Ula deg wawal Inzan n Teqbaylit

Amaréne Hammou

Ula deg
wawal...
Inzan n Teqbaylit

HCA, 2012

A Rebbi semlilaγ-d d widen iγ-yifen,
ad nettεanad ad t-naweḍ
wamma widen i d-nemsawa,
ula w irefden wayeḍ

TAJMILT I :

-Yemma, TASSADIT SAOUDI,
-Σemti, AMARENE LOUIZA,
-Massa, BACHIR MELAID.

ABUDDU :
Adlis-agi ad tbuddeɣ i:
Baba d yemma,
Tamettut-iw,
Akked warraw-iw INAS akked LAKHDAR

TANEMIRT I:
I yal win id yegren afus-is, yeqreb neγ yebεed.

I-Tazwart :
“Win yebγan ad yerwu, yečč s ufus-is”, d awal i dğğan imezwura d nnkuẓ i win yettkalen γef wiyad. Nek
iwiγ-t-id, iwakken ad d-ssegziγ d akken Imaziγen ur ilaq
ara ad tteklen γef uberrani ad sen-yesseflali Tamaziγt.
Ala nekkni i izemren ad tt-nesseflali, ala nekkni i
izemren ad tt-nessali s igenni. Meεna s wacu ?
Yeshel maḍi !
At zik ḥerzen-tt d leqrun-aya, wa yeqqar-itt i wa,wa
yettağğa-tt-id i wa, s wawal, s isefra, s tmucuha, s
temseεraq, s yenzan…atg. Ass-a nesεa-yas tira, nesεa-yas
aṣaduf, nesεa-yas idles, nesεa-yas iqerra, nesεa-yas akk
acu teḥwağ tutlayt iwakken ad ttenerni. Ihi ur ilaq ad dnaf tafakult iwakken ur tt-nettaru wara. Ass-a Tamaziγt
tezmer ad ttenerni nnig tutlayin nniḍen, ma ncemmer i
iγalen-nneγ, u neldi tiwwura i wallaγen-nneγ.
Tamaziγt, ilaq ad as-d-nerr ttar, seg ihwah n leqrun
i tquzem, si maḥyaf n yemharasen yerran tamurt-nneγ
am tqerrabt. Ulac win ur tt-id-nzur. D acu ma ttzurun
medden tiqerrabin, ttawin ddeεwat n lxir, ttağğan
lewεadi. Imharasen ttzurun-aγ iwakken ad awin tamusni
d tbaγurin u ttağğan-aγ-d imeṭṭawen d unezgum. Almi
tameslayt-nneγ di leεmer-is tḍebber deg uxxam-is, γas
ulamma d nettat i d lal-is.

-7-

Tiririt n ttar : zik, s trad, s treggaγt, s cwal. Ass-a s
wallaγ, s tmusni, s tira d tikta. Alma nessufeγ Tamaziγt
γer tizi.
Tamaziγt ilaq as-d-nerr azal, d nettat i d yemma-s n
tutlayin, d aẓar i seg i d-frurint akk tmeslayin. Aṭas i s
yeqqaren Tamaziγt tekk-ad si Tefniqt, γas ulamma s tidet
d Ifniqiyen i yeqḍan si ssuq n umaziγ, γas ulamma d
Ifniqiyen i igemmren tamusni sγur Imaziγen, γas
ulamma d nutni i yugmen iman (ṛṛuḥ) seg ugellal n
Imaziγen... Yak yal amharas akka i yeqqar !
Ula deg wawal : " Ttεennin medden isiεi yettnawal deg

rfayes, wama i wmezluḍ meskin d acu-tt lfayda-w
γures?".

II-Awal γef udlis-agi :
Tikti tamezwarut i d-yusan s allaγ-iw d ass mi i γriγ
adlis n mass Meqran Cemim deg useggas n 1993, i wumi
yefka azwel : (Aḍar iteddu s aẓar). Syin akkin tusa-yi-d
tikti ad d-semmdeγ ula d nek inzan seg ẓriγ iman-iw
ssneγ kra, u zemreγ ad d-gemmreγ γer medden awac
ttγimiγ d imeqranen u smuzguteγ nezzeh i wacu id dttmeslayen.
Tis snat d asmi i d-gemmreγ ddeqs n yenzan, tlul-d
tikti n tira. U d nettat akk iyi-demmren almi uẓeγ di
leqdic-iw. Leqdic-agi i yi-wwin azal n krad iseggasen.
Awac nudaγ aṭas n temkerḍiyin d waṭas n yedlisen i
wakken ad ssizedgeγ inzan i d-gemmreγ seg wid i dyeffγen yagi deg yedlisen i d-uran wiyaḍ am udlis n mass
-8-

Σebdennur Σebdeslam, d udlis n mass Yusef Nasib i dyeffγen ilmend n "Useggas n Lezzayer di Fransa", neγ
adlis n mass Taher Hamadac; rnut γer-s kra n yedlisen

nniḍen i d-yeffγen s Taεrabt neγ s Tcawit. Гas ma llan
kra i wumi i d-ulseγ, s unamek-nsen. Ahat γurneγ
ttwannan s tenfalit yemgarden γef tin i d-yusan yagi deg
yedlisen-agi i d-bedreγ, neγ yella kra n weftus i idersen
nek rriγ-t-id.
Tis krad d azwel i yas-fkiγ i wedlis-a, ( Ula deg
wawal…) yellan d aḥerfi kan meεna yesεa anamek.
Azwel-agi bγiγ-t ad yili acku neqqar-it s tmeslayt-agi
nneγ kan, awac win yekkren γer wayeḍ ad as-yini : " ula
deg wawal", zun " am akken yella deg wanzi ". Tabeε
akka i d-wwiγ ula d inzan-agi war ma skecmeγ-asen
tasremt¹ ulag ad asen iruḥ unamek-nsen d cbaḥa-nsen.
Am akken ara yaf win ara yeγren adlis-a tafelwit usegzi n
imeslayen, n tedyanin, n wudmawen imechayen² d kra n
imeḍqan ur nettwassen ara.
AMARU

