffeɣ-it-id di lqern wis 19.
Lwelha-agi ɣer tira n tmaziɣt, tebda tettzid umbeɛd
anekcum n yirumiyen ɣer tmurt n Leqbayel deg useggas n 1857.
Gar yimuhal i d-yufraren di tallit-agi, adlis n tjerrumt n teqbaylit i
d-yessuffeɣ le général Hanoteau deg useggas n 1867.3
Maca lwelha ɣer uselmed n tmaziɣt, tban-d deg yiseggasen
n 1880 mi d-tekcem di la faculté des lettres d’Alger. Dɣa deg
useggas n 1885 snulfan-d agerdas n tutlayt n teqbaylit (Brevet de
langue kabyle ). Deg useggas n 1887, snulfan-d agerdas n tentaliyin
n tmaziɣt (Déplome des dialectes berbères )…
Gar warraw n tmurt imezwura i yerran lwelha-nsen ɣer tira
n teqbaylit, ad naf Bensdira akked Bulifa, wid i wumi isemma
Salem Chaker «Les précurseurs de l’écriture ». Deg 1897, Si Ɛmer
U Saɛid Bulifa, yeddem i tikkelt tamezwarut taɛkemt n uselmed n
teqbaylit. Rnu ɣer-sen Belɛid At Ɛli i isersen llsas i tira n wungalen
s teqbaylit, imi deg yiḍrisen-is yecban « Afenǧal n lqahwa », «Lwali
n udrar », llant limarat n tullist. Ihi ur yeqqim ara kan di tira n
tmucuha, maca yewwi-d amaynut di tira n teqbaylit.
Ɣas ulamma di talli-nni tamezwarut, tira n tmaziɣt teqqim
kan di tririt n wayen yellan d timawit ɣer tira ; iseggasen-agi
1

Inna-as Ccix Muḥend, Mouloud Mammeri.

Seg tezwart n Mouloud Mammeri deg wungal « Askuti », Said Sadi.
A. Hanoteau, Grammaire kabyle et poésie populaire de la Kabylie de
Djurdjura, Impr. Impériale, Paris, 1867.
2
3

- 22 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

ineggura, bdan ttbanen-d kra n yitran i d-yewwin amaynut ama deg
wungalen, di tjerrumt akked tseddast neɣ di tsuɣelt…
Hata wamek i ṭṭfen lefnar n tmaziɣt kra n yimeɣnasen n umussu
aɣelnaw azzayri armi i d-yewweḍ ɣur-neɣ ass-a :
Mi teɣli tegduda n Rif di Lmerruk deg 1926, ilul-d di
Lezzayer Yitri n Tefriqt Ugafa (Etoile Nord africaine ) i yessuturen
timunent n tmura n Tefriqt Ugafa umbeɛd mi yella yekkat ɣef
yizerfan n yixeddamen n Tefriqt Ugafa. Ɣef wakken i d-yenna
Mahfoud Keddache, 5 gar 8 n wid i d-yeslalen akabar-agi, d
Leqbayel. Ayen yeǧǧan amazray arumi Roger Létourneau, ad d-yini
: « On aurait mieux fait de l’appeler l’Etoile algérienne ou même
l’Etoile kabyle ». Deg usqamu i iga yitri n Tefriqt Ugafa deg
useggas n 1927, Leqbayel-nni, fernen Messali Lḥaǧ d aselway.
Hatan ihi wamek yebda umennuɣ gar yimeɣnasen n Lezzayer
tazzayrit am Ɛmer Imac, Lḥusin At Ḥmed, Muḥend U Yidir At
Ɛemran, Bennay Waɛli, Ɛmer Uld Ḥemmuda… akked yimeɣnasen
n Lezzyer d aḥric deg uɣlan aɛrab ineslem am Messali Lḥaǧ akked
wid yellan d izamulen-nsen, yecban Cakib Arslan, Ɛezzam Baca,
Ǧamal Ɛebdennaṣer…
Rnu ɣer-sen lɛulama inselmen am Ben Badis, Bacir
Ibrahimi, Lɛerbi Tbessi…i inekren udem amaziɣ n tmurt-nneɣ.
Am di tallit ideg nettidir ass-a, imeɣnasen n Lezzayer tazzayrit imirnni, sbabben-asen mačči d yiwet n taluft : « Imeddukal n Fransa »,
«Les communistes »,… Yenna fell-asen Ben Yusef Ben Xedda :
«Ils étaient influencés non seulement par les idéologies de
colonisation, mais aussi par l’idéologie communiste ». Akka ihi, mi
d-ilul ukabar «Itri n Tefriqt Ugafa », yewwi-d yid-s iẓuran n tezɣent
i d-yeznan tikkelt nniḍen deg useggas n 1949.
Asuter n wudem amaziɣ, yules-d talalit deg yiseggasen n 40
mi d-ilul umussu aɣelnaw azzayri (M.N.A.). Maca, mi d-banen
yimeɣnasen yessefraken takti n tmaziɣt, ad ttwakerfen din din.
Akka i ɣlint tmegraḍ n Bennay Waɛli, Ɛmer Uld Ḥemmuda,
Ɛebban Remḍan…

Tamaziɣt tura – Un 8-9 – H.C.A / yebrir-ɣuct 2011

- 23 -

Tasɣunt s Tmaziɣt n Usqamu Unnig n Timmuzɣa

Di tallit-agi, uran Lɛulama deg uɣmis-nsen i wumi semman
«Lbaṣair » : «Les Kabyles ne seraient des algériens à part entière

que lorsqu’ils auront cessé de chuchoter ce jargon qui nous
écorche les oreilles ».

Timmist yellan d taqdimt, teffi-d tikkelt nniḍen deg useggas
n 1956 deg ugraw n Ṣumam. Maca, d Ɛebban Remḍan s timmad-is
i igan talast i tezɣent-nni, mi d-yenna : « Toutes les contradictions

de la société algérienne doivent être mises entre parenthèses
jusqu’à l’indépendance ». Akka ay tella si zik : Leqbayel, zgan

ttaǧǧan tamsalt-nsen mi ara yili kra n wugur ara isenquqlen tamurt.
Deg useggas n 1962, tiɣri n ugdud tessaweḍ ɣer yiswi-s,
yekkes uzaglu ɣef tayet, tamurt tuɣal s « imawlan ». Lemmer d
lebɣi-k ay ul, adabu n lweqt-nni ad yefk amkan i wudem amaziɣ
war ma yessuter-it umdan. Imi tezwar tazzla ɣer tizzeɣzeɣt, yerra
taluft n tmaziɣt i tikkelt nniḍen ɣer umennuɣ. «Nous sommes
arabes, nous sommes arabes, dix millions d’arabes », i d-yenna Ben
Bella mi d-yekcem si Tunes. D ayagi dɣa i t-yeǧǧan ad yelli tiwwura
n Lezzayer i yixerrazen n Maṣer akken ad uɣalen d iselmaden-nneɣ.
Mi d-yewweḍ Bumedyen s akersi, yeɣḍel-d tebrek akked tillas ɣef
tutlayt n tmaziɣt akked yimeɣnasen-is. Iɣebber-d tamurt n Leqbayel
s yidrimen, amer ahat ad isuzef laẓ fell-asen, ad ineɣ tawekka-nni i
ten-izedɣen ɣef tmaziɣt. Di tallit-nni, tizzeɣzeɣt tuɣ aẓar.
Imeɣnasen n tmaziɣt, mačči d yiwet n taluft i asen-d-snulfan i
wakken ad ččaren yis-sen leḥbus. Tidyanin n « Les poseurs de
bombes » n wass n 25/12/1975, « Cap Sigli »n wass n 1011/12/1978…, d amedya kan ɣef wayagi.
Deg useggas n 1969, Bumedyen ihegga-d asqamu n
yineɣlafen deg yiɣrem n Tizi-Uzzu. Yefka-d idrimen melba cceḥḥa i
twilayt n Tizi-Uzzu yellan ɣef uqerru-s di lawan-nni « uqbayli »
Ḥmed Ɛli Ɣzali. « Asegres-nni i k-ɛellqen, d takmamt i k-d-yezga »,
i yeqqar yinzi aɣerfan n tmurt-nneɣ. Deg uqerru n Bumedyen,
teddez tebrez : ad iɛerreb ula d tamɣart n Leqbayel !!!
Hatan wamek tebda tizzeɣzeɣt n Bumedyen mgal udem
amaziɣ d yimeɣnasen-is : ameslay s teqbaylit ula gar yinelmaden deg