-9-

III-Awal γef yenzi ?
Anzi d awal i d-yettwannan s nnkuz u yesεa azal
meqqer, d awal igan d lemri i wayen yeḍran yagi deg izri.
Awac yettara-yaγ-d tignatin yeḍran acḥal aya fell-asent, d
timuddirin, m yal mi ara d-temlil d tegnit yunzen γursent. D awal wezzilen di tinawt³ d tira, yeqqen s tmeẓla⁴
γer tikta, yeskan-d tigzi n wemdan d tfelsafit-is di
tmeddurt gar-as d tmetti-yis.
Anzi d awal id-yenna yiwen, yuγal yuzzel akk deg
ilsawen n wiyaḍ. Tikti itteddem, tseggem, d timeswit, u d
tamḥazit. Anzi, yeskan-d tikli n wemdan, yeskan-d
tansayin-is neγ tigad n ugdud s umata, neγ tigad n
taddart d udrum... atg, am akken daγen id-igellu isriren⁵
d isallen neγ amezruy s umata. U yettlal-d si krad n
yegnan : - Asefru - Tamacahut - Ameslay.
1- Asefru:
Deεwessu n lwaldin tewεer
tgezzem am terṣaṣin
wa teffeγ-as di dderya
yectaq tiγimit di sin
wayeḍ teffeγ-as di sεaya
ur yeṛwi tibexsisin
wayeḍ teffeγ-as di ccada
awal n Rebbi ur t-yessin.

- 10 -

2- Tamacahut:
“Yesker, yesker, nnig wakka d inker” i tenna tḍeggalt i
uḍeggal.
Anzi-yagi ttawin-t-id medden γef yiwen d amaynut
i yessulyi. Tuγ yagi taḍeggalt-is tesseḥrec yelli-s amek ara
texdem i wergaz-is i wakken ad t-rnu. Sebεa wussan n
teslit zrin, dγa tekker ad d-εel imensi. S imi yewwa,
tekker tefka-t i wergaz-nni-ines ad t-yawi i yemma-s
nettat ad t-eεreḍ ma yesker neγ ala. Yuγ lḥal ixxamennsent mbaεaden, yiwen si rif-a wayeḍ si rif-in. Tiwin n
imensi i tḍeggalt tikelt-a tamenzut tefka-yas-t-id di
“teccuyt”. Argaz ameγbun, yerfed taccuyt, yekker
yessaker iḍaren-is si rrif n taddart ar wayeḍ, win iεeddan
iwala-t, tajmaεt twala-t. Asmi yiweḍ γer tḍeggalt yefkayas taccuyt dγa tin teddem-d tijγelt teεreḍ cwiṭ dγa
tenna-yas : ” In-as yesker meεna ixuṣ cwiṭ”.
Kra wussan kan tekker daγ s imensi asmi yewwa,
tekker tefka-yas-t-id di tḍebsit iwakken ad t-id yawi i
tḍeggalt-is ad t-eεreḍ. Am tikelt tamenzut, yerfed
taḍebsit yegla iḍarren-is γer tḍeggalt. Asmi yiweḍ, yefkayas taḍebsit-nni dγa tin teεreḍ cwiṭ u tenna-yas : “Ass-agi
daγen yesker nnig umezwaru d acu mazal cwiṭ, wissen
acu-t uεeqqar is-tesxas”.
Tikelt taneggarut tekker teslit s imensi , asmi
yewwa, terfed tijγelt teččur-as-tt-id u tefka-yas-tt i
wergaz ameγbun ad tt-yawi i tḍeggalt ad teεreḍ imensi n
yelli-s.
- 11 -

Akken kan yekcem di tewwurt, tmugger-it-id tḍeggalt
tekkes-as tijγelt teskef-itt u tenna-yas : ” In-as i yelli,
yesker, yesker, nnig wakka d inker”.
3- Ameslay : - S wudem n umeḥṛum !⁶
Yettwanna, mi ara iɛeṭṭel yiwen ur d yerzi ara fellaγ, dγa ass mi ara d-yejbu, ad nessensef yes nezzeh
meεna ad nezimmet fell-as, dγa ad as-nini : ” s wudem n
umeḥṛum !” amzun nebγa ad s-nini "Ayγer i tεeṭleḍ ?"

IV-Iswi d tenfalit n yenzi
Anzi s umata yessebgan-d aswir adelsan n yal
timetti, tikta n ugdud, tanellayt-is⁷, tameslayt-is,
amezruy-is, ...atg.
S yenzi nezmer ad nẓer anda yessaweḍ wegdud tamusniyis, ma d ilelli neγ ala, ma yesεedda yir tmeddurt neγ ala
...atg. Anzi yeskan-d udem n tidet n ugdud deg yal akud
u deg yal taγult⁸.
Inzan n teqbaylit unzen γer tmenḍawt neγ γer
isuḍaf n tmetti. Wa inehhu, wa yettweṣṣi, wa yettṛebbi,
wa yiwi-d isalli, wa d amezruy … atg. Ulac anzi ur
nessikir ara allaγ n umdan γer axemmem d uxebbel γef
tidet tusnant⁹. U annect-a yuγal γer-s amdan Amaziγ
yessnen nezzeh ad yesseqdec tutlayt-is deg yenzan-agi :
1°- Yesseqdec allaγ-is s ubrid amek ara d-yessiweḍ izenis¹⁰ s talγa tarusriḍt¹¹ si zik ar ass-a.
- 12 -

2°- Yesseqdec Tamaziγt-is s usdukku¹² n waṭas n
wawalen deg yenzan ; wid izemren ad d-gen amawal
s timmad-is.
3°-Yeǧǧuba-d abrid i s ara yeḥrez taγerma-yis seg yal
amharas d yal acengu.
S krad n yejga-yagi i teqqim Tamaziγt tettwaḥrez ar
ass-a u tquzem leqrun d yir talliyin.
Aṭas n yefran¹³ id-yessenfalay yenzi di tikta
itteddem, aṭas n nnkuz i d-igellu : ti erci, tigzi, ṭṭmeɛ,
adres, tidet, asirem ...atg.
- Ti erci : - Ffer awal ar d-yas wass-is.
- Tidet : - Dunnit am teḥbult n uγrum, ur tettewwa ara

γef yiwen wudem.

- Asirem : - Awah yiwen d nek yiwen am ek, ad nexdem

taxxamt i deg wer yelli ccek.

Am akken i d-gellun yenzan s waṭas n tedyanin i
wumi ur neḥdir ara nekkni. D tidyanin tiqburin nezzeh,
walit-ett kan di temεayt i d-ttawin Leqbayel γef tiḥerci n
inisi d tkerkas n wuccen, asmi icerken tibḥirt, dγa asmi i
d-yeḥder beṭṭu, kkren ad bḍun s leεmer; win meqren d
netta ara yextiren d amezwaru d acu ara yeddem, ihi
Mḥemmed ¹⁴ bu tkerkas iγil yeḥrec seg i t-yesteqsa inisi
γef leεemr-is dγa yenna-yas :
- 13 -

"cfiγ asmi ilul jeddi !". Din inisi yerra-yas :" d aya ? Nek
cfiγ i wasmi yeqqur lebḥer !"
Si tama n umezruy mačči d kra n yenzan i yellan
ttmeslayen-d γef kra n tedyanin, am " Lfetna n
Meryem"¹⁶ yeḍran di lεerc Amceddal¹⁷ di lweqt n Turk,
neγ amennuγ n leεrac n tama tasammart n Tubiret¹⁸.
Aṭas deg yenzan n teqbaylit i yeqqnen γer tesreḍtnneγ (Ddin), mačči yiwen mačči sin n yenzan i dyettmeslayen deg umḍiq n ddin segmi imdanen ur ssinen
ara taεrabt. Ihi ahendaz¹⁹ aqbayli ixemmem amek ara
sen-d-yessegzi ddin s useqdec n yenzan d isefra d
tmucuha. Walit anzi-yagi :

- “A laxert am uxertum, a taberkant uqadum, amaqwa n
win ibeṭṭun aksum d uγrum”.

Am akken i d-ttaddren daγen timεemrin d teqerrabin i s i
tettwassen tmurt n Leqbayel s umata d tama n Tubiret
ladγa, am Yemma Xliǧa²⁰, Sidi Behlul, Sidi Σmer Crif
…atg.
S annect-a akk ad d-smektiγ d akken inzan-agi
sehḍaren-d iγersiwen, tiγawsiwin, igḍaḍ d ibeεac akk d
wid yemmuten ẓer-t-ett di mi ara k-inin : " Yenna-yas
wuccen", "Yenna-yas ukerra", "Yenna-yas ujaγiγ",
"Yenna-yas Lexḍer Musa"²¹ …atg.

- 14 -

Inzan-nneγ ur ğğin acemma war ma ur t-id-bdiren
ara, ama d iḥinnaḍ²² d cbaḥa-yis s idurar n Ğerğer,
isaffen, iγezran, tiγaltin, d tuga yellan deg-sen, d
iγersiwen d yegḍaḍ-is. Ama d lewqat n tyerza d wallalenis akk d tensayin n imezdaγ n tmurt n Leqbayel deg yal
taswiɛt. War ma ǧǧan-aγ-d ssegzin s wassaγen²³ yellan
gar at uxxam kan neγ gar At uxxam d iberraniyen, ama
gar temγart d teslit, gar urgaz d tmeṭṭut-is, gar dderya d
imawlan, neγ gar yemdanen d iγersiwen yettidiren deg
uḥinnaḍ n tmetti taqbaylit zik d tura.

Ula deg wawal…d adlis i d-yewwin ammud n

yenzan n Leqbayel. di tegti-nsen, yezmer ad ilin ur
ttwassnen ara imi werǧin d-ddan deg idlisen nniḍen.
Yuklal ad yettwiγer s tseddi d umeqqet²⁴.

- 15 -

-A-A Ceεban Izerkuken, lehdur deg unebdu ay fukken.
-A dunnit iεewjen, d aγerda i ijewǧen, amcic yedda d
aqeffaf, yečča tislit di tesga.
-A dunnit yessanazen, yettarazen, tettara win zzuren
rqiq!
-A Faḍma ɛas axxam, a Rebbi εas Faḍma.
-A laxert am uxertum, a taberkant uqadum, amaqwa n
win ibeṭṭun aγrum d uksum!²⁵.
-A leεǧeb yeεuǧǧben, teqqen taγaḍt d wuccen !
-A leṣlaḥ ṛwaḥ.
-A lfeṭṭa n ubzim arqaq iwwten wudayen, win irewlen
fell-i yumayen, nek rewleγ fell-as εamayen.
-Allah, allah, ayen yellan yallah !
-A lwerd ireggm-ik leḥcic.
-A lwexda iṣaren, yuγal uqelmun s iḍaren.
-A mu zriru, yak ula d tawenza trennu.
- 16 -

-A Rebbi dawi neγ awi.
-A Rebbi deg-k ineṭṭef, mačči deg cebki n ṛṛef.
-A Rebbi semlil-aγ-d d widen iγ-yifen, ad nettεanad ad tnaweḍ, wannag wid id-nemsawa, ula wa irefden wayeḍ.
-A sidi Σli n tulmut, teḍra yid-i tmacahut, tilufa n
medden akk frant ma d nek simmal ara d-rennunt.
-A skenjbir a bu qacuc, γef yekkat wanu d ncuc, jemεed
udi-yiw seg yal aqbuc.
-A taciṭa n tleggwit is-id-sefḍeγ taxabit, ma wer d-yusi
wergaz-iw ṣbeḥ, ad d-yas tameddit.²⁶
-A talxuxt yebban, yellebban, id-yeffγen s ddaw leεziza,
argaz ma yebra i wallen-is is-yelhan d nnecraḥa, s ufella
taḍsa turart, ar daxel wwet-as meḥḥa.
-A Tamguḍt ²⁷ yeεlan, yersen γef aman, yak tella Yemma
Xliğğa tbeddel-am tugdi s laman.
-A tamekḥelt n Lbariz, yal wa γer bab-is εziz.
-A tameṭṭut ! argaz am uzrem, simmal tessusumeḍ,
yettaẓ-d ar γur-m.