- 24 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

yiɣerbazen, yettwagdel ; tasgilt « srid seg yinurar » i yellan yakan s
teqbaylit, tettwagdel ; ismawen n yimdanen ilan assaɣ akked yidles
amaziɣ, ttwagedlen ; timsirin n tmaziɣt i d-yettak Mulud Mɛemri di
tesdawit n Lezzayer, ttwagedlent s wudem unṣib deg useggas n
1973…
Teḍra d Bumedyen di tallit-nni, am win imeḍlen alɣem : mi
iɣum aɛrur-is, ad d-banen yiḍarren-is. Akka, di tallit anida adabu
yesseḥres ɣef Leqbayel di tmurt, amennuɣ ɣef tmaziɣt yufrar-d gar
yiminigen-nneɣ di tmurt n Fransa. Akka dɣa i d-ilul Ugraw n
Yimaziɣen di tmurt n Fransa deg useggas n 1967 d unekcum n
tmaziɣt s wudem unṣib di tesdawit n Paris.
Di tallit-agi n tizzeɣzeɣt, amennuɣ ɣef tmaziɣt yuɣ sin n yiberdan
nniḍen i as-yeffɣen afus i udabu :
Amezwaru, d ccna. Deg yiseggasen n 70, icennayen am
Yidir, Ferḥat Mhenni, Sliman Ɛazem, Lunis At Mengellat, Maɛtub
Lwennas, Crif Xeddam… llin-d abrid i tefsut n 80. Tizlatin-nsen,
ssakayent wid yeṭṭsen akked wid iɣeflen, imi yal tizlit d asebter deg
umezruy-nneɣ.
Wis sin, d addal. Tarbaɛt n Yilemẓiyen n Leqbayel (JSK),
tuɣal am wakken d akabar yeddmen tamsalt n tmaziɣt ɣef tuyat-is.
Inurar ideg ara tili, ttawin-d aṭas n yimdanen, mačči i wakken kan
ad ẓren timlilit, mačči i wakken ad zhun imi ur as-d-yeqqim zzhu i
win i tt-yuɣen di tnaṣlit ; maca i wakken ad suɣen mgal
tamḥeqqranit i d-yellan ɣef tutlayt akked yidles amaziɣ. Ayagi ad aɣt-id-seknen yizlan i nsell deg yinurar : «Nekni s Leqbayel, neɛya di
lbaṭel ; tafsut n 80, tejreḥ ulawen », «Lezzayer, d tamurt-nneɣ ;
tamaziɣt, d tutlayt-nneɣ »…
Ass n 19/06/1977, tella-d temlilit n taggara n teqbuct n
Lezzayer gar terbaɛt n yilemẓiyen n Leqbayel (JSK) akked terbaɛt n
NAHD deg unnar n « 5 di yulyu » di tmanaɣt n tmurt-nneɣ.
Imferrǧen, qesden-d anrar n « 5 di yulyu » d izumal ; seknen-d lɣiḍnsen i Bumedyen. Am yizlan i cennun, am wayen uran di tɛellaminnsen, ur yesɛi ara assaɣ d waddal. La JSK terbeḥ, tewwi taqbuct n
Lezzayer ; ma d lqaɛa tezlez ɣef Bumedyen i tt-igezmen ass-nni di

Tamaziɣt tura – Un 8-9 – H.C.A / yebrir-ɣuct 2011

- 25 -

Tasɣunt s Tmaziɣt n Usqamu Unnig n Timmuzɣa

rray ɣef tukksa n yisem n JSK imi i tt-yerra d JET (Jeunesse
Eléctronique de Tizi-Ouzou ).
Ass n 28/12/1978, yemmut Bumedyen; yekker gar-asen
wahruḥu ɣef win ara yeṭṭfen amkan-is. Imir-nni i d-snulfan taluftnni n «Cap sigli » i wakken ad sanfen lwelha n yizzayriyen, nutni ad
d-ltin d temsalt n leḥkem. « Imawlan, lhan d tmeɣra ; amcic, yelha
d ukerreɛ », i yeqqar yinzi aɣerfan n tmurt-nneɣ.
Yuɣ lḥal, deg useggas 1977, tlul-d tesdawit n Tizi-Uzzu.
Hattan tmexneqt i yezzi udabu n yimir-nni i umgerḍ-is, imi
tasdawit n Tizi-Uzzu tuɣal am wakken d asgen i umussu amaziɣ.
I wakken tamsalt ur asen-tetteffeɣ ara afus, imḍebbren n TiziUzzu, snernan tizzeɣzeɣt : ulac ccna s teqbaylit, ulac amezgun s
teqbaylit, ulac isaragen ɣef tutlayt akked yidles amaziɣ, ulac, ulac,
ulac…
Akabar n FLN, yettnadi ad iger ticcert-is deg wayen akk
iḍerrun di tesdawit n Tizi-Uzzu. Yettmekkin tiddukliwin-ines am
l’UGTA, l’UNJA… akken ad uɣalen d imḍebbren ɣef yixeddamen
akked yinelmaden n tesdawit.
Di tegnit-agi ikersen i d-tlul tekti i wakken ad d-necden
Lmulud At Mɛemmer ɣer tesdawit n Tizi-Uzzu, ass n 10 di meɣres
1980 akken ad d-yefk yiwen usarag ɣef udlis-is amaynut «Poèmes
kabyles anciens ».
Ass n 10 di meɣres 1980, axxam n tesdawit ideg niqal ad dyili usarag n Lmulud At Mɛemmer, yeččur armi d ulamek ; ttganin
akk awwaḍ n win d-yekksen tameslayt-nneɣ seg uɣbalu n tatut.
Imsulta uffiren seg tama-nsen, tezzin tennḍen di tesdawit akken ad
remqen wid yessedduyen amussu amaziɣ di tesdawit.
Araǧu, yuɣal d layas. Lmulud At Mɛemmer, sqaṭṭɛen-as s
abrid, sanfen-t ɣer yimḍebbren n Tizi-Uzzu i as-yugin ad d-yefk
asarag-nni imi am wakken i t-walan, yezmer ad d-yawi ccwal i
temnaḍt-nneɣ yeḥwaǧen lehna.
Hattan tuccḍa nniḍen i gan yimḍebbren-nneɣ imi ccwal-nni
i bɣan ad t-sanfen, sasen-t-id s yifassen-nsen. Azekka-nni, tella-d
tmesbanit tamezwarut ɣef tmaziɣt akked tlelli di Tizi-Uzzu ;