- 17 -

-A tamγart a m tjujal, kem awer trebḥeḍ nekni awer tnennal.
-A tamγart a m ureḥruḥ, ad yili wawal iruḥ, terreḍ-d degs ṛṛuḥ.
-A taninna a tabeḥrit, kemmini d gma-s n ṭṭir, aqcic ma
ixedm-am ccer kemmini xdem-as lxir, mi id-tiweḍ tizi
ad tt-ferqem deg wul a kem-id-yettfekkir.
-A taγeddarit, nneḍr-im xedm-it, argaz d ahudi ma
iḥawel d tiγrit.
-A taxxamt-iw tameεzuzt, ma lluẓeγ ad geγ aḍemmin.²⁸
-A tiregwa n leεmer, i zwaǧ n Qasi Weεmer !
-A ṭṭir ur ttafeg, ur ttrus?!
-A Wejbara a Wejbara! ad teεyuḍ di lmenṭara, ad duγaleḍ alma d aḍar-a
-A wid id-yeğğan lqid, iεerq-aγ cced uyeddid.
-A win i wumi tmal, lexrif-ik yečča-t lmal.
-A win ijebbṛen ur yettruẓ.
-A win imeggren addad, Rebbi atan d lmendad.
- 18 -

-A win yettamnen dunnit, ajdaṛ yuγal d tixeddit.
-A win yettwarzen s lḥif, yekfa-yak wadif, ur ttεawan
Rebbi deg uγilif.
-A Yat wudmin d At wudem-a, ṣyada di tizi tecrek, ay
Ibehlal d Ccerfa, abeḥri nwen ad d-iḥerrek.
-A Yeḥya Weεli a ṭbell ilili, ulamma ceṭṭḥeγ tiṭ-iw
tettnadi
-A yessetma tijiratin, ma ḥusseγ dlemt-iyi, γas ulamma ur
xdimeγ lxir muqlemt i wudem n rebbi.
-A Zubir a bubendir, a bujewwaq γer deffir.
-Aεudiw yeqqar:” allah “ ma d aγyul yeqqar:” ccah “.
-Aεdaw-ik ml-as tidet, ma ytebε-ik yenfeε iman-is, ma
yeqqim iḍur iman-is.
-Aεdaw ass mi id-aγ-yeḥkem, i neẓra kullec ad t-yexdem.
-Aεdaw d lxadeε, aḥbib d ṭṭameε ala rebbi ma yecfeε.
-Aεebbuḍ d urγib, win ur s ngi lqid, ur iεeddel aḥbib.
-Abeckiḍ, amuziḍ, muqel d acu id-iwiḍ.
-Ac xlaf gar inebgawen, yeεreḍ sin yeǧǧa yiwen.
- 19 -

-Acebḥan yebγa taxlult, aderγal yebγa taẓult.
-Acḥal i telha nniya lamer ur tessengar atmaten.
-Acḥal i yezha i lexrif, di ccetwa yedda εeryan.
-Acḥal semmeḍ am wedfel wul ur nḥemmel.
-Acengu, d asulef i yettrağğu.
-Ad akk nemmet.
-Ad aγ-yefk Rebbi leεqel anaṭṭef ar aγ-d-iḥudden si lkaf.
-Ad aγ-yefk Rebbi : - lğehd ukerruc,
- d tuqsa uberbuc,
- d lhiba n lewḥuc.
-Ad aγ-yemneε Rebbi si: - tuččit n lqanun,
- d yir xenfuc γer lkanun ,
- d tyerza s umanun .
-Ad aγ-yemneε Rebbi si tyita n deffir d udγaγ uffir.
-Ad d-iban ddheb si bublik.
-Ad d-kren wid yemmuten?
-Ad d-nuγal s awal γef i nzant tγeṭṭen.
- 20 -

-Ad ineγ, ad iwajeh.
-Ad k-iger Rebbi γer tessirt n Imerjaj, ma wer k-kisen
azgen, ar d ak-wwten.
-Ad k-yexzu Rebbi a cciṭan, yefk-ak aṭṭan, yeml-ak abrid
s iḥerqan.
-Ad k-yezzenz Rebbi ṛṛay akken it-yezzenz i Wsasi.
-Ad mriren tisfi!
-Ad myeḥkun tiqdimin.
-Ad necḍeḥ ur aγ-yehwi, di ddewla ujenwi.
-Ad nečč aberčeču²⁹ γef wudem n ciccu.
-Ad nehder cwiṭ, ad nefhem aṭas.
-Ad nemmet ad nismiḍ, ad nesred i usemmiḍ.
-Ad nessired dnub ma numes.
-Ad ruγ i tettru tammwat, tasa tekka nnig tagmat.
-Ad tili menğa tεewweq, ard taγ argaz teεluleq.
-Ad tt-arweḍ, ad tt-iḥnineḍ.
- 21 -

-Ad tteεqel tyuga axemmas!
-Ad ttečč-eḍ a lḥağ si nwal-ik.
-Ad ttemlil tasa d way turew.
-Ad tt-id-neẓẓeg wer turiw.
-Ad tt-iniḍ d mmi-s n tmellalt.
-Ad tt-iniḍ yexleq di tmellalt.
-Ad tt-ruḥ taffa s annar?!
-Ad yaγ tamayelt.
-Ad yečč umaẓuẓ ma yelluẓ.
-Ad yeṛwu weḥnin taḥnint, ad yeṛwu ubazin³⁰ tasilt.
-Ad yesseḥlu Rebbi tiqdimin, yesεed tijdidin.
-Ad yetter uyeddid tadlawt?!
-Aεebuḍ am lebḥer, ayen is-tegreḍ yezder.
-Addud si leεtab.
-Aderγal yeḥwağ tafat am yinig yeḥwağ tifrat.
- 22 -

-Adγaγ it-yettruẓun d gma-s.
-Aḍad-ik deg uqemmuc-iw, a win yettnadin γef cwal-iw.
-Aḍar yetabaεen later du laqrar ar d yenṭer.
-Aḍeggal am wemrabeḍ, aγ afus-is tεeddiḍ.
-Afus-nneγ di tgeccult ma nufa d udi i nebγa ma ulac ula
d iγi yelha.
-Afus nnig uṭennir³¹, γer seksu n Sut Ufella.
-Agacuc³² yebγa tikli, ifadden kkiwen.
-Agellid d yewziren, tilawin d yergazen, ur ẓrin i
yettṣaren.
-Agerfiw mi yetthuz tuyat, nek regwleγ si nneḍḥa, iγil d
rennu id-iyi-rna, ladγa regwleγ si rriḥa.
-Aḥlil afellaḥ, aḥlil bab n tyuga.
-Aḥlil-k a win irebḥen lεar, iger ifuk.
-Aḥnin ad yewret.
-A ezzeb i

aba d lmu iba.
- 23 -

-Akka is-nniγ i Rebbi xedm-as, bab n tyuga err-it d
axemmas.
-Akka neγ ad yeks.
-Akka neγ ad tekker takka.
-Akken iga wegma-k tgeḍ, ma wer tezmir-eḍ ekker ad
tt-gağğ-eḍ.
-Akken iyi-d-γennaḍ, nek ad ak-ceḍḥeγ.
-Akli is-tedden tḥeṛṛit ula s tinzar ad tt-yaγ.
-Aksum n medden d amerγan.
-Ala akal ar ad tt-yeččaren.
-Ala aγyul i ynekkren laṣel-is.
-Ala deg wass amcum i tettarew taγaḍt.
-Ala sḍel i yettruḥun s ufus.
-Alamma nenna-d:”mmuh “.
-Alebεeḍ yezweǧ wer yendim, wayeḍ ara yessikir aglim.

- 24 -

-Alebεeḍ yezha-t mmi-s mi yettmurud iferreḥ, Alebεeḍ
yezha-t cci-s mi yettǧuǧǧug ifetteḥ, Ma d nek a sidi
Rebbi efk-iyi ttuba n ṣṣeḥ.
-Allen snat, azal yeḥma.
-Am tirget deg waman.
-Am uγerbal, ur yettεebbi, ur yessenγal.
-Am win yeḍsan am win iεekkan, yiwen webrid i yekkan.
-Ama da, ama din, neγ da i yaxir n din.
-Amek ar ad teẓreḍ taggara n leεmer?
Mi ara yili yiwen ɣef lḥeq ihedder, meεna iḥeqqer,
Mi ara yili yiwen yectaq iḥder, meεna isekkeṛ,
Mi ara yili yiwen yessutur leqder, ma di nnif-is
yehder.
-Ameksa n Σli Uεezzuz, yewwet uccen iḥuz agenduz.
-Ameẓyan iserreḥ i tlufa, ameqran tura i d-yestufa.
-Amakur: si tsegnit γer tmellalt, si tmellalt γer telγemt.
-Aman γef myenqaren idurar.
-Aman s anda llan i rennun.
- 25 -

-Amayaf, amayaf, yal yiwen ayen yexdem ad t-yaf.
-Am tudert n wandur, itteṭṭeḍ kan yettuzur.
-Amcic daymen d amcic.
-Ameggel n ikiccer³³, a wer d-yefk iger, a wer nečč iḥder.
-Amezwaru γer din, aneggaru γer din ala Rebbi ara dyegrin.
-Amqerqer n lbuṛ, ccmata yerna lehdur.
-Amγar yekka-d ssuq, tamγart tettnadi imsewqen!
-Anda ḍemεeγ ad ččeγ tixsi, nsiγ bla imensi, anda ur
ḍmiεeγ imensi, ččiγ-d tixsi.
-Anda tensiḍ ad yali wass.
-Anda tessawḍeḍ aman xdem tissirt.
-Anda llan wakraren, i ttemberrazen.
-Anebdu n uẓawali, ccetwa n bu dwaṛi.
-Aneggaru ad s- yerr tawwurt.
-Anesga i s tekkiḍ i Σeggac³⁴ d asawen.
- 26 -

-Anesga i tεedda taγaḍt, teḍfer weltma-s.
-Anwa i d gma-k ay azger? “D win akk-id d-qneγ “.
-Anwa ay afen axeddam am umextaf, mi yexdem s-yes
ard yessali, ad t-iεelleq.
-Aγeggaḍ 35 d aγeggaḍ-inu, tizemrin-is d abandu36.
-Aqcic d-teqcict msebγan, at ttaddart γelben iḍan.
-Aqejjir n weγyul yeqqar-as negreγ, tabeε-is yeqqar-as
xelfeγ.
-Aqerruy-iw d aferḍas!
-Aqlih am Buεemmar, ur yufig yecba leḍyur, ur iris
yedda γef ḍar!
-Aqlaγ am lmal mebla ameksa.
-Aqlaγ am seksu ddaw texsayt.
-Aqlih am tbuzegrayezt, ur leqḍeγ zerriεa ur ssexṣareγ
tayerza.
-Ar wuγur tettarra twaγit? Γer win yerwan tiγimit d win
is-yeqqaren ar dennit.
-Ar d-yejεu weγyul si lebḥer.
- 27 -

-Ar d-yeǧuğğeg lemleḥ, ad yesεu weεdaw ṣṣeḥ.
-Arbib d arbib, d aṭṭan wer nesεi ṭṭbib.
-Argaz am uḍemmin n tdikelt, anesga id-yekka mecḥ-it.
-Argaz am uksum yewwan, mi tεeddaḍ tewwiḍ cwiṭ.
-Argaz d tmeṭṭut, lγiḍ-nnsen deg iciwi-nsen, mi kkren ad
asen-yeγli.
-Argaz d win itent-iferrun, mačči d win itent-iḍellun.
-Argaz s yergazen, ala Rebbi i yemden.
-Argaz war acengu, d acu-tt lbejla i yseεu.
-Argaz yessebded awal s yemdukal, aggur icebbeḥ igenni
s yetran.
-Areṭṭal n yizem i teγyult!
-Areṭṭal d gma-s n ddel
-Areṭṭal tetebε-it tririt.
-Aγrum yewwa times ulac, lḥes yella imdanen ulac, leftek
yella leεbad ulac, ala kem d nek a Σica yelli.
- 28 -

-Aγyul d aγyul-iw, rniγ rrekba γer deffir.
-Asif mi meqqer i tteddem.
-Asfel yesseḥlay tiṭ, aḥeckul d-tagdiṭ.
-Asγar yeγlin si tezdemt, yenqes si teεkemt.
-Ass mi i tella nniya, aεlaw12 yedel meyya.
-Ass mi akken i nebḍa aqessul, i neggul ur nettdukul.
-Ass mi akken tazmart tella, nessečč i medden yal rbeḥ,
ma d-tura mi neγli deg tesga, ferḍen-aγ medden deg
meṣleḥ.
-Asuter n urgaz d imeṭṭi.
-Ata lḥeb ata ukerfa, ata wammus atta nneεma.
-Atmaten am iḍudan n ufus iten-icerken d-tidikelt.
-Atmaten am yinyen, wa izellem wa.
-Atmaten ttemyuğğun, icenga ttemcuddun.
-Atmaten-ik xeddmen lecγal, kečč ay arẓug38 ẓẓenẓun!
-Attaya ccetwa ad tteglu s tefsut.
- 29 -