- 26 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

ḍefrent-tt-id tmesbaniyin nniḍen ama di Tizi-Uzzu ama di
Lezzayer, am tin i d-yellan ass n 7 di yebrir 1980.
Ɣas tama n umussu-agi i d-ilulen di tesdawit, imeɣnasen n
ukabar n FFS di lweqt-nni, saɣen amussu amaziɣ gar yimeddukalnsen di tkebbunay timeqqranin am SONITEX, SONELEC akked
sbiṭar n Tizi-Uzzu ; sawḍen-t armi d ilemẓiyen n tesnawiyin akked
yiɣerbazen ilemmasen. Hatan ihi wamek i d-yeffeɣ umussu amaziɣ
s abrid, mbeɛd mi yella d uffir di tesdawit. « Suffɣet tagrawla s
abrid, ad awen-ḍemneɣ ad taweḍ ɣer yiswi-s », i yeqqar umeɣras
Lɛerbi Ben Mhidi.
Imi imḍebbren-nneɣ d ḍellu i asent-ḍellun, mačči d ferru i
tent-ferrun, sxedmen aklan n Tizi-Uzzu, gan-d yiwet n tmesbanit di
Tizi-Uzzu, wwin-d acḥal d lkar si temnaḍin nniḍen n tmurt. Zdat n
lkamirat i d-tuzen tgujilt, refden tiwlafin n Cadli akked tɛellamin
ideg uran s taɛrabt : « yiwet n tmeslayt, yiwen n ugdud »…
Tamesbanit-agi, yerra-as-d umussu amaziɣ s uneḥbus ɣef uxeddim
akked ulmad ass n 16 di yebrir 1980. Ass-nni, kra n wanida yella
uqbayli aḥrur, yerra-d i teɣri.
Di tegnit-agi ikersen, yefka-d udabu ass n 20 di yebrir d
talast i tuɣalin ɣer umahil akked ulmad. Ass n 20 di yebrir ɣef tis 4
n tnezzayt, neɣlen-d yimsulta ɣef tesdawit n Tizi-Uzzu, sbiṭar,
tikebbunay n SONELEC akked SONITEX, la hemmjen deg
yimdanen am yiḍan yesḍen : imejraḥ, imeḥbas, tukksa n sser…
lḥaṣun, d tawaɣit !
Azekka-nni, isalli yewweḍ yal tama, iberdan n Tizi-Uzzu
ffalen s yimdanen. Taftilt i saɣen yinelmaden akked yiselmaden di
tesdawit, refden-tt yimdanen meẓẓi meqqer deg yiberdan. Maca, s
yifassen d ilmawen, ur yelli wacu ara xedmen zdat ujajiḥ n tmes.
Hatenta kra n tegnatin nniḍen s wazal-nsent deg umezruy n
umussu amaziɣ :
- 17/01/1994 : tella-d yiwet n tikli meqqren di Tizi-Uzzu akked
Bgayet, ihegga-tt-id umussu adelsan amaziɣ. Ɣer taggara n tikli-agi,
teffeɣ-d tseɣrut n umussu adelsan amaziɣ : ma ur d-tekcim tmaziɣt,
ad d-yili uɣunzu n tɣuri deg useggas n ulmad 1994/1995.

Tamaziɣt tura – Un 8-9 – H.C.A / yebrir-ɣuct 2011

- 27 -

Tasɣunt s Tmaziɣt n Usqamu Unnig n Timmuzɣa

- 10/09/1994 : tamurt n Leqbayel tɣunza aɣerbaz imi iɣunza
tamaziɣt.
- 04/04/1995 : tella-d yiwet n temlilit di Tizi-Uzzu, ɛemren-tt wid
akk iseddan aɣunzu-agi n uɣerbaz. Di tegnit-nni n lḥers i yettidir
umussu adelsan amaziɣ, tban-d yiwet n tɣerɣert iɣef qeblen ad
mmeslayen d udabu i ferru n taluft-nni.
- 09/04/1995 : beddu n umeslay gar umussu adelsan amaziɣ akked
tselwit n tegduda.
- 22/04/1995 : iban-d umtawa n 22/04/1995 d tlalit n Usqamu
Unnig n Timmuzɣa (HCA ).
- 29/04/1995 : tella-d tuɣalin s aɣerbaz, ɣas ulamma aseggas ur
yettuneḥsab ara.
- 07/05/1995 : talalit n Usqamu Unnig n Timmuzɣa s wudem
unṣib.
- 09/08/1995 : tannant tamezwarut n yiselmaden n tmaziɣt di Ben
Ɛeknun.
- 31/08/1995 : tuffɣa n terbaɛt tamezwarut n yiselmaden n tmaziɣt
i wumi fkan isem n Lmulud At Mɛemmer.
- 14/10/1995 : i tikkelt tamezwarut deg umezruy n tmurt-nneɣ,
yella-d unekcum n tmaziɣt s aɣerbaz azzayri di 16 n lwilayat n
tmurt.
- Di tmendawt n 1996, yella-d usteɛref s wudem amaziɣ am
wakken d yiwet gar tgejda iɣef tebna tnettit-nneɣ taɣelnawt, tama n
taɛrabt akked tneslemt.
- Deg 1999, iruḥ uselway Zerwal, yusa-d uselway Butefliqa.
Leqbayel yettraǧun deg-s tifrat, ffɣent-asen tirga mxalfa asmi akken
i tt-id-yefra di Tizi-Uzzu mi aɣ-d-yenna : «Tamazight ne sera jamais

langue officielle, et si elle deviendra langue nationale, ça sera par
voix référendaire ».

Dayen, yeqqers ṭṭbel, tefra tmeɣra. Imdanen, qeḍɛen layas,
ččuren wulawen-nsen : tamḥeqqranit, lbaṭel, maḥyaf, rnu ɣur-sen
leɣla n temɛict ; yeqqim-d kan yifeṭṭiwej ara tt-iceɛlen. D ayagi dɣa i
d-yeḍran ass n 18/04/2001 umbeɛd timenɣiwt n Germaḥ Masinisa
deg At Dwala. Tidyanin n tefsut taberkant, glant-d s 126 n

- 28 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

yimeɣrasen, igiman n yimejraḥ, wamma lexṣara di cci ur
tettuneḥsab ara zdat terwiḥin n yilemẓiyen akked tlemẓiyin.
Hatan wayen yeǧǧan aselway Butefliqa ad yilwiɣ acemma,
imi ass n 08/04/2002, yella-d usteɛref s tmaziɣt d tutlayt taɣelnawt
war ma tɛedda di tefrant am wakken i t-id-yenna yakan.
D tidet, tamaziɣt tger asurrif meqqren ɣer zdat, maca amennuɣ
mazal-it iḍul alamma yuɣal-as-d umkan i tuklal di tmurt-is gar
warraw-is.
Ass-a, tamaziɣt tettqabal sin yixṣimen d imeqqranen :
Amezwaru, d wigi akk iɣef i d-nemmeslay. Ma d wis sin, d
imaziɣen s timmad-nsen. «Nḥemmel ad nezger asif mi ara yili
yeḥmel », i yeqqar Lunis At Mengellat. Di tallit n tizzeɣzeɣt,
imdanen xeddmen : xeddment tdukliwin tidelsanin ɣas ulamma s
wulac gar yifassen ; teffɣen-d yiɣmisen s tmaziɣt (Asalu, Tamurt,
…) ; teffɣent-d tesɣunin s tmaziɣt ; imdanen, tezga tmaziɣt deg
yiles-nsen, yezdeɣ-iten lḥir ; ikubar n tsertit, yis-s i ttgallan ; tella
tdukli…
Maca ass-a, ad iḥudd Rebbi. Ulac tiddukla ixeddmen, neɣ
ma tella, ad tt-naf telha-d kan d ṭṭbel akked ubendayer ; ulac
iɣmisen s tmaziɣt ; i ma llan, wi ara ten-yeɣren ? Ass-a lḥir ɣef
tmaziɣt, yeffeɣ ulawen ; ulac tamaziɣt deg wayen akk i aɣ-d-yezzin :
di tḥuna, deg yiberdan, deg wallalen n tumnayt neɣ di tdeblin. Assa Imaziɣen, ur sseftayen ara idrimen-nsen deg wayen ara yesnernin
tutlayt akked yidles-nsen…
Ass-a llant ukkuẓet n tɣawsiwin, lemmer yerbiḥ zzman, ad
ilint d tisulal i tutlayt akked yidles-nneɣ : iɣrem, abaɣur, tamusni
akked tugdut.
Ass-a tamaziɣt, d tameslayt n yimesdurar. Mi d-yeffeɣ
yiwen taddart, yeǧǧ din tameslayt-is. Tamaziɣt ass-a, d tameslayt n
yigellilen. Mi yerbeḥ yiwen, yeǧǧ tamaziɣt-nni. Wid yeɣran ass-a, d
timeslayin-nni ɣran i ssemrasen, i sselmaden i warraw-nsen. Ma d
tugdut-nni iɣef uzzlen yiḥemmalen, ass-a tuɣal-aɣ d nnema imi
tefreq gar watmaten…