-Awah a lbaz! Ad nemyekmaz, ad nemḥennaz,ad neẓẓeg
timguyaz ad nernu ula d tilqaqin.
-Awah zwaǧ d agguren, ad ẓren medden ara aγen.
-Awah yiwen d nek yiwen am nek, ad nexdem taxxamt i
deg wer yelli ccek.
-Awal iεedda izerref, yuγ abrid n At Yexlef.
-Awal ma ihedr-it waras isem-is mesεud, ma yeggul jmaε
liman, war ma yerna lεahud.
-Awal n wanguf yeččur ula d aserfuf .
-Awal-agi zik it-nesla, d aqerraḍ yeggar times, mi itt-iger
mebεid ar ttenteε, ad yazel d amḥad ad tt-yesnes.
-Awer yemmet, awer d-yekcem s axxam, lerbaḥ ad tenid-yessekcam.
-Awer d-yerr agelzim s axxam.
-Awid kan i yettilin deg-m a taylut?
-Axxam wer nesεi tamγart, yecmet ula di turart.
-Ay aεquq n leb el yegmen ifu el, ulamma γezzifeγ d
mmi-s n las el!
- 30 -

-Ay abendayer, amek i teḍra d Lezzayer?
-Ay aberčečču, mačči d lεib ma nettru.
-Ay aḍerḍaq id-yemγin deg yeγzer iḍaq, kra n win
irebḥen, yin-as d nek i d qessam n lerzaq.
-Ay afenğal, tizyaw tezweğ nek mazal.
-Ay agujil si yemma-s, ahat deg ugudu n leflas, ay agujil
si baba-s ahat deg irebbi n yemma-s.
-Ay ajeğğig aweεli, lkaf a wagi ibeεden ula ansi.
-Ay ameksa bu tfexsa i wumi yecbeḥ ttfiṛ, Ur tetteγ seg
imurḍusen, ur εennuγ seg ir lemsiṛ, Ma newεa lḥeğla
nṣeffer-as, ma ulac ṣber i yaxir.
-Ay amuḍin ma ad tteččeḍ!?
-Ay aneznaz yekkaten, nellexs ur neksi!
-Ay Aqemqum 39 i zewwiren i lqum!
-Ay asaru mačči akka i nεud ad tteḍru!
-Ay asekim mačči d lεib ma neqqim.
-Ay asennan amellal, yal yiwen ayen yemger ad t-yennal.
- 31 -

-Ay aṣeggad Amceddal id-yeqqimen mebεid i lexyal.
-Ay azemzi ulac lεib di tmusni.
-Ay aẓru n ssris, ibedden ur iris, Lalla Faḍma γef yiwen
wawal gezmen ifassen-is40.
-Ay inujal id-aγ-d-yettaken tijujal.
-Ay irgazen a tifeγwa, sseqcer kan tegreḍ s imi.
-Ay itri n tafat, yeqqel d lemγerrer.
-Ay izem yettebririḥen nnig yemsaḥen, nnuγen akk
medden fran, i nekwni εniγ d imxalfen.
-Ay izimer a bu tuεlect, dunnit γezzifet annect.
-A yul-iw ečč aḥetḥut, lεali wer k-id-iṣaḥ, lεali tečča-t
teḥbubt, tegriḍ-iyi-id a bu tzelbubt.
-Aydi wer neqqin deg wexxam-is, ur yetteγẓaẓ iγessan-is.
-Aydi yečča awtul yiwwas, ğğan-t i laẓ yal ass.
-Ayen akk texdem tuccent, ttarrant medden γef uccen.
-Ayen din atan din, taqerract n Rebbi tendi.
- 32 -

-Ayen iğğant tfellas, kemmlent-as tuẓẓal.
-Ayen xedmeγ di Tεerqubt, tiwi-it-id tqendurt!?
-Ayen yelmed ma yettu-t enγ-it neγ zlu-t.
-Azger ikerz-itent, aγyul yečča-tent.
-Azger iledha d tyerza, tayuga tiwi cciεa.
-Azger n ttpu, ttpu41!
-Azger yeεqel gma-s, akken kan i ttdukulen.
-Azger yessen lmers-is.
-Aẓar ujeğğiḍ42 ma wer icebbeb ur itett.
-Aẓawali medlul yesem-is, ur jegjent yessi-s, ḍḥant-as-d
am lemḥemga43.

- 33 -

Σ
-Σawneγ-k ay azger di lfert-ik lfud terriḍt-id akk fell-i.
-Σeddan akk medden la ḥir, mi Σeddaɣ nek yerdem
weεfir.
-Σeddaγ di turtit sliγ-as yewt-itt, ma fell-i itt-yewwet, ma
hwa-yas yenγ-itt.
-Σemmi Σumer yedderwec, tuγ-it tawla γef lekrawec.
-Σemmi yeεma-yi, xali yexla-yi, anda-k a baba lεali.
-Σerḍeγ-t-id ad yezziẓen, yerna tuccṛa n iḍarren.
-Σerḍeγ-t-id yečča-t akk.
-Σuhdeγ-kem a taduṭ n rrbiε yeqqimen almi d lyali,
tekker tegreḍ azenniḥ tenna-yas : “ata usan-d lwali “

- 34 -

B
-Bab-ak γer baba d nned, kec d aγrud nek d anekruy.
-Beεεu γef lillu ⁴⁴.
-Bu laṣel ḥeğben-t leswar, ur t-ttağğan ad yemmenṭer.
-Bu lbext uzqim yexdem neγ yeqqim, bu lbext urqim
ahat di tesga i yeqqim.
-Bu snat yiwet ad as-truḥ.
-Bu texlult yerna awal!
-Bḍan-aγ am ibawen γef lluḥ, win yegrarben iruḥ.
-Bges txelleḍ, d anguf id-mlaleḍ.
-Buddeγ-as i baba leflas, d sebεa tullas, d wayla-s am
dlala.

- 35 -

C-Č
-Cbaḥa n urgaz d tirrugza, cbaḥa n tmeṭṭut d leḥya.
-Ccer-nneγ d imezgi ula deg isγaren n teẓgi.
-Cciṭṭan ur yessin lemqil, ur yessin ad iqil.
-Ccix-nneγ d amerbuḥ iḥemmel ula d acedluḥ.
-Cuḥ iruḥ!
-Cuḥ mi yella, mačči mi yekfa.
-Ččan irdawen, εellen udmawen.
-Ččaw, ssaw.