Tamaziɣt tura – Un 8-9 – H.C.A / yebrir-ɣuct 2011

- 29 -

Tasɣunt s Tmaziɣt n Usqamu Unnig n Timmuzɣa

Ass-a, at wayla, ur ksiben tira ; at tira, ur ksiben ayla. At
wayla akked at tira, ferqen-ten at tsertit. At tsertit, i ten-iceɣben d
tazzla s akersi. Mi wwḍen s akersi, ad d-zzin d ixṣimen i tmaziɣtnni.
Ass-a, lemmer d lebɣi-k ay ul, yal wa ad yezzem iman-is.
« Win yebɣan ad tṣeggem, iṣeggem iman-is », i yeqqar umusnaw.
Di taggara, ad zdiɣ awal-iw ɣer wawal n Lwennas ad fell-as yeɛfu
yerḥem i yeqqaren :

Uqbel ad aɣ-ɛezzin s ttwab,
Kkret ad d-njab
Isufar i tdukli-nneɣ

- 30 -

Tamaziɣt tura – Un 8-9 – H.C.A / yebrir-ɣuct 2011

Tafsut-nneɣ
Igli n Tlelli

Y

ewɛer lbaṭel amesbaṭli, mi ara yezzuzen tillas s
lekdeb iḥeḍmen. Yewɛer ddel aberkan, mi ara dyarew tinexsas deg tfexsa n wallaɣ yettwaɣen. Maca,
tidet n lḥeqq akked leɛqel d lmeɛqul, d ameyyez s tzemnit deg
tegnit ur nqebbel yir iẓuran yebbesrurḍen, deg lqaleb yettwarzen.
Aɣref i yebɣan ad d-yesseɣres tilelli, ssefkent-as tagmat turzint
akked tdukli n tidet.
Qqaren at zik : «Win ur nesɛi tarbaɛt, ur yettɣimi deg tejmaɛt ». Ihi,
dduqset-d a widak yeṭṭsen, iḍacen deg yirebbi n trakna yeḥman,
yeɣman. Kkret-d, beddet ad twalim, adabu n tlufa leqrar-is d yir
taggara, ass-a neɣ azekka. Am wakken i qqaren : « Win ur nekmiz i
yiman-is, ulac win ara s-ikemzen ».
Tafsut-nneɣ, d tafsut tahuskayt, iɛecqen tahuski akked wayen
yelhan yirkelli. Tafsut-nneɣ, sselɣent-tt leḥnana, tayri akked rreḥma
n Sidi Rebbi. Lwerd n tefsut-nneɣ d asirem, d tagmat akked tdukli.
Ijeǧǧigen n tefsut-nneɣ d itran icebbḥen tamazɣa u yal wa, s tfendas, s leqder-is. Tafsut-nneɣ, d nettat i ifazen irkelli deg umaḍal, deg
umeɣrad.
Maca, kkren-d yicenga n Rebbi, n tlelli, n tafat u ɛerḍen ad asbeddlen udem. Tikkelt, rran-tt d tazeggaɣt s yidammen. Tikkelt,
rran-tt d taberkant s lbaṭel-nsen amesbaṭli, aberkan. Asmi yewwet
yiɣisi deg tegrawla i xedɛen wuḍan akked yiḍan, i yeṭṭerḍeq wul i
iqebren, i d-ldint wallen iqemcen. Yal tazwara tesɛa taggara u yal
Tamaziɣt tura – Un 8-9 – H.C.A / yebrir-ɣuct 2011

- 31 -

Tasɣunt s Tmaziɣt n Usqamu Unnig n Timmuzɣa

taɣawsa tesɛa tilisa. Lemmer ad d-kkren yimeɣrasen n tlelli, ad
qqden tasusmi s yisuɣan n yimeṭṭawen teḥǧeb tmuɣli. Mačči deg
useggas n 1980 i d-tebda tegrawla n tlelli maca, seg wasmi i dyettwaxleq baba-tneɣ Adam, fell-as sslam n Rebbi. Send tamacahut
n udlis : « Isefra iqburen n teqbaylit », i yura Dda Lmulud akked
usarag-is i yettwagedlen, tella yakan send-is : « Tezɣent n
yismazaɣen » akked waṭas n twuɣa nniḍen. Ama d ayen i yeḍran i
Masnsen, Yugurten akked wiyaḍ, ama d ayen i d-yecrurden seg
yiẓuran n tlufa. Lemmer i ɛriḍen yimaziɣen-nneɣ imeɛzuzen ad
dduklen s tidet n tidet, ahat akka d nitni i d tazmert tamezwarut
deg umaḍal irkelli ass-a.
Maca, asmi i yessefk ad dduklen, llan la ttnaɣen u la ttmenɣan garasen. I neẓra u mazal ad nẓer, i yeḍran u mazal ad yeḍru. Iduba n
tmazɣa, rekḍen tilelli, izerfan n umdan akked tugdut. Akken i
rekḍen iẓuran n yiẓuran n yiɣerfan-nsen. Rebban-d aklan i senyeqqaren kan : « Anɛam ! ». Ḥadret ad ten-tamnem a tilemẓiyin
akked yilemẓiyen-nneɣ. Acmumeḥ-nsen d leɛqira bu yigiman n
yiqerra, udem-nsen yettwaɣum s leḥǧab akeddab. Nekni s yiɣerfan,
ur ɣ-d-tṣaḥ ara ula d tisigert-nsen.
Anida-tt tlelli ? Ulac-itt, tufeg truḥ. Anida-tt tugdut ? Ulac-itt,
tettwamḍel deg dduḥ. Anida-ten yizerfan n umdan ? Ulac-iten,
hatenan ttwameḍlen deg tatut yettwattun.
Ass-a, yuɣal uqelmun s iḍarren. Lexdaɛ yeḥkem ṣṣwab, tikerkas
ḥekment tidet, tiselbi teḥkem tazemnit. Ma d lbaṭel amesbaṭli,
yekka-d nnig-sen u d netta i d agellid fell-asen.
Yessefk nekni s yimaziɣen, ad nbeddel iman-nneɣ s yiman-nneɣ.
Yessefk ad nesɛu tadukli n tidet akked tegmat taḥeqqanit. Tewweḍd tegnit ad nbeddel s ayen yelhan u ad neẓẓu lxir akked rreḥma n
Sidi Rebbi gar-aneɣ.
Yessefk ad nezwi takka i yiẓuran-nneɣ, ad nesfezwi leɛqul-nneɣ u
ad d-nessukkes idles akked wansayen-nneɣ seg tatut yettwattun.
Tasertit taɛlayant, talqayant mačči d nnger neɣ d aqeṣṣer. Tasertit d
awelleh n tmuɣli n leɛqel ɣer ṣṣwab, ɣer leɛqel akked lmeɛqul, ɣer
tafrara akked yimal n yiɣerfan. Tafelsafit n yiɣerfan imaziɣen d