- 36 -

D
-D abendir ixuṣ cwiṭ, d ṭbel izad cwiṭ.
-D acu ara yessegnen Aεḍar Weεli Bwar ⁴⁵, d usu neγ d
taduli.
-D acu i d-yessali win yettrebbin ibki ? ur yellis taduṭ ur
yeẓẓig ayefki.
-D aγelmi neγ abeqri, annus wer yelli.
-D asennan id-aγ-ineğğren abrid.
-D awles i d-yiwin makes a Ṭawes wamma ad nḥewwes.
-D axenfuc n uḥuli! ⁴⁶
-D aẓru ay nettḥib yal ass ad t-nettbib!
-D iles-iw i d imxerreq, i tegnit ma di tneṭṭeq?
-D imi-nni i yjerrmen aγrum, i yjerrmen di lqum.
-D isem-is i d cceγl-is.
- 37 -

-D gma-nni i yid-yeqqaren”ccah” i yeqqaren i weεdaw
“awwah!”
-D lemḥayen i yessefrayen.
-D tafruxt, d tafruxt, mi turew d tayaziḍt.
-D tamara id-aγ-yerran γer tmeṭṭut yebran.
-D tifeγwa i yesneggren yemma-s n taga.
-D tismin i yehban leεrac, alarmi iheddren warrac.
-D tizizwit kan i yberriken.
-D ṭṭiεna i yseččayen iẓẓan n iyuzaḍ.
-Dderya d lexrif n lkanun.
-Dderya n teḍsa, win ur neḍsi ad t-yezzem Rebbi.
-Ddiγ d yir rfiq, yeğğa-yi deg yir mḍiq.
-Ddwa n umedyan d ayla-s, ddwa n llufan d yemma-s.
-Deεwesu kkes-d win wer telqif ula d aγbub tesself-as.
-Deεwessu n lwaldin tewεer, tgezzem am terṣaṣin :
-Alebεeḍ tefγ-as di dderya, yectaq tiγimit di sin,
-Wayeḍ tefγ-as di sεaya, ur yeṛwi tibexsisin,
- 38 -

-Wayeḍ teffeγ-as di ccada, awal n Rebbi wer t-yessin.
-Dekkar-ik teffeγ-it tizit.
-Deg yal tiγmert yebded yeqwi, nek ula swayes nehreγ
ulli.
-Di lmux n wuccen i yettili ddwa!
-Di sebεa ur εebban i weγyul.
-Din i tuḍen icc-is.
-Din itt-yezla yessaker-itt.
-Dunnit akk d asawen, ula akken ur d tt-yekrih yiwen.
-Dunnit am teḥbult n uγrum, ur tettewwa wara γef
yiwen wudem.
-Dunnit am wedγaγ, yal axxam tettwaγ seg wergaz neγ si
tmeṭṭut.
-Dunnit d timisit am ṣbeḥ am tmeddit.
-Dunnit ḥedd wer tt-yeqḍiε, felḥed Mḥend At Mniε⁴⁷.
-Dunnit mi ara tṣeggem, bab-is ar ad t-exdem γas ma
yella d ḍḍayeε.
-Dunnit n Bexxi, kullec d xixxi.
- 39 -

-Dunnit tejba-d nek jbiγ.
-Dunnit tjebbed nek jebbdeγ.
-Dunnit tettufaras!
-Ḍemεeγ yella kra deg uḍellaε, ziγ d abelluḍ alma d lqaε!

- 40 -

E-F-G-H
-Ečč a Mḥend ur tesεiḍ ḥedd.
-Ečč ar d tterwuḍ, lqanun azgen.
-Ečč i tufiḍ a tin wer nessin aqeffu ⁴⁸, els i tufiḍ a tin
wer nerbi alaku ⁴⁹.
-Efk-as i umeγbun turin ur yessin tifessudin.⁵⁰
-Efγ-ed a Mḥend ad k- erεeγ!
-Efγ-ed a Zineb n inurar ad nurar!
-Effer awal ard d-yas wass-is.
-Egzem εeẓẓi sgud meẓẓi.
-Ekkes i tamart, txelfeḍ i claγem.
-Erfed aẓru, ad d-yeddu imexnez!
-Exdem tafeḍ.
-Exdem yella, qim ulac.
-Felḥed bu iteğğan * yeγra εad ay aneğğar n tjeγlin.
- 41 -

-Gar leḥbab d wayyawen, i yemyuqqaden wulawen.
-Gar uḥeggan d nnisan, i jebden wussan!
-Ger i lεar ger i telεart, tgeḍ i win ik-ed-ger tesγart.
-Hatt γur-k a bu nniya, bu tḥilet laεmer itt-yiwi.
-Heddreγ-as, iγelli-yas.
-Ḥedd yeεceq di leqraya, di lğameε la yettkerrir, ḥedd
yeεceq di tiffulḥa, yessečč lεebd yerna ṭṭir, ḥedd yeεceq
di timmudḥa, d tin i d lsas n ddin.
-Ḥerk-itt ad tteẓd!
-Ḥmed N Twerrutt51, tasaft iqelε-itt εad a tulmut.

- 42 -

I
-I lehna n ddaw yifer, d acu id-suter?
-I tεebbuḍt yesεan aṭas, amek ara txaṣ?
-I teḍra yidi a yemma, am tuccerka d wemrabeḍ, ma
ruḥeγ d daεwessu, ma qqimeγ taqeḍεit tiweḍ!
-I tmisit ma tettfukku? Ala aεbar ma yettdukku.
-I tṣeḥḥa i tga azemzi, i tewεer mi ar ad d-tezzi.
-I uggadeγ d bab n lxir ula ansi ar ad s-terreγ, wamma
bab n ccer ula si lγerba ad s-t-id-ceyyεeγ
-I wacu imu yelha wewtul? I wesluγ uqessul.
-I wass mi itt-yebḍa qessam yufa-yid deg iγzer ara
gemmreγ zzeγḍer, ssutreγ-t ad iyi-yefk ayla-w, yennayi:” ulac zheṛ”
-I wcerrid ma day d aγrum, i wkeckuc52 ma day d aksum?
-I weydi ma yesεa imawlan?!
-I win i yxeddmen γef xalt-is, ur yerbiḥ adrim, ur yeṛwi
rray-is.
- 43 -

-I win ur d-ṣaḥ lkelfa, ayγer ara yesmendeg isufa?
-I wumi ik-freγ a leεtiq? I wass n ṭṭiq.
-I yat tismin, d acu id-ssulin?
-I yebγun ixedm-it wezger ma d rrebg yurez-it!
-I yebγun teγzifeḍ-t a yiḍ, du laqrar ad yali wass!
-I yettwiḥemlen d bu tteffaḥ, wamma bu lebṣel yettraḥ.
-I yexlan d wid is-yennan, ad ruḥeγ ad k-ğğeγ a Sliman.
-I ytteksen iεkukal d imdukal.
-I yuran fell-ak a rras, tluleḍ-d di Fes yeddem-ik-id Wasif
Aεebbas, mazal-ak times d ttehras.
-I yurweγ d way urweγ, ur ufiγ d win ar ad d-qqimeγ.
-I yxeddmen d ilfan d wid i wumi kfan.
-I zzur wudem iṣeḥḥa, a Σica Welt Buleḥfa, ad d-yazu
sgem lmelxa, ad iles anebdu ccetwa.
-Iεac deg uzagur n medden am tilkit, leεmer yessager
tiqit.
-Ibeddel uḍeggal tiḍulin!
- 44 -

-Iberdan ara ḥekkun γef uzedgan d umeεfun.
-Ibiw-iw neγ ad bezḍeγ times!
-Icum-itt i uqerru-yis!
-Id ak-nniγ d nnefε-ik, alwerdu xdem rray-ik.
-Iḍ d wass nek d axeddim, lfud yuss-ad bu wedrim, yiwi
lḥeb yeğğa-yi alim.
-Iḍegger gma-s acqiq, yiwi-d Aεrab wissen ansi!
-Ifat icud ur iḥebbwa.
-Ifat-ik lefjer ay amγar.
-Iger afus-is di lkanun.
-Iger, it-ikessen d smaṭa.
-Iger-itt i leεmer-is.
-Igenni yebεed γef tmurt, argaz yeγleb tameṭṭut.
-Igenni yeγleb lqaεa s lehwa, argaz yeγleb tameṭṭut s
lhedra.
-Igerrez-as tisebbaḍin.
- 45 -

-Iḥder n ukermus, i yebḍan s lmus, argaz bu takna ifuḥ d
amurḍus.
-Iḥeḍer-d γiz w enṭel!
-Iḥemmel-d wasif yiwi-d ameqyas, nesεa yiwen weqcic
neggar-it-id d alemmas.
-Iḥus wezger, qden aγyul.
-Ikecm-ed d abumeεac, yuγal-aγ d abuneεac.
-Ili yidsen, tefγeḍ yidsen, ad tefγeḍ γef ddin-nsen.
-Imi tagnit tekmer, taγaḍt ad tarew izimer.
-Imi uεlec yerreẓ, i umayeg amek ara ifeẓ?
-Imi yesseblaε, tiṭ tettqaraε.
-Imensi i terkeḍ taγaḍt!
-Imenγi n iḍebbalen, mačči γef cnawi γef yedrimen.
-Inagan n bu yetman, iruḥ ad d-yawi atemmun, yufan
anebdu yeffeγ.
-Indeh-itt wahruḥu!
- 46 -

-Indeh-itt waẓakin!
-Inebgi i γef iga ucedluḥ, iḍ-a nensa, azekka ad nruḥ.
-Inebgi n telt yyam, yeẓra lbaḍna n uxxam.
-Inifif, yiwen cγel i yessen.
-Irgazen am ifeggagen, wa nnig wa, wa yettεerri wa.
-Irgazen am ibuqalen, wa ur ikeččem deg wa.
-Irgazen am yedraraḥen, kkaten am udfel qerḥen, ma
llan di tizi akinna, ad d-jbun si tizi γer da.
-Irgazen ččan ikerri, nek celleγ idammen γef yimi
-Iruḥ am teydert yečča weγyul.
-Iqerḥ-iyi uqerruy-iw cuddeγ cced n imuzzar, ur qqimeγ
deg uxxam-iw ur mniεeγ si tikli uzal.
-Iγaḍ-iyi lḥal γef win i wumi nniγ yenna-yi, wamma
aεdaw nγiγ-t yenγa-yi.
-Iγyal d iγyal akk, meqqar xtiret aγyul-nneγ i yessnen
adaynin53.
-Isem mechur, axxam meḍrur.
- 47 -

-Isuḍ deg wedγes.
-itett si tbarda am weγyul.
-Iwiγ-ed amcic ad iyi-wanes, yettberriq deg wallen-ines.
-Ixuṣ iwwi!
-Izem ik-yeččan wer yeṛεid!?
-Izem qabl-it s ttlaliw!

- 48 -

K
-Kkant nnig yeεlamen.
-Kkiγ sin wussan γef ucenfir n umeksa.
-Kra yebri, kra yewwi-t ubeḥri.
-Kseγ taεeqqayt-is!
-Kullec ma meẓẓi yecbeḥ, ula d taḥbult di bufreḥ.
-Kunnemti a Sut Wartilan, tineḥab s ddaw teẓra, mi
tegullemt ṣbeḥ γef kra, ḥṣu γer tmeddit yeḍra.
-Kulci d lebxat, ar tibḥirt d abḥat.
-Kulci dmiγ-t ad yeḍru ar tamettant n weẓru?!
-Kuku⁵⁴, ur yekkat ur yettfukku.

- 49 -

L
-Lεali yettban i ṭlam, war ma tmeddeḥ-it yemma-s.
-Laεmer yeεyi wezger deg icc-is.
-Lεezza tiweḍ agadir win yebγun yemmet neγ yidir.
-La lum ay At Sellum.
-Lamana tiweḍ bab-is.
-Lamer cḍeḥ s tγimit, yalfi ad xedmeγ tawaγit.
-Lamer d anεam, ad t-naru di tebratin, lamer d lefhama
ad neffeγ ar medden ad tt-id-nissin, imi wagi d zzher
akka i yura di twenziwin.
-Lamer d aγrum, win yellan ad-iyi-εreḍ, imi d aqcic, ur tyefki ḥedd i wayeḍ.
-Lamer d lεebd iyi-kksen ad t-εelleγ d tabenεemmet ⁵⁵,
imi d Rebbi id-iyi-kksen ad fkeγ azaglu i tayet.
-Lamer d rray n Ḥsen, ad k-refdeγ s sin ifassen, imi d
rray n Mensur, teẓram-t akk a medden meεdur.

- 50 -