- 32 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

acuddu n yimɣan s iẓuran, d asmekti n yizri deg yimir-a u imir-a
deg tlalit n uzekka.
Ḥadret ad tettum a tilemẓiyin akked yilemẓiyen-nneɣ belli d kenwi i
d mmu n wallen-nneɣ, i d asirem n uzekka akked yimal-nneɣ.
Tamazɣa nwen, azekka akked yimal nwen.
Ma yella d nekni, ad ken-nɛiwen s wayen irkelli umi i nezmer.
Ḥadret ad tettum iẓuran-nwen ! Sseḥbibret ɣef yigerrujen-nwen.
Ḥadret iman-nwen seg yizerman akked taḍsa n wuglan. Deffir n yal
amdan, yella umẓiw deffir-s.
Ḥadret ad tettum amezruy-nwen, sseḥbibret ɣef tefsutin-nneɣ
irkelli. Iniget deg usugen n tfelsafit, iniget deg yiẓuran n tussniwin
akked tmusniwin.
Ur ttamnet icenga n yimaziɣen wala tamuɣli yettefriwisen. Tenna-as
tbuzegrayezt : «Ttaggadeɣ ɣef win ileḥḥun deg yiḍ akked win
yettamnen win ukkud ur yeṭṭiḍ ».
Ḥadret tiyita n deffir akked yir tagmat. Am wakken i ɣ-d-ǧǧan anzia lejdud-nneɣ : « I yettwagaden ḥala adɣaɣ uffir akked tyita n deffir
». A tilemẓiyin akked yilemẓiyen-nneɣ, ili-ken d ukyisen, d
izemniyen. Ili-ken d uḥṛicen i yeckukden, s teɣzi d lefhama
tiɛlayanin. Sɛut tadukli u tgerrzem tagmat-nwen.
Tura, meyyzet deg tukkist-a i d-kkseɣ seg tebrat i s-yura Dda
Lmulud Mɛemmri i Muḥend Azwaw ɣef tmusni :

Awer teḍru yid-wen ay at n tura am useklu umi gezmen
yiẓuran : di tazwara zegzaw yifer-is, di teswiɛt sellaw iḍer. Ttejra
mebla iẓuran leqrar-is d tamettant. Awer tilim ay at n tura d isekla
war iẓuran.
Ay Azwaw, ur as-tegg ara algam i tmusni. Anida i ttyessaweḍ lǧehd ufud-is tawiḍ-tt, ma s aggur eǧǧ tamusni ad tali s
aggur ; ma s itran eg-as abrid s itran, ma awan-is d asemḥellaq i
ddunit akked wayen yellan, anef i tmusni ad tsemḥilleq i ddunit.

Tamaziɣt tura – Un 8-9 – H.C.A / yebrir-ɣuct 2011

- 33 -

Tasɣunt s Tmaziɣt n Usqamu Unnig n Timmuzɣa

Taɣawsa tis kraḍ, tamusni, ay Azwaw, d asafu.
D asafu n tafat : eǧǧ asafu ad ifu izuzef tillas.
Tamusni d asafu n wurɣu : eǧǧ asafu ad yesserɣ ayen
yerkan, ayen yeblan akked wayen ur nesɛi iẓuran. Eg-as-d asaber
ɣef wayen yelhan, ɣef wayen yelḥan deg yiberdan d amsebrid mačči
d amenṭran.
Tamusni d asafu : wa yettak-it i wa, i wakken ad yezg dayem yeɛla,
urǧin yettendella neɣ yulwa neɣ yeqqim am uɣerrus di tesga.

- 34 -

Tamaziɣt tura – Un 8-9 – H.C.A / yebrir-ɣuct 2011

Tafsut ass s wass
Tahar BOUKHENOUFA

Yennayer 1980

Aseḥbes n terbaɛt n uẓawan acawi « Azru »
10 Meɣres 1980
Aseḥbes n Mouloud Mammeri di Draa Ben Khedda, deg ubrid-is
ɣer Ummas asdawan n Tizi-Uzzu i wakken ad yefk yiwen usarag
ɣef « Isefra iqburen n teqbaylit » netta akked Salem Chaker.
11 Meɣres
Inelmaden n Ummas asdawan n Tizi-Uzzu refden rray ad kecmen
deg uneḥbus ɣef leqraya. Di yiwet n tikli di temdint n Tizi-Uzzu,
ugar n 200 n yinelmaden beggnen-d asḥissef-nsen mgal aseḥreṣ i dyettilin, u nnan « tamaziɣt d tutlayt-nneɣ ». Iselmaden izzayriyen n
Ummas asdawan n Tizi-Uzzu refden rray ad arun tabrat i uneɣlaf n
leqraya ɛlayen i wakken ad beggnen asḥissef-nsen mgal aqerreɛ n
usarag n Mouloud Mammeri u ad ssutren tilelli n umeslay, ladɣa
ayen yeɛnan tutlayt tamaziɣt.
12 Meɣres
Deg tebrat i uran i uselway n tegduda, inelmaden n Tizi-Uzzu,
ssutren ad yili usnegmu n tutlayt akked yidles amaziɣ, tiririt-ines d
tutlayt tis snat n tmurt.

Tamaziɣt tura – Un 8-9 – H.C.A / yebrir-ɣuct 2011

- 35 -

Tasɣunt s Tmaziɣt n Usqamu Unnig n Timmuzɣa

29 Meɣres
Aseḥbes n Arezki About di tesdawit n Tizi-Uzzu akked Mohamed
Nait Abdellah, Ali Yahia Rachid, imeɣnasen n FUAA. Mohamed
Nait Abdellah yettucareɛ deg uxxam n ccreɛ n yiserdasen n Blida u
yettwaḥbes di lḥebs n Berouaghia.
04 Yebrir
Said Sadi, yiwen seg yimeɣnasen i d-yufraren deg umussu amaziɣ,
yessawel-d ɣer yiwet n tmesbanit ass n 7 di yebrir di Lezzayer
tamanaɣt.
07 Yebrir
Tamesbanit i d-yellan di Lezzayer tamanaɣt, tejmeɛ-d ugar n 500 n
yimdanen, d inelmaden di tugget, iɣallen n laman ḥebsen 117 n
yimesbaniyen gar-asen Ferhat Mehenni akked Hand Sadi. Di Draa
El Mizan, iɣallen n laman qerɛen tikli i d-jemɛen yinelmaden n
tesnawit akked yilemẓiyen. 70 gar-asen ttwaṭṭfen. Di Paris 500 n
yimdanen ffɣen-d deg yiwet n temsbanit i ubeddi ɣer yidis n
yimeɣnasen n umussu amaziɣ.
08 Yebrir
Inelmaden gezmen-tt di rray ad kecmen deg uneḥbus ɣef leqraya u
ad ṭṭfen ammas alamma tella-d tririt ɣef wayen ssuturen (aserreḥ n
wid akk yettwaḥebsen, aselmed akked usteɛref s tmaziɣt, tilelli n
umeslay). Deg unejmuɛ-nni tufrar-d yiwet n terbaɛt mgal aseḥreṣ,
tarbaɛt-agi tesdukel 65 n yiɛeggalen gar yinelmaden akked
yixeddamen, ferqen ɣef 4 n tesquma :
- Aseɛlem akked usezdi ;
- Leqdic adelsan akked tɛessast ;
- Assaɣen unṣiben (lwilayat akked yiɣallen n laman) ;
- Assaɣen warunṣiben (taɣamsa, tisdawiyin, tikebbunay).
Di Lezzayer tamanaɣt, kra n yilemẓiyen ɛerḍen ad lḥun ɣer uxxam
n yiɣallen n laman i wakken ad ssutren aserreḥ n yimdukal-nsen.

- 36 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

09 Yebrir
Imunan n CFPA n Tizi-Uzzu ɛerḍen ad heggin yiwet n tikli i
wakken ad beggnen lɣiḍ-nsen ɣef temḥeqranit i d-yesseɣli udabu
ɣef tutlayt akked yidles amaziɣ, maca inelmaden akked yiselmaden
n ummas asdawan ur bɣin ara ad tili tikli-nni i wakken ur d-yettili
ara ugar n useḥreṣ fell-asen. Tasqamut mgal aseḥreṣ n Tizi-Uzzu
tger-d tiɣri i yimezdaɣ i wakken ad meyyzen ɣef wayen akk
yettaɛraḍ udabu akked yiɣmisen-is ad t-id-fken d isalan d tikerkas
ɣef umussu.
10 Yebrir
Deg wass wis tlata n wazduɣ n ummas asdawan, lwali n Tizi-Uzzu
ihegga-d yiwet n tmesbanit i d-ijemɛen azal n 2000 n yimdanen. Di
tesdawit n Lezzayer, ɣas akken yella-d umgarad gar yinelmaden
yeddan akked UNJA/CNE akked wid yellan d imeɣnasen n
umussu amaziɣ, ineggura-agi xedmen yiwen n yibeddi zdat n
tnemhalt n tesdawit beggnen-d lɣiḍ-nsen mgal aseḥreṣ i d-yettilin
ɣef umussu amaziɣ. Ibeddi-nsen ɣer yidis n umussu n Tizi-Uzzu.
Ssutren s usteɛref s tutlayin akked yidelsan iɣerfanen (tamaziɣt
akked taɛrabt n Lezzayer). Ssutren ad yili uqadar n tlelli n umeslay.
11 Yebrir
Tuzzya n ummas asdawan n Tizi-Uzzu sɣur iɣallen n laman i
wakken ad qarɛen isnawiyen, iselmaden akked yixeddamen yebɣan
ad kecmen ɣer tesdawit.
12 Yebrir
Deg ugerzu n Bgayet, necɛent acḥal n tmesbaniyin imi yettwaqareɛ
Ferhat Mehenni (Imaziɣen Imula) ad yecnu di Sidi Aich.
13 Yebrir
Tesɛa n yiselmaden n tesdawit n Tizi-Uzzu rzan ɣer tneɣlaft n
uselmed ɛlayen i wakken ad mlilen akked mass Brerhi i sen-dyefkan tinubga. Imunan akked yisnawiyen n Tizi-Uzzu dduklen di

Tamaziɣt tura – Un 8-9 – H.C.A / yebrir-ɣuct 2011

- 37 -

Tasɣunt s Tmaziɣt n Usqamu Unnig n Timmuzɣa

tesdawit i wakken ad mmeslayen akked yinelmaden ɣef wayen
iḍerrun. Imejjayen akked yixeddamen n Sbiṭar Neddir Mohamed n
Tizi-Uzzu gezmen-tt di rray ad ḥebsen axeddim i wakken ad
beggnen ibeddi-nsen ɣer yidis n yinelmaden akked yiselmaden n
tesdawit n Tizi-Uzzu.
14 Yebrir
Deg wass wis sebɛa n wazduɣ n ummas, Brerhi, aneɣlaf n leqraya
ɛlayen, yerza ɣer Tizi-Uzzu netta akked yiɛeggalen n tiddukla n
yixeddamen n Eléctronique akked tin n yiselmaden n tesdawit,
yemmeslay akked yinelmaden, yenna-asen d iḥerkiyen i yellan deffir
umussu n yimaziɣen.
15 Yebrir
Yiwen seg yixeddamen n lluzin n Oued Aissi yettwaṭṭef sɣur
yiserdasen imi yella yeṭṭef gar yifassen-is kra n yiḍrisen yeɛnan
tamaziɣt. Zdat tedyant-agi, ixeddamen n lluzin ṭṭfen aɛeggal n
ukabar FLN akked yiwen unemhal n SONELEC i wakken ad
ssutren aserreḥ n umeddakel-nsen.
16 di Yebrir
Imeɣnasen imaziɣen berrḥen-d i tikkelt tamezwarut deg umezruy n
Lezzayer tamunnant ɣer uneḥbus amatu n lxedma. Imezdaɣ n
tmurt n leqbayel rran-d i teɣri u suddsen-d yiwet n tesqamut
taɣerfant i yesduklen iɛeggalen n tkebbaniyin akked yiɣerbazen.
Aneɣlaf n uselmed deg tebrat i iceyyeɛ i yinelmaden akked
yiselmaden n tesdawit n Tizi-Uzzu, yessawel ɣer tuɣalin ɣer
uselmed ass n 19 di Yebrir. Iwehha-d ɣer yinelmaden akked
yiselmaden ara ibeddlen timsirin.
17 Yebrir
ilmend n temlilit tis 6 ɣef usiɣwes id d-yelan deg waɣṛem n tmura,
aselway Cahdli Bendjedid yemmeslay-d ɣef tedyanin n tmurt n
iqbayliyen d Lezzayer tamanaɣt, yenna-d “nekkni d aɛṛaben nebɣa

- 38 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

naɣ nugi, nettiki ar tɣeṛma taɛṛabt tineslemt,, ihi Azzayri ur yesɛi
ara tamagit nniḍen”.
18 Yebrir
Ferhat Mehenni, yiwen seg yimeɣnasen n umussu adelsan amaziɣ,
yettwaḥbes deg unafag n Lezzayer.
19 Yebrir
Deg wass wis 12 n uzduɣ n CUTO1 agraw amatu n yinelmaden,
iselmaden akked yixeddamen suddsen-d tlata n tesquma :
- Tasqamut tasduklant n yixeddamen akked yinelmaden ;
- Tasqamut n tlelliyin timagdayin ;
- Tasqamut n useddu n umussu.
Di Lezzayer tamanaɣt, inelmaden dduklen di tesdawit tallemast
zzin-asen yiɣallen n CNS2 rnan-d ɣer-sen kra n yinelmaden
ibaɛtiyen yebɣan ad ssuffɣen inelmaden-nni imeɣnasen di tesdawit.
20 Yebrir
Deg yiwet n temhelt i wumi sawlen Mizrana, iɣallen n uqmaḍ
akked yiǧadarmiyen kecmen ɣer uɣrem n tesdawit n Tizi-Uzzu
anda sḥebsen iselmaden ladɣa wid yeɣran di Fransa. Ula d lluzin n
SONELEC n Oued Aissi akked sbiṭar Neddir Mohamed n TiziUzzu kecmen-ten yiɣallen n useḥreṣ. Tamhelt-agi tegla-d s useḥbes
akked ujraḥ n ugar n 443 n yimdanen.
21 Yebrir
Tidyanin n 20 Yebrir ssekrent-d lɣiḍ n yimezdaɣ di yal tamnaḍt n
tmurt n leqbayel yettwaɛezlen. Imezdaɣ n tudrin i d-yezzin i
temdint n Tizi-Uzzu udren-d ad qablen iɣallen n yimsulta. Axxam
n ccreɛ n Leqṣer (di Bgayet) yeḥkem ɣef 21 n yimeɣnasen
yettwaṭṭfen seg useggas ar 5 yiseggasen n lḥebs. Wigi d : Boualem
Saadi, Smail Kherbache, Abdelmadjid Benkaci, Abdelkamel
1
2

Ammas Asdawan n Tizi-Uzzu (Centre Universitaire de Tizi-Ouzou).
Iɣallen n uqmaḍ « useḥres » (répression).

Tamaziɣt tura – Un 8-9 – H.C.A / yebrir-ɣuct 2011

- 39 -

Tasɣunt s Tmaziɣt n Usqamu Unnig n Timmuzɣa

Athmani, Mustapha Derradji, Yazid Meslem, Abdelhafid
Benmouhoub, Abdenour Oumbiche, Arab Haddad, Boubkeur
Djemai, Rabah Ramdani, Amar Boudraa, Hamid Zaidi, Rabah
Keroui, Lakhdar Boukeroui, Malek Bouzidi, Mebrouk Kernou,
Mouloud Khatri, Abderrazak Felgoul, Amar Attala, Mohamed
Khenouci.
28 Yebrir
Iqeddawen, iselmaden akked yinelmaden n tesdawit n Lezzayer deg
yiwet n tebrat i uran i udabu wwten-d deg uqmaḍ i d-yettilin di
tmurt n leqbayel u sfehmen-d ayen akken ssutren yimeɣnasen
imaziɣen akked uzref n yal amdan di tmurt-is. Ar taggara ssutren
ad yili umeslay ɣef uguren idelsanen n tmurt i wakken ad tili tdukli
taɣelnawt s tilawt.
17 Magu
Aneɣlaf n teɣdemt deg ulɣu-ines i APS1 iberreḥ-d s yismawen n
yimeɣnasen yettwaḥebsen imi d nutni i yellan deffir n ccwalat n
Tizi-Uzzu. Wigi ad twacerɛen deg uxxam n ccreɛ n Medéa.
19 Magu
Yella-d usunded amatu di Tizi-Uzzu.
24 Magu
Inelmaden n tesdawit Houari Boumediene kecmen deg usunded i
wakken ad beggnen ibeddi-nsen ɣer yidis n yimeḥbas n tefsut
imaziɣen.
26 Magu
Inelmaden n tesdawit n Tizi-Uzzu uɣalen ɣer temsirin.

1

Takebbanit n yisalan.

- 40 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

31 Magu
Aneɣlaf n uselmed Brerhi yemlal inelmaden n tesdawit n Tizi-Uzzu
deg yiwen n ugraw ameqqran ideg i d-yenna belli ayen ssuturen d
lḥeqq maca d anamek n usuter i yeǧǧan adabu ad yerr s aqmaḍ.
25 Yunyu
Yella-d userreḥ i 24 n yimeɣnasen-nni yettwaṭṭfen di tedyanin n
Yebrir.
Seg umezwaru ar 31 Ɣuct
I tikkelt tamezwarut deg umezruy n Lezzayer yella-d usqerdec, di
tugdut akked tlelli n umeslay, n temsal icudden ɣer tmagit, idles,
aselmed akked usegmi di tmurt, berra i tsuddsiwin n udabu.
Annect-a yella-d di temlilit n Yakouren, tin i d-yesduklen
imeɣnasen n umussu adelsan amaziɣ d tugdut, llan gar-asen
yismazrayen, isnalsiyen, inelmaden, iselmaden, inmalayen akked
yimdanen yettnaɣen ɣef tugdut akked yizerfan n umdan i wazal n
waggur.
Timilit ar taggara-s teffeɣ-d s yiwen uḍris d taḥawact n wuguren
icudden ɣer yizerfan idelsanen akked wid n umdan s umata
yessaramen tugdut. S wakka, iɛeggalen rẓan asalu i yizerfan n
tugdut di Lezzayer akked tmazɣa s umata.

Tamaziɣt tura – Un 8-9 – H.C.A / yebrir-ɣuct 2011

- 41 -

Ussan-nni deg tesdawit
Ramdane ABDENBI
Yebrir 80,
d tafsut n yimaziɣen,
d tafsut n tlelli akked usirem,
d tafsut i d-yessakin tafrit n yizzayriyen.
Di tazwara

A

ṭas n umeslay i yellan ɣef yebrir n 80. Uran-d
yimeɣnasen, imeskaren... akked yisdawanen ɣef
yineḍruyen n tefsut n yimaziɣen di yal amuli. Yal mi
ara sen-tettunefk tegnit, widen yeddren taluft-nni i d-yeɣlin ɣef
leqbayel di yebrir-nni, ad dlun ɣef ccfaya-nsen i wakken ad rren
tawwurt n tatut ɣef tallit-nni i yeldin tiwwura n tugdud akked tlelli
ɣef Lezzayer akked yizzayriyen. Ttewten neɣ ttwaḥebsen, d inagan
n umezruy ɣas akken d leɛmer n yiwet n tsuta i yezrin... 31 d
aseggas ma drus !
D amzruy n tutlayt yugin tamettant. Tutlayt ur nettwaru.
Tutlayt yeddren s wawal deg yidurar, deg yiɣeẓran, deg lexlawi, deg
tliwa, deg tejmuyaɛ, deg leḥwari, deg yixxamen, deg yimawen n
tyemmatin-nneɣ... D tutlayt tayemmat iɣef d-kkren i wakken ad
inin i yimḍebbren n tmurt tidet n tmetti tazzayrit.
Nitni nnan-d s tikli, isuɣan akked yifassen ilmawen, lḥekkam slan...
rran-asen-d s « umxix », maca d acu i xedmen i wakken ad d-

- 42 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

skeflen llsas iɣef tebna tmurt ? Llsas-nni i neṭlen s yisem n ddin
akked taɛrabt !
Ar iḍ-a ayen akken i ssutren mazal-it yettwaɛelleq am
uɛeqqa n uzemmur ɣer tciṭa n tzemmurt. D tidet, tamaziɣt « ula d
nettat » d tutlayt taɣelnawt, maca deg yisem kan... imi tilawt la dteqqart ayen nniḍen...
Di tefsut-nni
Di tesdawit n Tizi-Uzzu, mačči d tarbaɛt n « warrac »
iḍacen i yebɣan ad cewwlen tamurt dɣa fkan-tt i jjiḥ, rran-tt i
tikliwin, isuɣan, inejmuɛen akked usexreb n wayen tekseb ddula…
Mačči d urar i bɣan ad uraren seg wakken xaqen neɣ d takerḍa iɣef
la ttnadin i wakken ad ččaren leǧyub-nsen...
Mačči ɣef yiɛebbaḍ-nsen i d-kkren ad nadin ɣef tawant neɣ d laẓ i
uggaden ad yeẓmi tikerciwin-nsen...
Mačči d « afus aberrani » i ten-id-inebcen i wakken ad sṭerḍqen
tamurt iɣef yemmut umelyun akked uzgen n umelyun n yimeɣrasen
neɣ ad ssiɣen times di talwit ideg ttɛummun yizzayriyen...
Mačči d tagrawla neɣ d tigrawliwin yettemseḍfaren di yal taɣult i
bɣan ad tent-rẓen...
Ur nudan ɣef win ara sen-yefken tijɛal, ur nudan ɣef win ara senyerren tajmilt. Fursen tagnit ideg tella liḥala n tmurt s umata akked
teswiɛt-nni ideg yettwagdel wahil i d-heggan i Dda Lmulud i
wakken ad asen-d-yemmeslay ɣef « Isefra iqburen n teqbaylit » i
wakken ad d-tebbeɛzaq tidet i ffren deg wulawen-nsen am nitni am
leqbayel nniḍen.
Imi tikli... akked usuɣu weḥd-nsen ur ttqiddin ara, di
taggara yettuḥettem fell-asen ad rren asuter-agi merra akked wayen
i ten-iceɣben ɣef lkaɣeḍ i wakken ad d-ǧǧen lǧerra ara ḍefren widen
ara d-ileḥqen. Widen yeddren tafsut, widen yettekkan deg-s mlalen
i wakken ad d-tlal « temlilit n Yakouren » deg ɣuct 1980 i wakken
ad rnun tama tasertant i tama taɣerfant, tussnant yellan d aẓar n
tnekra n yebrir 80.

Tamaziɣt tura – Un 8-9 – H.C.A / yebrir-ɣuct 2011

- 43 -

Tasɣunt s Tmaziɣt n Usqamu Unnig n Timmuzɣa

Di temlilit n Yakouren
Mlalen yimusnawen n yal taɣult, imazrayen, isdawanen,
iselmaden... akked yiɣerfanen i wakken ad d-heggin tiɣerɣert n
Yakouren ideg yella merra wayen ssuturen. Mlalent tmuɣliwin
yemgaraden n widen yennejmaɛen i wakken ad nadin ɣef wayen
ixuṣṣen, ad kksen timenqas yellan i wakken ad d-yefrari yidles
amaziɣ i ffren yimḍebbren n tmurt ɣef yizzayriyen merra.
Ṛeggmen-asen lḥekkam tifrat... maca awal-nni yewwi-t waḍu...
yeggra-d kan umeslay-nni i sen-d-qqaren « tamaziɣt ur tezmir ara i
tussna akked tmusni », « tamaziɣt tebḍa tamurt »... « tamaziɣt d
tawessurt ur nezmir i tatrara »…
Wagi d kra seg wayen i yellan deg tɣerɣert n Yakouren :
- Ulac tutlayt « tameqqrant » akked tutlayt « tameẓyant » ;
- Ulac lebɣi asertan i wakken ad taf tmaziɣt amkan-is ;
- D tutlayt tayemmat i ilaqen i warrac deg uɣerbaz ;
- Ilaq ad tili tɣamsa s tmaziɣt ;
- Ilaq ad yili umezgun, ssinima, taẓrigt akked uselmed s tmaziɣt ;
- Tamaziɣt d tutlayt n tasekla, tussna akked tẓuri ;
- Izerfan n umdan d llsas n yal tamurt ;
- Aserreḥ i yineɣmasen i wakken ad sselɣun ;
- Azuzzer n wallalen n talɣut akked widen n udabu ɣef tmurt n
Lezzayer merra ;
- ...
Di taggara
Timetti taqbaylit ur tesbik ara. La tettbeddil, la tetteddu, la
tettnadi ɣef wayen i tt-iwulmen akked wayen akk yellan d amaynut.
Maca rran-as tilisa, ur tezmir ara ad tezger afrag yellan gar-as akked
tudert tatrart. Ẓerrben lḥekkam timetti akked tmurt s yisem n ddin
akked tegrawla. Ɣas akken, ilul-d usirem. Gan-as llsas widen yukin,

- 44 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

gerrzen-as afud yesɣersen leqyud n ddel i icudden leqbayel.
Tebbeɛzaq-d teɣri : Haroun, Bessaoud, Mammeri… akked tesdawit
n Tizi-Uzzu yeffeɣ-asen leɛtab ɣer tafat di 20 yebrir 1980… Iban-d
ubrid. Kksen asergel, kksen afrag i wakken ad ɛeddin wiyaḍ.
Wiyaḍ-agi d nekni. I nekni tura acu i nexdem s wayen i ɣ-d-ǧǧan ?
Amek i teḍra d ubrid-nni i fersen ?
Amezruy ur yettsemmiḥ ara. Ayen i ijerred ur t-seffḍen ara.
Ad t-ffren, ahat, maca ad d-yaweḍ wass ideg ara d-iban. Si 1980
armi d 2011, nwala sani tessaweḍ tmaziɣt, tutlayt tayemmat yellan d
« amihi » ɣef tmurt, tutlayt-is tunṣibt, ddin-is akked tegrawla-s.
Nwala anda i d-teggra tmetti tazzayrit. Nufa ayen akken i ssutren di
Yakouren mazal-it ar iḍ-a d tira kan imi ass-agi imḍebbren n tmurtnneɣ la ɣ-d-qqaren « uguren-nneɣ deg uɛebbuḍ kan i llan, ma d
widen n tsertit ur sɛin ara tilin ».
I ccfaya, i wakken ur ntettu ara imenza-nneɣ, widen i ɣ-dyessakin s tigawt, s usefru, s tezlit, s udlis neɣ s wawal, widen igan
llsas i tnekriwin i d-iḍefren, nessaram ad d-iban ubrid i yal timlilit
ara d-yilin ɣef tmaziɣt akked tmazɣa, ɣef yidles akked tgemmi,
nessaram ad yili ugar n waya.
Ɣas akken cwiṭ kan i d-yuddamen, maca amennuɣ
yettkemmil...

Mazal lxir ɣef zdat...

Tamaziɣt tura – Un 8-9 – H.C.A / yebrir-ɣuct 2011

- 45 -

Tasɣunt s Tmaziɣt n Usqamu Unnig n Timmuzɣa

- 46 -

Tamaziɣt tura – Un 8-9 – H.C.A / yebrir-ɣuct 2011

Tasɣunt s Tmaziɣt n Usqamu Unnig n Timmuzɣa

Tamaziɣt tura – Un 8-9 – H.C.A / yebrir-ɣuct 2011

- 47 -

Tasɣunt s Tmaziɣt n Usqamu Unnig n Timmuzɣa

- 48 -

Tamaziɣt tura – Un 8-9 – H.C.A / yebrir-ɣuct 2011

Tamaziɣt ass-a
tajmilt i yimezwura1
Hamid BILEK

A

kken yebɣu yiɣzif yiḍ, leqrar-is ad yali wass.
Iseggasen ttɛeddin imulliyen wa yeṭṭafar wayeḍ ,
mkul tafsut s tefsut-is, yal tafsut s rrebḥ-is, tɛedda
tefsut n tmanyin, tetbeɛ-itt-id tefsut taberkant. A d-assent tiyaḍ, ad
ddunt deg uzamul n tid iɛeddan, imi abrid i d-neǧrent d win n
tugdut, d win n tlelli, d win n tmaziɣt…
Abrid si tefsut n tmanyin armi d ass n wass-a, tedda deg-s tmaziɣt
amecwar ɣezzifen, ulama yenneḍ, ulama yeččur d isennanen, d
iɛekkuren, anida d irgazen i yettwaḥebsen, d tirwiḥin
i
yettusebblen. Tɛedda tedyant n tmanyin tusa-d tin n xemsa u tesɛin
anida azal n umelyun imeɣriyen i iḥebsen ɣef uɣerbaz, sebblen
aseggas n tudert-nsen, aseggas deg uzekka-nsen i wakken ad
skecmen tamaziɣt ɣer uɣerbaz. Di tefsut taberkant mmaren
idammen n wacḥal d ilemzi…
Ass n wass-a, ahat wid inuḍḥen seg iseggasen n 40 d 50, wid n
iseggasen n 60 d 70, ur ttamnen ara iman-nsen mi ara walin anida
yessaweḍ umennuɣ-nsen, amennuɣ mi id terfed dderya-nsen.
Tɛedda tallit anida Dda lmulud, azamul n tmaziɣt yettwaḥbes,
ugin-as ad d-yawi assarag di Tizi-Ouzou, ɣef tigemmi tamaziɣt, ɣef
isefra iqburen n teqbaylit. Yeḍra wayen yeḍran, yedda zman, Ass-a
aɣmis-nni it iregmen yuɣal yettzuxu s tmusni-ines, yettmagar,
1

Yeffeɣ-d uḍris-a deg wuṭṭun 5 n tesɣunt « Tamaziɣt Tura ».

Tamaziɣt tura – Un 8-9 – H.C.A / yebrir-ɣuct 2011

- 49 -


Tamazight Tura_8-9.pdf - page 1/202
 
Tamazight Tura_8-9.pdf - page 2/202
Tamazight Tura_8-9.pdf - page 3/202
Tamazight Tura_8-9.pdf - page 4/202
Tamazight Tura_8-9.pdf - page 5/202
Tamazight Tura_8-9.pdf - page 6/202
 




Télécharger le fichier (PDF)

Tamazight Tura_8-9.pdf (PDF, 3.6 Mo)

Télécharger
Formats alternatifs: ZIP



Documents similaires


timmuz a 13
tamendawt 2016 s tmazight
am tmeqqunt n tje igin
tamazight tura 4
tirawalt n tmazi t l orthographe de la langue berbere
tamazight tura 5

Sur le même sujet..